Jeremías 51 - Bible in Tzotzil de Chamula

J'ech'el ta xlilij ti Babiloniae

¹ Ti Diose xi ta xale: “Ta jtac talel jmilvanej ic' ta scontrainel ti muc' ta lum Babilonia ti jnaclej caldeoetic yu'une.

² Yu'un ti muc' ta lum Babiloniae, ta xc'ot ta pasel cu'un ta stojolic ti jech ta spasbatic yu'un ti scontraique jech c'u cha'al junuc trigo ti ta xich' vilesel ta iq'ue. Ta xc'ot ta pasel cu'un ti sts'ijlajan ta xcom ti slumale. C'alal ta xc'ot ta stojol ti vocole, tsacbil ta leto ta xc'ot ta jujujot.

³ Chaplicuc xchi'uc syolobic ti jxach'-yolobetique. Ac'o xa slapic ti smac sti' yo'ntonique. Mi ja'uc jutebuc xc'uxubaj yo'ntonic yu'un ti jva'lej viniquetic yu'un ti jteclum Babiloniae. Ac'o stubbeic sc'oplal ta j'ech'el ti soldadoetic yu'une.

⁴ Ta sjunuluc slumal ti caldeoetique, tusuluc ta xcom yu'unic ta calleetic ti jnaclejetic yu'une.

⁵ Ac'o mi laj xa sa' smul ta jtojol ti jteclum Israele, ti jteclum Judae, ti mu no'ox albajuc laj sa' smulic ta muc' ta lum yu'unique, ti Ajvalilun ti scotol xu' cu'une, ti ch'ul Diosun yu'un ti Israele, mu'yuc to loq'uem ta co'nton ti jtenoj comele.

⁶ “Jatavanic loq'uel ta jteclum Babilonia. Spojuc xa sba ti buch'u xu' yu'une. Mu aq'uelojuc abaic ta xachamic ta scoj ti smulique. Yorail xa ta jpac sutel ti jq'uexe. Ta stojic cu'un ti c'u s'elan loc' ta sa'el yu'unique.

⁷ Yu'un ti jteclum Babiloniae, co'ol to ox s'elan oro bis ti oy ta coc ta jc'obe, ti yacub yu'un scotol ti muc'tiquil lumetic oy ta banomile. Ti muc'tiquil jteclumetique laj yuch'ic ti vino taje. Ch'ay ti sjolic yu'une.

⁸ Ta jech no'ox yepal un, sbusus yalel ta lum ti jteclum Babiloniae. Oc'anic liquel yu'un un. Ich'ic talel poxiletic yu'un ti syayijemalique, jq'ueltic quic mi xpoxtaj to.”

⁹ Laj xa cac'becutic xpoxil ti jteclum Babiloniae. Mu'yuc xpoxtaj yu'un un. Ch'an xa utic. Loc'cutic batel li'e, ta jujun tal batic ta jlumaltic. Ti c'usi spajebal chopol ta spasique, xva'et no'ox muyel ta vinajel ta xc'ot jech c'u cha'al junuc toc.

¹⁰ Ti laj sva'an sba ta spaquel jc'oplaltic ta stsalel jcontratic ti Diose, la'ic, ba jlo'iltatic ta jteclum Sión ti c'usi laj spas ti Ajvalil Dios cu'untique.

¹¹ Ti Diose oy ta yo'nton ti ta stubbe sc'oplal ti jteclum Babiloniae. Tijbil xa sjol yo'ntonic yu'un ti ajvaliletic ti ta xliquic talel ta Media ti jech c'otuc ta pasel taje. Taje, ta spac sutel ti Dios ti soquesbat ti xch'ulnae. Chaplanic xa xchi'uc ti ayolobique. Tsaquic lec ti amacobbailique.

¹² Vinajuc ta a'yiel ti licuc xa yich'uc voq'uel smocal ti Babiloniae. Tacbeic batel xchi'ilic ti jvoc' jba'be soldadoetique. Va'anic jchabivanejetic. Lo'laic yo' jech tsalbil ta xc'ot avu'unic. Yu'un ja' ta xc'ot ta pasel ti c'u s'elan nopbil chapbil xa yu'un ti Diose, ti yaloj ono'ox ti ta scontrain ti jnaclejetic yu'un ti jteclum Babiloniae.

¹³ Jteclum Babilonia ti joyobtabilot ta muc'tiquil uc'ume, ti mu no'ox albajuc yepal ti ac'ulejale, ta xa xac'ot ta tsutsel. Ta xtub o ta j'ech'el ti ac'oplale.

