Jeremías 44 - Bible in Tzotzil de Chamula

Ti judíoetic ti batic ta Egiptoe, c'oponatic yu'un ti Diose

¹ Xi ta x'albat Jeremías ta sventa sc'oplal scotol ti judíoetic ti bat nacalicuc ta muc' ta lum Egiptoe, ti oy ta jteclumetic yu'un ti Migdole, ti Tefnese, ti Menfise, xchi'uc ti buch'utic oyic ta yolon ti yac'ol xocon smaleb c'ac'ale:

² “Ti Ajvalilun ti scotol xu' cu'une, Diosun yu'un ti Israele, xichi ta xcal une: ‘Laj xa avilic ta aba ta asatic ti cuxul j'ilbajinvanej vocol lamal c'ot ta sbaic ti jnaclejetic ta Jerusalene, xchi'uc ta jteclum ti oy ta yosilal Judae. Stuc xa slilijemal busul tana le' une.

³ Mu xa junuc buch'u nacal un ta scoj ti jelav ti smul scolo'ic une. Laj soquesbeicun co'nton ti nijil chimilic ta yich'el ta muc' yan diosetic ta yac'bel ti matanal pome, diosetic ti ma'uc c'otem ta sventaic ta yich'el ta muq'ue, mi ja'uc ti stot sme'ic ta vo'nee.

⁴ Laj jtaquilan talel ta atojolic ti cajtunel j'alc'optac ta yalbeloxuc ava'iic ti mu xatam ta spasel ti c'usi chopol ti mu jc'an jq'uel ta j'ech'ele.

⁵ Le' une, mi ja'uc laj avaq'uic ta venta. Mi ja'uc laj ach'unic. Mi ja'uc laj avicta abaic un. C'ajomal lic avac'beic yipal ta yac'bel matanal pom ti diosetique.

⁶ Va'i un, lic ti sc'ac'al soquemal co'nton une. Lic tiluc co'ol s'elan junuc c'oc' ta stojol ti jteclumetic oy ta Judae, xchi'uc ta calleetic yu'un ti Jerusalene. Stuc xa slilijemal sbusulil com ti jech to staoj yav sts'ijlajan tana le' une.

⁷ ‘Ti Ajvalilun ti scotol xu' cu'une, Diosun yu'un ti Israele, xichi ta xcal une: ¿C'u cha'al xcal le'e, ta xalaman ta abaic ti muc'tic vocoletic ta atojolique? ¿C'u cha'al ta xac' sjol sbaquilic avu'unic ti viniquetique, ti antsetique, ti ololetique, xchi'uc ti ololetic naca to no'ox ta xvoq'ue, ti oy ta o'ntonal mu junuc ta xcome?

⁸ ¿C'u cha'al avac'ojbeic yipal ta soquesbel co'nton yu'un ti c'usitic ta xapasic ta xavac'beic matanal pom ti diosetic li' ta lum Egipto ti bu lavulic ta nacleje? Ti jech le' une, ta xac'otic ta tsutsel yu'un. Ta xabiseic ta cotol chaval, ti nijil chimiloxuc ta q'uexlal ta sba ta satic scotol ti muc'tiquil lumetic ti oy ta sjunul banomile.

⁹ ¿Mi yu'un ch'ay xa ta avo'ntonic ti c'usitic toj chopol laj spasic ti atot ame'ic ta vo'nee, ti c'usitic toj chopol laj spasic ti ajvaliletic yu'un ti jteclum Judae, xchi'uc ti c'usitic toj chopol laj spas ti yajnilique, xchi'uc ti c'usitic chopol laj apasic xtoque, xchi'uc ti c'usitic chopol laj spas ti avajnilic ti ta yosilal ti Judae, xchi'uc ta calleetic yu'un ti jteclum Jerusalene?

¹⁰ Staoj to yav tana li' une, mu xac'an xasutes abaic. Mi ja'uc ma' ti ta xaxi'ique. Mi ja'uc xavaq'uic ta venta ti bijubtasele, xchi'uc ti oy c'usi jbel albil ti tsots sc'oplal c'otem ta aventaic cu'une, xchi'uc ti atot ame'ic ta vo'nee.

