Jeremías 8 - Bible in Tzotzil de Chamula

¹ Ti Diose xi ta xal ta jamale: “Ti sc'ac'alil taje, sbaquiltac ti ajvaliletique, sbaquiltac ti banquilaletic yu'un ti jteclum Judae, sbaquiltac ti paleetique, ti j'alc'opetique, xchi'uc ti buch'utic naquiic to ox ta jteclum Jerusalene, ta xich' busanel loq'uel ta muquinal.

² Lamal ta x'ictabatic comel ta c'ac'al, ta sat u, ta xojobal scotol ti c'analetic ti lec laj ya'iic ti laj sbisic ta yajvalique, ti laj yac' sbaic ta tunel yu'une, ti ta sts'acliele, ti ta sjaq'uel sbaique, ti ta snijanel xchimanel sbaique. Mu'yuc buch'u ta xc'uxubaj ta stsobel yo' ta xich'ic muquel. Co'ol s'elan stso' chon bolom busul ta xcom ta banomil.

³ Ti buch'u cuxul to ta xcomic ti chopol jnaclejetic ti laj xa jtaniic batele, ma'uc xa oy ta yo'ntonic ma' ti ta to xch'i xc'opoj ya'iique, ja' no'ox ti chamicuque. Ti vu'un Diosun ti scotol xu' cu'une, mu stselbuj ma' ti jc'op une.

Ta xich' tsitsel ti Israel ti mu x'ac'van ta ventae.

⁴ “Jeremías, xi xava'an aba ta yalbe ya'i jc'optac ti jteclume: ‘C'alal oy buch'u ta xyal ta lume, ta stam sba liquel. C'alal oy buch'u ta xch'ay ta bee, ta xtal stam ti bu com yu'une.

⁵ Le' une, Israel, ¿c'u cha'al mu xa'ac'van ta ventae? ¿C'u cha'al un, jteclum Jerusalén, ta j'ech'el laj ajip laj aten aba loq'uel ta jtojol? ¿C'u cha'al avac'ojbe yipal ti toyobbail ti mu xac'an xasut talele?

⁶ Jmalaoj xa ca'i, ts'etel xa jchiquin mi oy buch'u ta sutes sba yu'un ti c'usi chopol ta spase. Le' une, mi junuc ti oy buch'u xi jamal ta xale: ‘¿C'u xa no'ox cha'al ti vi s'elan laj xa jpas une?’ Scotol, jun be stamojic batel ti xbitet ta anil jech c'u cha'al junuc ca' ti mu xa stac' pajesel c'alal xyaquet ti letoe.

⁷ Ja'uc ti muc' ta saquil ichin xvilet ta vinajele, sna' c'usi ora ta sut talel. Ti tórtola eque, ti xjaval-eq'uene, xchi'uc ti smutal vo'e, sna'ic c'usi ora ta xbatic ta yan banomil. Yan ti vo'ot une, cuni teclumal, mi xavojtiquin ti oy c'usi jbel tsots albil cu'une.

⁸ ¿C'usi xavut ta xavalbe aba ti oy abijilique, ti xana'ic oy c'usi jbel tsots albil yu'un ti Diose? Ti buch'u sbainoj ta sts'ibael ti c'usi ta xc'ot ta pasel ta jteclume, naca jutbil ta xal. Mu meleluc ma' ti c'usi ta stsac ta sts'ibaele.

⁹ Ti bijil viniquetic taj une, nijil chimil ta xcomic ta q'uexlal apun. Mu'yuc xa c'usi xut sba, co'ol s'elan jun chon bolom xvalc'uj sutbij xa ti c'alal tsacbil ta pets'e. ¿Mi yu'un la oy to abijilic xana' un c'alal laj xa ajip aten ti jc'ope?

¹⁰ Jech o xal un, ta xc'ot ta pasel cu'un ta xbat ta yan vinic ti avajnilique. Ta x'och yan yajval ti avosilique. Yu'un acotolic, mi ich'bilic ta muc', mi ma'uc ich'bilic ta muc', yac'ojbe yipal ta sa'el ti c'usi ta xtun yu'un ta sventa ti c'usi chopol ta spase. Scotolic naca lo'lael ti c'usi ta spasic ti j'alc'opetique, ti paleetique.

