Jeremías 48 - Bible in Tzotzil de Chamula

Ta xcaj'ale ti oy c'usi ta xc'ot ta stojol ti Moabe

¹ Ti Ajvalil ti scotol xu' yu'une, Dios yu'un ti Israele, xi ta xalbe sc'oplal ti Moabe: “Uts' aba, uni jteclum Nebo, lilijem lacom ta j'ech'el un. U'ninbil xa ma' ti Quiriataime, c'ot ta j'ac'-lo'il-maxil. Busul xa ta lumtic ma' ti nac'obbail yu'une.

² Nom to c'ot yutsilal ma' ti Moab une. Ti yajcontratac Moab ti oyic ta jteclum Hesbone, snopilanic xa ti tubuc sc'oplal Moab ti jech muc' ta lume. Ta xch'ay ac'oplal ec un, Madmén, q'uelel ta atojol ma' ti leto une.

³ Ta Horonaim jteclum to, xvinaj ti xi ta x'avanique: ‘Busul xa ta lumtic, tubem xa sc'oplal ma' le'e.’

⁴ “Stuc xa xch'uch'ulil busul ma' ti Moabe; x'avlajetic yu'un ti yipal xc'uxul ti c'ot c'alal to ta Zoare.

⁵ Xmal no'ox ya'lel satic ti xvoletic batel ta muyebal ta svitsal Luhite. X'avlajetic no'ox yu'un svocolic ti mu stac' alel c'usi c'ot ta stojolic ti buch'u ta xyalic batel ta Horinaime.

⁶ Jatavanic, spojuc sba ti buch'u xu' yu'une. Batuc ta sbajtical banomil jech c'u cha'al junuc ch'ix.

⁷ “Moab, apatoj avo'nton yu'un ti oy yipal avu'une, ti oy ac'ulejale, le' une, mu q'uelbiluc ta xacom un. Ti adios Quemose, sbajtical banomil sq'ueloj batel un, jmoj xchi'uc ti yajpaletaque, ti buch'u ich'bil ye sti'ique.

⁸ Ta xc'ot ta jteclumetic ti ilbajinele, mi junuc ta xcol un. Ti oy ta stenlejale, ti ta stselej vitstique, lilijem ta xcom. Mu lo'iluc no'ox ta xcal ma' ti Ajvalilun une.

⁹ Caj va'anbeic jbejuc ton ti Moabe, j'ech'el ta stsutsesat. Lilijem ta xcom ti steclumale, mi junuc ti jnaclejetic une.”

¹⁰ (Bisbil ta cotol chaval ta xc'ot ti buch'u mu xmuyubaj ta spasel ti c'usi ac'bat sbain yu'un ti Diose. Bisbil ta cotol chaval ta xc'ot ti buch'u mu stsac ta stunesel ti yabtejebe.)

¹¹ Jun yo'nton nacal ma' ti Moabe. Mu'yuc yiloj ma' ti beq'uel loq'uele. Co'ol s'elan junuc vino ta sts'ab sba yalel ti smats'ile, ti mu xjele-xjele no'ox ti yavil bu ch'amale. Jech o xal un, mu soc ti smuile, ti yutsilale.

¹² Le' une, xi ta x'albat yu'un Dios ti mu stselbuj sc'oplale: “Ta sta sc'ac'alil ta jtac talel jnaclejetic ta sjelbel yavil ti vino une, voq'uic xi ti yavil ti bu xocol come.

¹³ Ta xlic yil ma' ti muc' ta lum Moab une, ti laj ta lo'lael yu'un ti sdios Quemose, jech c'u cha'al laj ta lo'lael Israel yu'un ti dios Betel ti spatoj yo'nton ta stojole.

¹⁴ “Ch'ab xi'uc ti xi ta xalbe sba ti Moabe: ‘Ali vo'otic une, tsots xca'i jbatic, banquilal jpas-letootic un quere.’

¹⁵ Ta xvul xa ta loq'uel ma' ti jlilinvanej yu'un ti Moabe xchi'uc ti jteclumetic yu'une. Ti c'u to ox yutsil ta squeremale, ts'ij xi sc'oplal un. Ja' ta xal ma' ti Ajvalil ti albil sc'oplal Dios ti scotol xu' yu'une.

¹⁶ Ta xa xvul ta loq'uel ma' ti c'usi q'uelel ta stojol ti Moabe. Ta xa xvul ta loq'uel ma' ti svocol une.

