Jeremías 50 - Bible in Tzotzil de Chamula

Ta xtub sc'oplal ma' ti muc' ta lum Babiloniae

¹ Sc'oplal ti Babilonia muc' ta lum yu'un ti caldeoetique, xi s'elan caj'ac'bat sna' yu'un Dios ti j'alc'op Jeremiase:

² “Alic jech li'e, vinajesic ta stojol ti muc'tiquil lumetique. Tsots xava'an abaic ta yalel, mu xamuc mi jutebuc. Xi xavalique: ‘U'ninat xa ma' ti lum Babiloniae. C'ot xa ta j'ac'-lo'il-maxil ma' ti dios Bele. Batem xa xch'ulel yu'un xi'el ti dios Marduque. Ti loc'obbaile, ti nopbilal diosetic yu'unique, bise xa ta cotol chaval, batem xch'ulelic yu'un ti xi'el eque.’

³ Yu'un jun muc' ta lum xvolet talel ta stsaquel ta leto ti ta xlic talel ta yolon ti yolon xocon sloq'ueb c'ac'ale. Stuc sts'ijlajan ta xictaic comel ti muc' ta lume. J'ech'el mu'yuc buch'u xnaqui liquel un, mi ja'uc ti chon bolometic eque. Scotol ta stambeic loq'uel jatobal ma' ti bu taje.”

Ta sutic ti israeletique

⁴ Ti Diose xi ta xale: “Ti jech yorail taje, x'oc' x'avanic xa ta xtal sa'icun ti Ajvalilun ti Diosun yu'unic ti buch'u liquelic ta Israele, xchi'uc ti ta Judae.

⁵ Utsuc xa sjaq'uic bu xbat sbelel ti Sione. Ta stamic ech'el un, ti xi xa ta xalique: ‘Batic bu oy ti Diose. Cac' quetic ta j'ech'el ti jvol jbatic ta stojol ti mu j'ech'eluc xisch'ayotic ta yo'ntone.’

⁶ “Ti jteclumale, co'ol s'elan ch'ayel chijetic, ti yan o bu ic'bil batel yu'un ti jq'uel-chijetique, ti mu'yuc xa ta venta bu xch'ayic batel ta te'tique. Xloc' x'ochic no'ox batel ta lametel ta te'tic ti mu xa sna' bu com ti scorralique.

⁷ C'alal ileic yu'un ti scontraique, baleic ta ti'el ti xi albatic yu'une: ‘Ma'uc jmultic, yu'un laj sa' smulic ta stojol ti Diose, ja' ti mu'yuc c'usi sna' xchi'uquique, spatobil yo'ntonic laj ech'uc ti stot sme'ic ta vo'nee.’

⁸ “Jatavanic loq'uel ta Babilonia steclumalic ti caldeoetique. Ic'vananic loq'uel ta jbani' ta sbeiltasel ti chije.

⁹ Ta xcac' taluc jvoc' tsatsal viniquetic ta xliquic talel ta lumetic ta yolon ti yolon xocon sloq'ueb c'ac'ale, ti jun no'ox yorail ta svolic ta stsaquel ta leto ti lum Babiloniae. Chapalic lec ma' ti bu taje, ta xu'ninic un. Banquilal jletovajeletic, bu ta sbijil sati ech'el xchi'uc ti syolobe, mu stselbuj.

¹⁰ Ti c'usitic oy yu'unic ti caldeoetique, ta xpojbatic batel, ta spojic batel ja' to ti c'uxi mu xa xu' yu'unic ta xcuchel batele. Ti vu'un Diosune, mu lo'iluc no'ox ta xcal.

Ts'ij xi liquel sc'oplal ma' ti Babiloniae

¹¹ “Ti c'usitic oy yu'un ti jteclumal ti laj atsacbeique, caldeoetic, muyubajanic, tse'inanic xchi'uc ta j'ech'el un. Bitetanic ta anil jech c'u cha'al ta spas ti tsebal me' vacax ta yaxaltique. Ij'unanic xa jech c'u cha'al junuc ca'.