¹¹ ‘Jech o xal ti Ajvalilun ti scotol xu' cu'une, Dios yu'un ti Israele, xichi ta xcale: Jbel sc'oplal ta jtac talel vocol ta stsutsesel ti Judae.

¹² Ti buch'utic comic ta Judá ti oy ta yo'ntonic ta xbat nacliicuc ta muc' ta lum Egiptoe, ta jtsutsesbe sc'oplal ya'iic ta j'ech'el. Mi ich'bil ta muc', mi mu'yuc ich'bil ta muc, scotolic, leto xa'iic, mi vi'nal. Ta xc'otic ta j'ac'-lo'il-maxil, ti nijil chimilic ta q'uexlal yu'une, ti tsots ta xac' xi'ele.

¹³ Ta jtsits ya'iic ma' ti buch'utic ta xbat nacliicuc ta Egipto jech c'u cha'al laj jtsits ti jnaclejetic ta Jerusalén ti c'ot ta stojolic ti letoe, ti vi'nale, xchi'uc ti tsots chamele.

¹⁴ J'ech'el mu xcol ya'iic mi junuc ti c'u xa yepal com ta Judá ti bat nacliicuc ta Egiptoe. Ac'o mi snopoj to ta yo'ntonic ta xnaqui ya'iic ta Judae, mu xa sutic talel. Jun chib mi cuch to yu'un ti spojel sbaique.’ ”

¹⁵ Va'i un, ti buch'utic sna'ic ono'ox ti oy yajnilic ta xaq'uic matanal pom ta stojol ti loc'obbail diosetique, ti antsetic ti jmoj xvoletic ti bu taje, ti judíoetic ti nacalic ta yolon ti yac'ol xocon smaleb c'ac'al ta Egiptoe, ti yepal no'ox oyique, xi laj stac'beic ti Jeremiase:

¹⁶ “Laj to c'op ma' ti ta jchiquintacutic ta ya'yiel ti c'op ti albilot talel yu'un ti Diose.

¹⁷ Le'e, ta xcac'becutic yipal ta spasel ti c'usi jnopojcutique. Mu xquicta jbacutic ta yac'bel matanal pom, ta yac'bel matanal vino ti Sme' Vinajel jech c'u cha'al liquem ono'ox cu'uncutic talele, ti laj spasic talel ti jtot jme'cutic ta vo'nee, ti ajvaliletic cu'uncutique, ti banquilaletic yu'un ti Judae, jech c'u cha'al laj spasic ta scayeal ti Jerusalene. Oy no'ox ma' ti jve'el cuch'omcutic le' talel ta vo'nee. Mu'yuc quilojcutic ma' ti naca vocol no'ox ta xvul ta jtojolcutic une.

¹⁸ C'alal laj quicta jbacutic ta yac'bel matanal pom ta yac'bel matanal vino ti Sme' Vinajele, scotol mu'yuc xa c'usi x'ayan un. Ti jvinquilelcutique ta xchamic ta vi'nal, mi ta leto.”

¹⁹ Ti antsetic eque xi to laj staq'uic ech'el ti c'ope: “Ti vu'uncutique laj jmeltsancutic setequil muc'tiquil pan. Laj cac'cutic ta stojol xq'uexol ti Sme' Vinajele. Ta xcac'becutic ti matanal pome, ti vinoe, quich'ojbecutic ye sti' jmalalcutic ti va'i s'elan ta jpascutic scotol taje. Laj to c'op ma' ti xquicta jbacutic une.”

²⁰ Va'i un, ti Jeremiase xi laj yal ta stojol scotol ti viniquetique, xchi'uc ti antsetic ti va'i s'elan tac'bat talel ti c'ope:

²¹ “Scotol ti c'usitic ta xapasique, ti c'usitic laj spasic ti atot ame'ic ta vo'nee, xchi'uc ti ajvaliletic avu'unique, xchi'uc ti banquilaletic avu'unique, xchi'uc scotol ti jteclume, ti laj achic'beic pom ti loc'obbail diosetic ti oy ta jteclumetic yu'un ti Judae, xchi'uc ta calleetic ta Jerusalene, ¿mi yu'un xavac'toicuc ti mu xac' ta venta ti Diose, ti ch'ay xa ta yo'nton avalojique?