¹⁷ Ti nopol no'ox xavilic ti Moabe, xchi'uc ti buch'utic xojtiquinic ti sc'oplale, oc'anic ta sventa, ti xi xavalbe ya'iique: ‘Q'uelo avil q'ue s'elan com ti bu chotol ta ventainvaneje ti jelavem to ox yutsile, ti tsots xa'i sba ta j'ech'ele.’

¹⁸ “Jteclum Dibón, yalan talel ti chotolot ta avich'obil ta muq'ue. Ta lec no'ox, chotlan ta taquin banomil, yu'un ti jtsutsesvanej Moabe xvoletic xa talel ta atojol ta slilinel ti anac'obbailtaque.

¹⁹ Jteclum Areor, va'lan ta xocon ti'be, q'uelo avil batel. Jac'bo ava'i un ti buch'u cuxul to comic c'usi ti c'ot ta pasele.

²⁰ Ti Moabe, aq'ue xa ta q'uexlal, batem xa xch'ulel ta xi'el. Oc'anic yu'un ti mu x'ech' xc'uxul ti svocol laj stae. Caj'alic ech'el sc'oplal ta uc'um Arnon, ti laj xa yich' lilinel ti Moabe.”

^21-24 Vul ti tsitsel ti loq'uem ta alel ta stojol ti jteclumetic ti xi s'elan oy ta stselej vitse: ti Holone, ti Jahase, ti Mefáate, ti Dibone, ti Neboe, ti Bet-diblataime, ti Quiriataime, ti Bet-gamule, ti Bet-meone, ti Queriote, ti Borsae, xchi'uc scotol ti jteclumetic yu'un ti Moabe, ti nom to oye, xchi'uc ti nopol no'ox oye.

²⁵ Xi ta sva'an sba ta yalel ma' ti Diose: “Laj xa yip ma' ti Moab une. Lilij xa ma' ti smuc'ul stsatsal une.”

²⁶ Yacubtasic ya'i ti Moabe. Laj xa stoy sba ta stojol ti Diose. Valc'uj sutbijuc xa liquel ta xenel ti Moabe, ti na'leatuc yu'un scotolique.

²⁷ Moab, ¿mi mu lajuc ana'le ti Israele, ti xbet'bun no'ox ave scotol c'ac'al ta stojol ti abisoj ta jun j'eleq'ue?

²⁸ Jnaclejetic ta jteclumetic yu'un Moab, ic'taic comel ti alumalique. Ba naclanic ta lican ch'enetic jech c'u cha'al junuc paloma ti ta xac' stasic ta toyol ti' nail ch'ene.

²⁹ Yu'un ti Moabe, xcojtiquincutic xi s'elan mu albajuc ti stoyobbaile: ti yan sq'ueloj ti c'usi ta xalilane, ti tu'ul no'ox sni' xa'i sbae, ti yo'nton sna' ti cajal xa'i sbae.

³⁰ Jech ec ti Diose xojtiquin ti mu jutebuc x'ac'van ta ventae, ti xtojob lec xyacvan xchi'uc ti sc'ope, ti xvinaj ta sat ti yo'ntonuc ti'vanuc ya'ie.

³¹ Jech o xal un, ta xcoq'uita jba, ta xcat co'nton yu'un scotol steclumal ti Moabe, xchi'uc ti yajval lumetic ta Kir-harese.

³² X'ech' to ta xlic oc'cun avu'un, sts'unub uva Sibma, mu sta ta xi'oc' yu'un ti Jazere. Ti ac'ob-c'obtaque limil jelavel ta jot nab, ti c'ot c'alal to Jazere. Ti uva ta xatsob avaloje, c'ot xa ta soquel ta j'ech'el.

³³ Ch'ab xi liquel ti vochetel ta muyubajel ta yav ts'unubaltic yu'un ti Moabe. Jeche' xa xocajtic ti yaviltac vinoe. Nom c'ot ti st'usic no'ox ta teq'uel ta spits'el ti uvae. Ch'ab xi liquel ti muyubajel ta q'uejimole.

³⁴ Ta x'avanic ta j'ech'el yu'un yipal ti mu ts'icbaj ta xa'iic ti jnaclejetic ta Hesbone. Ti yech'omal snuq'uique xvinaj to batel c'alal to Elalé xchi'uc ti ta Jahase, ti ta Zoare, c'ot c'alal to Horonaim xchi'uc ta Eglat-selisiyae. Ul xa ti sat vo' ti ta xtuc ta Nimrime.