¹⁴ Yu'un xi laj yal ti laj sva'an sba ta rextico stuc ti jech c'uxul ti Ajvalil ti scotol xu' yu'une: “Ta jbusan talel ti acontra ta atojol jech c'u cha'al ti xbuset no'ox ta xtal ti c'ulube. Xq'uejinic no'ox liquel ti tsalbil lac'ot yu'une.”

Q'uejimol sventa stoybel sc'oplal ti Diose

¹⁵ Ta sventa ti smuc'ul stsatsale, laj smeltsan banomil ti Diose. Ta sventa ti sbijile, laj yac'be lec yip ti banomile. Ta sventa ti xbaxbolile, laj sq'ui batel ti vinajele.

¹⁶ Ti jech xc'avluj to ti sc'opojel jech c'u cha'al ti chauque, xyuc'lij to ti vo' ti oy ta vinajele. Xva'et no'ox muyel ti toc yu'un ta jujujot xchiquin ti banomile. Xjaplajet no'ox yu'un ti sac tsel ti c'alal xyaquet ta xac' ti vo'e. Ta xt'om talel yu'un ti ic' ti bu nac'al yu'une.

¹⁷ Ti buch'uuc no'oxe toj pim, toj bolat xa'i sba. Yu'un xi s'elan ta xc'ot ta pasel yu'unique: Yu'un ti buch'u ta smeltsan ti loc'obbaile, lajem ta lo'lael yu'un. Naca jlo'lavanej loc'obbailetic, mi jutebuc cuxul.

¹⁸ Mu'yuc c'usi xu' yu'un, labal no'ox xac'. Ta xtubbat sc'oplal yu'un ti Dios ti c'alal ta xchapanvane.

¹⁹ Yu'un yan ta q'uelel ti Dios yu'un ti Jacobe, ti ja' laj smeltsan scotol ti c'usitic oye. Ja' laj st'uj stuc ti jteclum Israele yo' jech ta xc'ot ta xrexto. Jech o xal biiltasbil Dios ti scotol xu' yu'une, xi sc'oplal.

Ti tsitsel ta xtale, ta xtunesat ti jteclum Babilonia yu'un ti Diose

²⁰ Ti Ajvalile xi ta xale: “Jteclum Babilonia, ta jtunesot ta jmarso te', cabtejebot ta yaq'uel ti letoe. Yu'un ta jtunesot ta slilinel ti muc'tiquil lume, ta stubbel sc'oplal ti ajvaliletique.

²¹ Yu'un ta jtunesot ta stubbel sc'oplal ti ca'etic xchi'uc ti yajvaltaque, ti carretaetic xchi'uc ti yajvaltaque.

²² Yu'un ta jtunesot ta stubbel sc'oplal ti viniquetic xchi'uc ti antsetique, ti moletic xchi'uc ti jva'lej viniquetique, ti queremetic xchi'uc ti tsebetique.

²³ Yu'un ta jtunesot ta stubbel sc'oplal ti jq'uel-chijetic xchi'uc ti chijetique, ti j'abteletic xchi'uc ti j'abtel vacaxetique, ti ajvaliletic xchi'uc ti yajtuneltaque.”

Ti tsitsel ta xich' ti jteclum Babiloniae

²⁴ Ti Ajvalile xi ta xale: “Va'i un, ta aba ta asatic ta xavilic ti ta stoj cu'un ti jech loc' ayan ta yo'ntonic laj sc'anic ti jteclum Babiloniae, xchi'uc scotol ti caldeoetique, xchi'uc ti c'usitic chopol laj spasic ta jteclum Sione. Ti vu'un Diosune, mu lo'iluc no'ox ta xcal.

²⁵ Yu'un ta jcontrainot ti jsoquesvanejot vits a'elane, ti ta xatubbe sc'oplal scotol ti banomile. Ti vu'un Diosune, mu lo'iluc no'ox ta xcal. Yu'un ta jyales coc jc'ob yo' ta jtsitsot. Xabanlaj to yalel cu'un ta lican ch'entic. Ta xajoybinot ta jun c'aq'uemal vits s'elan.

²⁶ Ti jech jinem xa yalel ti tone, mi ja'uc xa ta xtun jbejuc yo' ta xich' va'anel na. Yu'un ta xacom o ta j'ech'el ta jun sts'ijlajan banomil. Ti vu'un Diosune, mu lo'iluc no'ox ta xcal.