¹² Ja'uc ti avosilale, ti alumal bu lavoq'ue, nijil chimil ta q'uexlal ta apun. Ti avosilale, stuc xa no'ox jun muc' ta lum sicotan ta xcom.

¹³ Capem ma' ti jol ta j'ech'ele, mi junuc jnaclejetic ta jcomtsan. Ta j'ech'el ta xc'ot ta sbajtical banomil. Ch'ayal ta xc'ot yo'ntonic yu'un xi'el scotol ti buch'u ta x'ech'ic ti c'alal ta xilic ti tsots tsitsel laj stae.

¹⁴ “J'ac'-yolobetic, sa'o avavilic, joyobtaic ti muc' ta lum Babiloniae. ¡Scotol ti ayolobique, xach'beic ya'i ta stojol, yu'un laj sa' smul ta jtojol ti vu'un Diosune!

¹⁵ Avananic ta sliquesel ti leto ta jujujote. Ti Babiloniae ya'binoj xa no'ox sba ta x'och ta c'abal. Laj lomuc xa yalel ti toyol luchlebaletique. Laj jinuc xa yalel ti moquetique. Xi ma' ti spacobil sutel cu'une: ac'beic ya'i ec un. ¡Pasbeic ya'i jech c'u cha'al laj spasique!

¹⁶ Mi junuc xavictaic comel ta Babilonia ti oy buch'u ta sts'unubaje, mi ja' ta stsobel ti ts'unubale. Ti c'alal xyaquet ti jtsutsesvanej leto ta stojolique, ti jyanlumetique jatvil xa ta xloq'uic batel c'alal yosilal stuquic ti oy ta slumalique.

Ti Israele ta sutic ech'el

¹⁷ “Ti Israele, jech c'u cha'al jun ch'ayemal chij, nutsbil yu'un ti jti'oval leone. Ba'yel lajic ta ti'el yu'un ti ajvalil ta Asiriae. Ts'acal to un, ti'eic, nulbatic sbaquilic yu'un ti Nabucodonosor ajvalil ta Babiloniae.

¹⁸ Jech o xal ti Ajvalilun ti scotol xu' cu'une, Diosun yu'un ti Israele, xichi ta xcale: Ta jtsits ya'i ti ajvalil ta Babilonia xchi'uc ti steclumale, jech c'u ch'al laj jtsits ti ajvalil ta Asiriae.

¹⁹ Ta sut batel ta slumalic cu'un ti israeletique, co'ol s'elan junuc chij pulem ta staic ti sve'elic ta vits Carmeloe, ta Basane, xchi'uc ta vitstic ti oy ta yosilal ti Efraine, xchi'uc ta Galaade.

²⁰ Ti vu'un Diosune xi ta jva'an jbae: Ti jech yorail taje, ti Israele xchi'uc ti Judae, ch'abal xa ti smul scolo'ic ta xa'iique. Ta jch'aybe smul scolo' ti c'u to yepal cuxul ta xcome.

J'ech'el tsalbil ta xc'ot ma' ti Babiloniae

²¹ “Tsaquic ta leto ya'i ti oyic ta yosilal Merataime, xchi'uc ti jnaclejetic ta Pecode. Nutsic, tsutsesic ta j'ech'el ya'iic, ja' to ti c'uxi mu junuc ta xcome. C'otuc ta pasel avu'un scotol ti c'u s'elan laj cale. Vu'un laj cal mantal ti Diosune.”

²² Xvinaj xa xc'ulet ti letovajel ta jteclum ta slilinel scotol une.

²³ Ti Babiloniae, co'ol s'elan junuc martillo xc'uxul laj yac' c'alal laj spas ta mantal ti jnaclejetic ti oy ta scotol banomile. Tana le'e, lom xa un. Yu'un stuc xa xch'uch'ulil busul. Mu xnel ta xa'i xi'elal ti muc'tiquil lumetic c'alal ta xilic oy c'usi chopol c'ot ta stojol ti Babiloniae.