³⁵ Ti Diose xi ta sva'an sba ta yalele: “Ta jtubbe sts'unubal ti jnaclejetic ta Moab ti batem yo'ntonic ta yac'bel milbil matanal xchi'uc chic'bil pom ti diosetic yu'unic ta jujun c'opojebaletic ti oy ta stselejtique.

³⁶ “Ti co'nton ta stojol ti Moabe, ta stojol ti jnaclejetic ta Kir-harese, xme'inal oc' xa jech c'u cha'al junuc ama ti xme'inaj xa banomil xpiet ta xich' oq'uisanel ta sventa ti jlajel jtubele, yu'un ta jech yepal c'ot ta ch'ayel ti sc'ulejal laj stsob talele.

³⁷ Scotolic sloc'oj ti stsatsal sjolique. Scotolic xch'uloj ta loq'uel ti yisimique. Scotolic syayijesojic ti sc'obique. Naca lajemal c'u'il slapojic.

³⁸ “Scotol ti macob c'ac'al ta xcha'cajal naetic yu'un ti lum Moabe, ta scotol ti calleetique, naca xa oq'uel xnic ta a'yiel ta jujujot. Yu'un co'ol s'elan junuc bin mu'yuc stu laj jlilin ta voq'uel ti Moabe. Ti vu'un Ajvalilune, mu lo'iluc no'ox ta xcal.”

³⁹ Ochanic ta muc'ul at o'nton yu'un ti Moabe. Spajeb no'ox xi'el ta xac' ti q'uelel ta stojole. Joybij, cajal c'ot ta sba ti q'uexlale. C'ot ta stojol ti na'leel tubtael yu'un scotol ti slac'nataque.

⁴⁰ Ti Diose xi ta xale: “Scontra ti Moabe xlich'oj talel xic' jech c'u cha'al junuc xic ti xjipluj talel ta stojole.

⁴¹ Ti jteclumetique, ti nac'obbailetique, ta x'och ta yoc ta sc'ob ti jcontrainvaneje. Ti j'ac'-letoetic yu'un Moab ta yorail taje, jeche' xniclajetic liquel jech c'u cha'al junuc ants ti xnicnun xa liquel ta xa'ibe xi'elal xc'uxul ti yol ta svoq'uese.

⁴² Laj sc'oplal ti muc' ta lum xa'i sba ti Moabe, yu'un lic sjol ta scontrainelun ti Diosune.

⁴³ Jech o xal un, ti Ajvalilune xi ta jva'an jba ta yalele: Ti jnaclejetic ta Moabe, ta xc'ot ta pasel ti co'ol s'elan junuc chon bolom ti nutsbilic yu'un ti jnutsuviletique, ti xi'bal sba xu' ta xbaj ochel ta ch'ene, mi ta jun pets'e.

⁴⁴ Mi mu'yuc x'och ta c'abal yu'un ti jnutsuvile, ta xbaj ta xa'ab. Mi oy to c'uxi cuch yu'un loc' ta xabe, tsacbil xa ono'ox xa'i yu'un ti pets' xtoque, yu'un ta jchapanbe talel yorail ti lamal ta xc'ot ta sba stsitsel ti Moabe. Ti vu'un Diosune, mu lo'iluc no'ox ta xcal.

⁴⁵ “Oy jlomuc naca xa stamoj sbaic ta jatvil, ta xba sa' snaq'uel ta yolon squeoval yaxinal ti Hesbone. Le' une, ti Hesbón steclumal ti ajvalil Sehón une, natic no'ox ta tilel sleb. Ti c'oq'ue ta xtanij batel ta stsutsesel ti vitsetic yu'un ti Moabe, ti toyobba jteclumetic taje.

⁴⁶ Mu xa ono'ox cha'bel un, jteclum Moab. Steclumal Quemos, ch'ayemot xcaltic un. Ti avalab anich'nabe, bec'bil ta xloq'uic batel ta jteclum.

⁴⁷ “Mi laj taj une, ta jeltabe yorail ti Moabe. Ti vu'un Diosune, mu lo'iluc no'ox ta xcal.” Ti va'i s'elan taje, jech loc' sc'oplal yu'un Dios ti c'ot ta stojol ti Moabe.