²⁷ “Vinajuc ta a'yiel ti ta xatsaquic ta leto ti jteclume. Oq'uisanic ti oq'uese, chapanic ti jteclumetique yo' ta xlic stsaquic ta leto ti jteclum Babiloniae. Va'lanic ta stsaquel ta leto ti jnaclejetic yu'un ti jteclum Ararate, ti jteclum Minie, xchi'uc ti jteclum Asquenaze. T'ujic jun banquilal soldado yo' jech ta xal mantal c'u s'elan ta aq'uel ti letoe. Co'oluc to s'elan junuc c'ulub c'uletuc batel ti capem xa sjolic ti nopajuc batel ti buch'utic cajalic ta ca'e.

²⁸ Chapanic ti muc'tiquil jteclumetique yo' jech ta stsacvanic ta leto. Chapanic xtoc ti ajvaliletic ti liquemic ta Mediae, xchi'uc ti ajvaliletic yu'unique, xchi'uc ti yaj'opisialtaque, xchi'uc scotol ti buch'utic ta xu'nin ti banomile.

²⁹ Xnicnun no'ox, xc'uyc'un no'ox ti banomile, yu'un ta xa xc'ot ta pasel sc'op ti Dios ti ta sjoybin ta jun chopol sts'ijlajan banomil ti jteclum Babiloniae.

³⁰ Yu'un laj xa yicta sbaic ta letovajel ti soldado babiloniaetique. Tiq'uilic xa ta snac'obbailic. Laj xa ti yipal yu'unique. C'otic xa ta jun ants s'elanic yilel. U'ninbat xa ti slumalique. Tsanbat xa sc'ac'al ti snaique.

³¹ Xtal xbatic xa ta jujujot ti j'al-mantal j'ich'-c'opetic ti ta xalbeic ti ajvalil yu'un ti jteclum Babiloniae, ti u'ninbat xa ta j'ech'el ti steclumale.

³² Ti jcontrainvanejetique bat macvanicuc ta be ti bu ta x'ech' ti uc'ume. Laj xa xchiq'uic scotol ti bu to ox oy ti pojobbaile. Jech ti soldadoetique batem xa xch'ulelic ta xi'el.”

³³ Yu'un ti Ajvalil ti scotol xu' yu'une, ti ja' Dios yu'un ti Israele, xi ta xale: “Ti jteclum Babiloniae, co'ol s'elan jun majobil trigo ti ta xich' tec'olanel ti c'alal ja' o yorail ti ta xich' majel ti trigoe. Nax to ti mu xc'ot yorail ti ta xich' tsobel ti ts'unobile.”

^34-35 Xi ta xal ti Jerusalene, ti ja' ono'ox ti jteclum Sione: “Ti Nabucodonosor ajvalil yu'un ti jteclum Babiloniae, laj sesintaun, laj sbalun ta ti'el, co'ol to s'elan jun sets'un ti xocol laj yictaun comele, co'ol s'elan jun jti'oval chanul nab laj sbic'un batel. Laj snojes sba xchi'uc ti c'usi lec laj ya'i smuil ti oy ta jtojole. Ti scomelal une, laj sjip batel. Ac'o stoj ya'i ti jteclum Babilonia ti jech ech'em laj yilbajinune. Ac'o stoj ya'i ti caldeoetic ti jech laj smilbeicun ti jvinquileltaque.”

Ti Israele ta xpatbat yo'nton ti oy c'usi ta xc'ot ta pasele

³⁶ Ti Diose xi ta xale: “Ta jtic' jba ta apojel ta achapanel. Vu'un ta jpacbe sutel ti avajcontrae. Yu'un ta j'ech'el taquin ta xcom cu'un ti uc'umetique, xchi'uc ti sat vo'etic ti oy ta jteclum Babiloniae.

³⁷ Ta xc'ot ta pasel cu'un ti c'ajomal stuc xch'uch'ulil busul ta xcome. Ta xnaquiic liquel ti jti'oval chonetique. Mu xa stac' ti oy buch'u xu' ta xlic naquiicuc teye. Scotol ta xc'ot ta pasel ta stojol, c'ajomal xa no'ox ta xbat xch'ulelic ta xi'el yu'un.

³⁸ Yu'un scotolic xloquet no'ox liquel snuq'uic ta avanel jech c'u cha'al ti leone, ti x'i'te i'te no'ox liquel jech c'u cha'al ti ch'in leónetique.

³⁹ C'alal xchic'chun ta j'ech'el ti c'ac'ale, oy c'usi ta xcac'be yuch'ic, ja' ti uch'bolal ti ta xyacub xchi'uquique, ti ta xbat ti xch'ulel xchi'uquique. Ja' yu'un un, sbatel osil ta xbat xch'ulel ta vayel, ti mu ja'uc xa ta xjulave. Ti vu'un Diosune, mu me lo'iluc no'ox ta xcal.