²⁴ Ti vo'ote, jteclum Babilonia, laj avac' apets'al atuc, ja' to laj ava'i ti tsacbil lac'ot yu'une. Chucbil, lapal lacom un, yu'un tsots laj atsac ta c'op ti Diose.

²⁵ Ti Diose laj sjam ti bu q'uejbil ti abtejebaletic yu'une, ja' c'ot ta abtejebal yu'un ti laj sliques ti sc'ac'al yo'ntone. Ti Dios ti scotol xu' yu'une, yacal ta spasel ti ta xc'ot ta stojol ti muc' ta lum yu'un ti caldeoetique.

²⁶ Joyobtaic ta stsaquel ta leto ya'i. Jambeic bu nac'al ti sve'elique. Volic ta stsobel ti jnaclejetique, tubic sc'oplal ya'i. Mi junuc cuxul ta xcom.

²⁷ Iq'uic batel ya'i scotol ti yajsoldadotac ti bu ta xamilique. Mu xa cha'bel un. C'ot xa yorail yu'unic un laj staic ti tsitsele.

²⁸ (Ti jnaclejetic ti cuch to loq'uel yu'unic jatobal ta Babiloniae, c'otic ta Sión, slo'iltaic xa ti ac'bat xa stojic yu'un Ajvalil Dios cu'untic ti c'u s'elan laj spas ti babiloniaetic ta stojol ti ch'ulnae.)

²⁹ “Iq'uic talel scotol ti j'ac'-yolobetique yo' ta stsaquic ta leto ti Babiloniae. Joyobtaic ti muc' ta lume yo' mu junuc xjatav batel. ¡Ac'beic stoj ti c'u s'elan loc' ta sa'el yu'unique! Jech xapasbeic jech c'u cha'al laj spasique. Yu'un mu ts'icbaj ye sti'ic ta jtojol ti Ajvalilun ch'ul Diosun yu'un ti Israele.

³⁰ Scotol ti j'ac'-letoetique, ti jva'lej viniquetique, buyuc no'ox ta xchamic ta calleetic ti jech c'ac'al taje. Ti vu'un Diosune, mu lo'iluc no'ox ta xcal.”

³¹ Ti Ajvalil ti scotol xu' yu'une xi ta xale: “Muc' ta lum ti mu xa'ac'van ta ventae, ta jva'an jba ta scontrainelot. C'ot c'ac'al ora avu'un ti ta jtsitsot ava'ie.

³² Muc' ta lum ti mu xa'ac'van ta ventae, ta xalom ta lum ta sbosiel ti avoque. Mi junuc oy buch'u ta stic' sba ta stoyelot liquel. Ta jtilesbe sc'ac'al scotol ma' ti jteclum avu'une. C'oc' xa'i stsutsic o scotol ti c'u yepal joyol ta apat ta axocone.”

³³ Ti Ajvalil ti scotol xu' yu'une xi ta xale: “Ti jteclum Israele xchi'uc ti jteclum Judae, yacal ta xa'ibeic yipal ti vocol yu'un ti ilbajinele. Ochemic xa ta c'abal, mi ja'uc xa xcoltaatic yu'un ti yajcontraique.

³⁴ Ti jpojvanej yu'unique, jelavem xu' yu'un ec. Ajvalil scotol xu yu'un xi sc'oplal. Ta sbain stuc c'u s'elan ta stic' sba ta pojvanej. Mu vocoluc ti slamajes c'op ta stojol ti muc' ta lume, ti ta xbat xch'ulel ta xi'el yu'un ti jnaclejetic ta Babiloniae.”

³⁵ Ti Diose xi ta xale: “Leto xna'un yu'un ti Babiloniae, xchi'uc ti jnaclejetic yu'une. Mu yanuc ta xich' ec un ti banquilaletique, xchi'uc ti jamal sba satique.

