Job 10 - Bible in Tzotzil de Chamula

¹ Xtavan xa ma' ti jcuxlejal une. Ta jbusan loq'uel ta yalel ti c'u s'elan ta xca'ie, ta vulvunel xchi'uc ti mu xnel mu x'ech' ti jvocole.

² Ch'ul Dios, mu ta jeche'uc no'ox ta xatic' ti jmule. Jamal albun ca'i bu mu x'ech' ta xava'i ti c'usi laj jpase.

³ ¿C'u cha'al jech oyun avu'un c'alal vo'ot laj avac'bun ti jch'ulele? ¿Mi bal to ta xava'i ti jipbil tenbilun avu'une? ¿Mi bal to ta xava'i yabtel ti buch'u mu'yuc xch'ulel c'usi ta spase?

⁴ ¿Mi yu'un jech ta xavil ec jech c'u cha'al ta xil ti viniquetique?

⁵ ¿Mi yu'un xi no'ox snatil ach'iel ac'opojel jech c'u cha'al ti buch'u sna' xcham xlaje?

⁶ Va'i un, ¿c'u cha'al ya'yel xat'un xa ta sa'el ti c'usi chopol ta jpase?

⁷ Yu'un xana' lec mu'yuc ti jmule, ti mu'yuc buch'u junuc xu' xispoj loq'uel ta smuc'ul stsatsal ti avoc ac'obe.

⁸ Laj ameltsanun ta avoc ac'ob, avi tana une, ta xatub ava'i ti jc'oplale.

⁹ Mu xch'ay xava'i ti xi s'elan laj ameltsanune: ta jop no'ox ach'el. ¿Mi ta xajoybinun ava'i ta ts'ubilum xtoc un?

¹⁰ Ti jbec'tal jtacopale, jech laj ameltsan jech c'u cha'al ti chu' vacax ti sletoj sba lec c'alal ta smeltsanic ta quexue.

¹¹ Laj ats'acanan lec ti jbaquiltaque, ti jch'uxuviltaque; laj quich' jbec'tal jnuculil avu'un.

¹² Laj avac'bun jcuxlejal; laj avac'bun ti syail xc'uxul avo'ntone. Ti jech q'uelbil chabibilun avu'une, cuxulun to.

¹³ Ta xquil avi tana une, xi s'elan ma' ti amucoj ta avo'ntone:

¹⁴ avac'oj asat ta sq'uelel bu ta jta ti jmule yo' jech ta xavac' jtoj ti bu ta xijelave.

¹⁵ Mi oy jmule, mu xa ono'ox cha'bel unbi, mi mu'yuc jmule, mu ono'ox xlaetuc ta xca'i, yu'un yamal jc'oplal avu'un, q'uelel ti vocol ta jtojole.

¹⁶ Mi cajal toyol xca'i jbae, co'ol a'elan jcot león ta xalubiun ta be, ti xabitet no'ox ta yaq'uel iluc ti ch'ayal ta xc'ot o'ntonal avu'un ta stsutsesel ti jc'oplale.

¹⁷ Xana' ono'ox ti oy rexticoetic ta sva'an sba ta scontrainelune; yich' xa yip ta j'ech'el ti sc'ac'al avo'nton ta jtojole; jech c'u cha'al epal soldadoetic ti mu'yuc spajeb nutsbilun ta xca'i yu'une.

¹⁸ ¿C'u cha'al laj avac' voc'cun? Chamcun ono'ox ti mu junuc buch'u laj yilbun ti jsate.

¹⁹ Muquinaluc batcun c'alal livoc' yu'un ti jme'e, mu'yuc xvinaj ti lital ta banomil unbi.

²⁰ Ti xi no'ox snatil ti jcuxlejale, ¡ch'an xa utun un! Jtauc to avu'un jutebuc ti xlaet co'ntone,

²¹ yo' to mu ta jtam batel be ti bu j'ech'el libat oe, ta banomil ti bu ic' ta j'ech'ele, ti mu xvinaj yu'un ti yic'ubele.

²² Ta lum ti bu naca queoval oye, ti bu mu xa stac' a'yeluc c'usi ta xc'ot ta pasele, ti bu mu xa xvinaj ti saquil osile.