²² Le' une, mu ts'icbaj cuchbaj laj ya'i ti Dios yu'un scotol ti c'usitic chopol ta xapasique. Jech o xal ti ateclumalic ti c'ac'al tana li' une, sts'ijlajan ta j'ech'el mi junuc naclej ta xcom. Joybij ta jun j'ac'-lo'il-maxil xi'el xac' ti c'usi c'ot ta stojole.

²³ Ti vocol lamal ta atojolic tana le' une, vul ta loq'uel ta scoj ti laj avac'beic chic'bil pom ti loc'obbail diosetique. Laj ata amulic ta stojol ti Diose, yu'un mu'yuc xavaq'uic ta venta ti bijubtaseletic yu'une, xchi'uc ti oy c'usitic jbel tsots albil yu'une. Mu'yuc xc'ot ta pasel avu'unic ti smantaltaque.”

²⁴ Ti Jeremiase c'opoj ta stojol scotol jteclum ti naca sc'oplal antsetic ti xi laj yale: “Acotolic ti c'u avepalic oyoxuc ta Egipto ti ja' alumalic ti Judae, a'yio ava'iic sc'opojel ti Dios ta xal talel ta atojolique.

²⁵ Ti Ajvalil ti scotol xu' yu'une, Dios yu'un ti Israele, xi ta xale: ‘Ti vo'oxuque, antsetic, loq'uem ta aveic ati'ic ti ta xc'ot ta pasel ti c'usi nopbil avu'unic ta yabtelanele. Yu'un laj xa avac' ave ati'ic ta yac'bel pom, ta yac'bel matanal vino ti Sme' Vinajele. C'otuc ta pasel ti c'usi albil avu'unic un cha'e. Lec oy un, liquesic ta yabtelanel ti c'usi loq'uem ta aveic ta pasele.

²⁶ Ti vu'un Diosun ti jtuc no'ox jelavem ti jc'oplale, a'yio ava'iic ti li' oyoxuc ta naclej ta Egipto ti alumalic to ox ti Judae. Xi jnopoj ta jpase: Ta xlaj sc'oplal avu'unic ta yalilanel ta sjunul Egipto ma' ti oy buch'u xie: Ta jva'an ta rextico ma' ti cuxul Diose.

²⁷ Nom ta xc'ot ti lequilale. C'ajomal cac'oj talel jsat ta staquel talel ti cuxul j'ilbajinvanej vocol ta stojolique. Scotol ti c'u yepal oyic ta Egipto ti ja' slumalic ti Judae, yu'un jbel sc'oplal ta xac' sjol sbaquilic ta xlajic ta leto, mi ta vi'nal.

²⁸ Jun chib no'ox ti ta xcolic ta letoe, ti ta xloq'uic batel ta Egipto yo' ta sutic ech'el ta Judae. Ti c'u to yepal cuxul comic judíoetic ti ayic ta naclej ta Egiptoe, ta xil ta sba ta satic bu jtosucal c'op ti c'ot ta pasele, mi ja' ti c'usi laj cale, mi ja' ti c'usi laj yalique.

²⁹ Ti vu'un Diosune, oy lec senyail ta q'uelel yo' ta xach'unic ti mu stselbuj ti sibtasel ta xvul ta loq'uel cu'une, ti xi s'elan ta jtsits ya'i ti muc' ta lum li'e:

³⁰ Ti faraón Hofra ajvalil yu'un ti Egiptoe, ta x'och cu'un ta sc'ob ti cuxul jti'oval yajcontrae, jech c'u cha'al laj jpas ta stojol ti Sedequías ajvalil yu'un ti Judae, ti och cu'un ta sc'ob ti Nabucodonosor ajvalil ta Babilonia ti ja' cuxul jti'oval yajcontrae.’ ”