³⁶ Leto xna'un yu'un ti yajt'unvanejtaque: joviemuc ti banomil xa'iique.

³⁷ Leto xa'iic ti yajsoldadotaque: lajemicuc xa'iic yu'un ti xi'ele. Leto xa'iic ti sca'taque, xchi'uc ti carretaetic yu'une. Leto xa'iic ti yajtojbolal soldadotaque: joybijuc ta jme' xi'el ants. Sliquebuc leto ti sc'ulejalique: batuc ta elc'anel ya'iic.

³⁸ Soquemuc ya'i ti uc'umetic yu'une: uluc ta taquijel ti yoque. Yu'un ti Babiloniae, ja' jun muc' ta lum ti noj ta jun pucujil loc'obbailetique, ja' ta scoj ti c'ot ta ch'ayel ti snopobil yu'une.

³⁹ “Jech o xal ti ta Babilonia une, ta xc'ot ta snail vetetic xchi'uc ta snail oq'uiletic. Ta xc'ot ta snail j'anilajel-mutetic. Laj to ta alel ma' ti oy buch'u ta xnaqui liquele.

⁴⁰ Jech ta xc'ot ta stojol jech c'u cha'al ti jteclum Sodomae xchi'uc ti Gomorrae, jech c'u cha'al ti lumetic joyol ta spat ta xocone, c'alal laj yich' tubbel sc'oplale. Mi junuc oy buch'u naqui un. Mi ja'uc oy buch'u ta x'ech'. Ti vu'un Diosune, mu lo'iluc no'ox ta xcal.

⁴¹ “Ta namal banomil ta stuq'uil yolon ti yolon xocon sloq'ueb c'ac'ale, tsatsal muc' ta lum xa'i sba, yepal no'ox ajvaliletic yu'un xchapanoj xa sbaic ta talel.

⁴² Chijilic no'ox xchi'uc ti syolobe, ti slanzae. Jun spucujilic ta j'ech'el, mu'yuc xc'uxul yo'ntonic. Co'ol s'elan yech'omal syuc'benal nab ma' ti yech'omal snuq'uique. Naca cajajtic ta ca' ta xtal. Chapalic lec ta ac'-leto ta stojol ti Babiloniae.

⁴³ C'alal ta xa'ibe sc'oplal ti ajvalil ta Babiloniae, toj alubel ta xc'ot ta xi'el yu'un un. Lajem xa ta xa'i yu'un xc'uxul ti vocol jech c'u cha'al ta svoq'ues yol ti antse.

⁴⁴ “Nax to ti xibitet loq'uel jech c'u cha'al jcot león ti ta xloc' talel ta pujtic yu'un ti uc'um Jordane, Xivelet batel ta anil ta pulem yaxaltic, ti xbit no'ox loq'uel ta jatobal cu'un ti babiloniaetique. Ta xcac' ochuc ta pas mantal ti buch'u ta jc'an ta jt'uje. ¿Mi oy la buch'u xu' ta sco'oltasicun ya'iic xchi'uc? ¿Mi oy la bu mu xu' cu'un spaquel jc'oplal ti yaloje? ¿Mi oy la junuc jq'uel-chij xu' ta xismac ta bee?

⁴⁵ Ti vu'un Diosune, a'yio ava'iic xi s'elan chapal cu'un ta scontrainel ti Babiloniae. Mu yanuc ti c'u s'elan nopbil sc'oplal cu'un ta scontrainel ti caldeoetique: Ti uni bic'tal chije, ta xiq'uic batel. Ta soquesbatic ti yaxaltic bu xlamet ta sta ti sve'elique.

⁴⁶ Xvo'o'et no'ox ta j'ech'el c'alal ta xyal ta lum ti Babiloniae. Ta xnic yu'un ti banomile. Ta xa'i yan muc'tiquil lumetic ti x'avet no'ox ta j'ech'ele.”