¹¹ Ta xavalic ti lec oy scotole, c'alal mu'yuc c'usi lec ta xc'ot ta pasele, naca no'ox ta xavac'be xchi'il syayijemal ti jteclumale.

¹² Ti jechuc une, xq'uexavic xchi'uc ma' ti va'i s'elan ta xc'ot ta pasel c'alal mu xa ts'icbaj ta xca'i yu'une. Le' une, mi ja'uc xa xa'iic q'uexlal. Mu xa sna'ic c'usi ti q'uexlal une. Jech o xal un, c'alal ta jtsitsique, ta sbosi yacanic, ta xyalic ta lum jech c'u cha'al laj spasic ti yane. Jech xcal ti vu'un Diosune.’ ”

¹³ Ti Diose xi ta xal ta jamale: “J'ech'el ta jtuch'be sc'oplal ti jteclume jech c'u cha'al ta xich' tuch'el ti trigo c'alal ta xich' tsobele. Mi jbejuc sat uva ta xcom ta yaq'uil. Mi jbejuc sat icux ta xcom ta ste'el. C'ajomal xa no'ox ta xcom yanaltac ti nucultajem xae.”

¹⁴ Ti jteclum une xi ta xlic yalique: “¿C'u cha'al ti li' no'ox oyotique? Batic jcotoltic ta nac'obbail jteclumetic, j'ech'eluc quich'tic milel. Ti Ajvalil Dios cu'untique sq'ueloj xa no'ox ta xijchamotic. Ta xac'botic cuch'tic vo' ti capbil ta veneno ta scoj ti laj xa jta jmultic ta stojole.

¹⁵ Jmalaoj calojtic ti ta xijc'un caj tsaj muyele, le' une, mu'yuc c'usi lec c'ot ta jtojoltic. Jmalaoj calojtic ti lecuc oyotique, naca xi'el laj jtatic.

¹⁶ Tal xa ma' ti jcontrainvanejetique. Xvinaj xa talel le' ta jteclum Dan xvuch'et xa talel sni' ti sca'ique. C'alal xjiq'uiq'uet no'oxe, ta xnic scotol ti banomil yu'une. Tal xa slilin ti jteclume, ti jnaclejetique, xchi'uc scotol ti c'usitic oy yu'une.”

¹⁷ Ti Diose xi ta xal ta jamale: “Ti contrainel ta xavich'ique, ta jtac talel venenoal chonetic ti ta sti'oxuc ava'iique. Mi ja'uc oy c'usi stac' spasic ti jbainom jsatinometic ta syaluele.”

Ta xa'i svocol ti Jeremías yu'un ti steclumale

¹⁸ Ti naca xa tsacal ti co'nton ta xca'i yu'un ti yipal xc'uxule, mu'yuc xa xpoxil un.

¹⁹ Xvinaj ta sjunul lum ti xi x'avlajetic ti jteclumale: “¿Mi mu'yuc xa li' oy ta jteclum Sión ti Diose? ¿Mi ch'abal xa ti ajvalil yu'une?” Ti Dios une xi ta staq'ue: “¿C'u cha'al laj asoquesbeicun co'nton ta scoj lic anijan achiman abaic ta yich'el ta muc' ti loc'obbailetique, diosetic ti mu'yuc c'usi xu' yu'une, ti yan o ta j'ech'ele?”

²⁰ Ech' xa yorail xchic'chun ti banomile, laj xa sc'oplal stsobel ti ts'unubaletique, mi ja'uc oy bu c'ot ta pasel ma' ti pojel ta jtojolcutic une.

²¹ Ti c'u s'elan ta xich' svocol ti jteclumale, jech ta xquich' jvocol ec. Ti mu no'ox albajuc ti xi'ele, ti at-o'nton ta xca'ie, laj xa yu'ninun.

²² ¿Mi oy to la c'usi stac' pasel ta jteclum Galaade? ¿Mi mu'yuc oy buch'u xu' ta xpoxtavan? ¿C'u cha'al mu staic poxtael ti jteclumale?