⁴⁰ Ts'acal to un, ta xquic' batel ta smilobil jech c'u cha'al ta xich' iq'uel batel ta smilobil ti ch'in chije, ti tentsune, xchi'uc ti chije.

Ta xc'ot ta tsutsel ti jteclum Babiloniae

⁴¹ “Ti jteclum Babilonia ti puquem sc'oplal ta scotol ti banomile, laj yich' u'ninel, yu'un och xa ta c'abal. Ta xlic xi'icuc ti muc'tiquil jteclumetic ti c'alal ta xilique.

⁴² Yu'un ti jteclum Babiloniae, mut'iat xa ta nab. Yu'un volat ochel ti jech natic no'ox xva'i xcoti ti nabe.

⁴³ Ti jteclumetic yu'une, c'ot ta jun chopol sts'ijlajan banomil. C'ot ta jun pochol taqui banomil ta j'ech'el, ti mu ja'uc junuc oy buch'u ta xnaqui teye, ti mu ja'uc junuc oy buch'u xu' ta xjelav teye.

⁴⁴ “Ta jtsits ti dios Bel ta jteclum Babiloniae. Ta xeta cu'un loq'uel ti c'usi sbic'oj xa ox yalele. Mu xa ta xtal snaban sbaic ta stojol ti muc'tiquil jteclume. Yal xa ta lum ti moquetic yu'un ti jteclum Babiloniae.

⁴⁵ Jteclumal, loc'anic talel teye. Ac'o xa spoj sba ta jujun tal ti buch'u xu' yu'une ta scoj ti tilem xa ti sc'ac'al co'ntone.

⁴⁶ Mu stsic' avo'ntonic, mu xaxi'ic yu'un ti xvochvun no'ox ti lo'il a'yej ta jteclume. Yu'un scojol-cojol o ti lo'il a'yej ta x'ech' ti jujun jabil ta jteclume. Yu'un oy slo'il ya'yejal ti ta xlic yich' ilbajinel ti jteclume. Yu'un oy slo'il ya'yejal ti ta stsac sbaic ta leto ti ajvaliletique.

⁴⁷ Ja' yu'un un cha'e, ta xc'ot sc'ac'alil ti ta jtsits ti loc'obbailetic ti oy ta jteclum Babiloniae. Yu'un scotol ti jteclume nijil chimil ta xcom ta q'uexlal apun, ti lamal no'ox ta xcom ti animaetique.

⁴⁸ Ti vinajele, ti banomile, xchi'uc scotol ti c'usitic oye, xlaet xa ta xa'iic ti c'alal ta xtub sc'oplal ti jteclum Babiloniae. Ta xlic talel yajval ta stuq'uil yolon ti yolon xocon sloq'ueb c'ac'ale. Ti vu'un Diosune, mu me lo'iluc no'ox ta xcal.

⁴⁹ Melel, ta xtub sc'oplal ti jteclum Babiloniae, ja' ta scoj ti laj smil ti jteclum Israele, xchi'uc xtoc ti laj smilan ti jnaclejetic ti oy ta sbejel banomile.”

Oy c'usi ta xich'ic albel ti judíoetic ti nacalic ta jteclum Babiloniae

⁵⁰ Ti cuch to avu'unic spojel abaic c'alal xyaquet ti milbaile, mu me xapajes abaic ti yacaloxuc ta jatvile. C'alal nom xa oyoxuque, vuleso ta avo'ntonic ti Diose, t'abbo ta avo'ntonic ti jteclum Jerusalene.

⁵¹ Yu'un xachi ta xavalique: “Q'uexlal laj ca'itic ti c'alal c'ot ta jchiquintic ti chopol ta xc'opojic ta jtojoltique. Laj jnac' jsat quelovtic yu'un ti jech q'uexlalotique, yu'un jyanlumetic ochic talel ta jtojoltic ti bu xa c'alal oy ti xch'ul banomil yu'un ti ch'ulnae.”

⁵² Ja' no'ox un, xi ta xal ta jamal ti Diose: “Ta xc'ot sc'ac'alil ti ta jtsits ti loc'obbailetic ti oy ta jteclum Babiloniae. Ta scotol ti jteclumetic yu'une, x'ijlajetic ta oq'uel ti buch'utic yayijemique.

⁵³ Ac'o mi ta xmuy ya'i c'alal to vinajel ti jteclum Babilonia yo' tey ta sva'an ti spojobbaile, ti bu taje, ta jtac batel ti scontrataque yo' ta stsutsesatic. Ti vu'un Diosune, mu lo'iluc no'ox ta xcal.”

