Jeremías 47 - Bible in Tzotzil de Chamula

Ta xcaj'ale ti oy c'usi ta xc'ot ta stojol ti filisteoetique

¹ C'alal mu to ta svol ta stsaquel ta leto Gaza jteclum ti faraone, xi c'oponat talel yu'un Dios ti j'alc'op Jeremías ti naca sc'oplal ti filisteoetique:

² “Xichi ta xcal ti Diosune: Ta xlic talel jmut'ivanej vo' ta yolon ti yolon sloq'ueb c'ac'ale, co'ol s'elan jech c'u cha'al t'omem yoc uc'um. Ta smut'i comel ti lume xchi'uc scotol ti c'usitic x'ayan yu'une, xchi'uc scotol ti c'u yepal cuxulic ta jteclume. X'avlajetic xa liquel scotolic ti jnaclejetic ta muc' ta lume, xviquet no'ox xchi'uc xc'uxul ti buch'uuc no'oxe.

³ Ti ta xa'iic xc'ojlajet no'ox svoy ti ca'e, ti x'eblajet no'ox ti carretae, ti squits'lajet no'ox ta a'yiel scarosal ti carretae. Mu'yuc xa yipal ta xa'iic ma' ti totiletic une, ta scomtsan stuc ma' ti xnich'nabic une.

⁴ C'ot xa yorail ta stsutsesatic ti filisteoetique. C'ot xa yorail ta stsutsesbel sc'oplal ti jteclum Tiroe xchi'uc ti Sidone, ti stsacoj yipic ta xa'iic xchi'uque. Jech un, ti Diose ta stubbe sc'oplal ti filisteoetic ti nacalic ta Creta banomil joyobtabil ta nabe.

⁵ Ti jnaclejetic ta Gazae ta st'anbun ta loq'uel ti stsotsil sjolique. Uma' xa xa'i sbaic ti jnaclejetic ta Ascalone. Scomelal sts'unubal inate' viniquetic, ¿c'usi to ora ta xapajes ta syayijesel aba ti mu x'ech' ti avocol ta xava'ie?

⁶ Mu xa ono'ox cha'bel un, yespada Dios. ¿Bu to ora ta xapajes aba un? Ochan xa ta anail un, ch'an xa chan, ts'ijlan xa.

⁷ ¿C'u ono'ox la ts'ij xachi c'alal pasbilot ta mantal yu'un ti Diose, ti c'ubanbilot yu'un ti atsacuc ta leto ti Ascalone, xchi'uc scotol ti lumetic ti oy ta ti'ti' nabe?”