J'ech'el ta xtub ma' ti Babiloniae

⁵⁴ Ta jteclum to Babilonia, ta xlic talel ti oy buch'u x'avet xa xchi'uc ti yipal xc'uxule. Ta steclumal to caldeoetic, oy c'usi tsots xvo'o'et ti ta xvule.

⁵⁵ Ti Diose ta xa stsutses ta lilinel ti jteclum Babiloniae. Ta xc'ot xa ta tsutsel yu'un ti yan sba xvochvun to ox ta j'ech'ele. Yu'un co'ol s'elan nab ti natic xa xva'i xcotie, xvo'o'et no'ox snuq'uic ta xtal ti scontraique, ti xvochochet no'ox ti lamal ta xvul ta sbaique.

⁵⁶ Yu'un talic ta stsutsesel ti jteclum Babiloniae. Laj xa stsaquic ti yaj'ac'-letotaque. Laj xa slilinbeic ti syolobique. Ti Ajvalile, ja' jun Dios ti ta jujun ta xac'be stoj ti c'u s'elan loc' ta sa'el yu'unique.

⁵⁷ Yu'un ti Ajvalil ti ja' Dios ti scotol xu' yu'une, xi jamal ta xale: “Ta xcac' yacubuc ti banquilaletic yu'un ti jteclum Babiloniae. Yu'un ti bijil viniquetic yu'une, ti ajvaliletic yu'une, ti yaj'opisialtaque, ti yajsoldadotaque, sbatel osil ta xbat xch'ulelic ta vayel, mi ja'uc xa ta xjulavic.

⁵⁸ Ti vu'un Ajvalilun ti scotol xu' cu'une, xi ta xcale: Ti jech jamal ta j'ech'el spac'benal smoc ti jteclum Babiloniae, ta xc'ot ta pasel cu'un ti ta j'ech'el ta xich' lilinele. Ti jech pechajtic sjamlej ti ti'nae, ta xtic'bat sc'ac'al. Ta jbel sc'oplal, jeche' no'ox ech' svocolic ta abtel ti muc'tiquil jteclumetique. Yu'un busul ta xlaj ta c'oc' ti yabtelic ti laj xpich' ti yoc sc'ob xchi'uquique.”

Ti slo'il ya'yej ti Jeremiase, ich'bil ta xbat ta jteclum Babilonia

⁵⁹ Ti ta xchanibal jabil yochel ta ajvalil yu'un jteclum Judá ti Sedequiase, jech ti j'alc'op Jeremiase oy c'usi laj sc'ubanbe ti Seraías ti ja' xnich'on ti Neriase smom xtoc ti Maaseiase. Ti Seraiase ta xchi'in batel ti ajvalil Sedequías ti ta xbat ta jteclum Babiloniae, yu'un ja' c'otem jech c'u cha'al junuc jbainej vayebal ti bu ta xc'ot ti ajvalile.

⁶⁰ Ti Jeremiase sts'ibaoj xa ox jpoc vun ta yalbel sc'oplal ti ta xc'ot ta pasel ti cuxul j'ilbajinvanej vocol ti ta xvul ta stojol ti jteclum Babiloniae. Scotol taje, naca sc'oplal Babilonia ts'ibabil yu'un ma' ti xcaltique.

⁶¹ Va'i un, xi laj yalbe ya'i ti Seraiase: “C'alal mi lac'ot ta jteclum Babiloniae, bijan me ta yavtael scotol ti lo'il a'yeje.

⁶² Mi laj une, xi xlic avale: ‘Dios, ti vo'ote laj xa aval ti ta xatsutses ti jteclum li'e, ti ta xc'ot ta pasel avu'un ti mu ja'uc junuc jnacleje, mi ja'uc junuc chon bolometic ti xu' ta xnaquiic li'e. Yu'un ta xajoybin ta jun sts'ijlajan banomil sbatel osil.’

⁶³ C'alal mi laj avo'nton ta yavtael ti lo'il a'yej ti ts'ibabil ta jpoc vune, chucbo jbejuc ton, jipo ochel ta uc'um Eufrates.

⁶⁴ Va'i xtoc un, xi xlic aval une: ‘Jech c'u cha'al ta xmut'ij yalel le'e, ja' jech ta sac ch'ay sc'oplal ti jteclum Babiloniae. Mi ja'uc xa xu' ta xlic stam sba ti c'alal ta xlic ac'batuc svocol yu'un ti Diose.’ ” Li' c'ot ta tsutsel slo'il ya'yej ti Jeremiase.