Jeremías 42 - Bible in Tzotzil de Chamula

Ti jteclume ta sc'anbeic Jeremías ti c'opoj ti'inuc ta sventaique

¹ Scotol ti banquilal jtsobvanejetic yu'un ti soldadoe, ti Johanán xnich'on ti Careae, ti Azarías xnich'on ti Osaiase, xchi'uc scotol ti jteclume, mi ich'bilic ta muc', mi mu'yuc ich'bilic ta muc', talic un,

² ti xi laj yalbeic ti j'alc'op Jeremiase: “Mu yauc c'uxuc xava'i ti xi s'elan ta jc'an ta xa'abolaj cu'uncutique: Vocoletan cu'uncutic ta stojol ti Ajvalil Dios avu'un ti c'u xa yepal licomcutique. Yu'un tanae, laj avil xa lec ti jun chib xa licomcutic ti c'alal mu albajuc to ox ti quepalcutique.

³ Vocoletan cu'uncutic ta stojol ti Ajvalil Dios avu'une, yo' jech ta xistojobtasuncutic ti bu xu' ta jtamcutic batele, ti c'usi ta sc'an ta jpascutique.”

⁴ Xi tac'batic yu'un ti Jeremiase: “Lec oy, ta jc'anbe vocol ta atojolic ti Ajvalil Dios avu'unique. Ti c'u s'elan ta stac'bun talele, ta xcac'boxuc lec ana'ic scotol, mi jutebuc ta jmuc.”

⁵ Va'i un, xi laj stac'beic ti Jeremiase: “Ti mi mu jpascutic ti c'usi laj sc'ubanbot ta yalbeluncutique, ja'uc rextico stuc ta scontraineluncutic ti Ajvalil Dios avu'un ti mu'yuc c'usi mucul ta stojole.

⁶ Mu'yuc ta alel mi lec, mi mu lecuc ta xca'icutic ti c'u s'elan ta xatabuncutic talel ti stac'obile, yu'un laj jva'anotcutic ta sjaq'uel jbacutic ta stojol ti Ajvalil Dios cu'untique yo' lec ta xc'ot ta jtojolcutic, j'ech'el ich'bil o ta muc' ta xc'ot cu'uncutic.”

Tac'bat talel yu'un Dios ti c'opoj ti'in ti Jeremiase

⁷ Ech' lajuneb c'ac'al un, ti Diose c'opoj talel ta stojol ti Jeremiase.

⁸ Jech ec un, laj stac ta iq'uel ti Johanán xnich'on ti Careae, xchi'uc ti banquilal jtsobvanej yu'un ti soldadoetic ti xchi'inojane, xchi'uc scotol ti jteclum ti cajal peq'uel ich'bilic ta muq'ue,

⁹ ti xi laj yalbe ya'ie: “Ti Ajvalile, Dios yu'un ti Israele, ti Buch'u ta jbain avu'unic ta xchapbel ya'i ti yatel avo'ntonic ta stojole, xi ta xale:

¹⁰ ‘Mi jbel avo'nton ta xanaquiic ava'iic ta banomil li'e, ta jva'an jba ti oy no'ox c'usi x'ayan avu'unique. Mu'yuc ta jtub ac'oplalic. Ta xcac' ch'ian c'opojanic. Mu jloq'uesoxuc batel. Ta xlic ca'i ta co'nton ti abol abaic yu'un ti j'ilbajinvanej vocol ta xvul ta atojolique.

¹¹ Mu xatsiq'ues avo'ntonic ta stojol ti ajvalil yu'un ti Babilonia ti toj ep xi'bil ta j'ech'ele. Mu xatsiq'ues avo'ntonic ta stojol, yu'un ta jtic' jba ta scoltaeloxuc ta yoc ta sc'ob. Ti vu'un Ajvalilune, mu lo'iluc no'ox ta xcal.

¹² Oy syail xc'uxul co'nton ta atojolic. Jech ec ta xcac'be sna' ti ayanuc syail xc'uxul yo'nton ta atojolic yo' ta xac' sutanic ech'el ta avosilalique.’

¹³ “Yan mi mu xac'an xacomic ta naclej li' ta muc' ta lume, ti c'ajomal no'ox ta xatoy abaic ta stojol ti ajvalil Dios avu'unic

¹⁴ ti xi ta xlic avalique: ‘Ja' xi smuc'ul ti bat naquicutic ta Egipto ti bu ch'abal letoe, ti bu mu junuc xava'i ta xbac' ti oq'uese, ti mu vi'naluc xca'i xijchamotique’,

¹⁵ ja' lec un cha'e, a'yiic ti c'u to yepal cuxul lacomic ta Judae, ti xi ta xal ti Ajvalil Dios yu'un Israel ti scotol xu' yu'une: ‘Mi jbel xa avo'ntonic xbat naclan ava'iic ta Egiptoe,

¹⁶ ti xi'emoxuc yu'un avalojic ti letoe, ti vi'nale, ach'amojic ta xc'ot ta be. Ja' xava'i xacham xalajic yu'un un.

¹⁷ Scotolic ti buch'utic juteb ta yo'nton chba nacluc ya'iic ta Egiptoe, ti letoe, ti vi'nale, muc' ta chamel xa'iic xc'otic ta lajel un. Mi junuc cuxul ta xcom. Mi ja'uc xu' ta spoj sba ti c'alal lamal ta xc'ot ta sba cu'un ti cuxul j'ilbajinvanej vocol ta jtac talel ta stojolique.’

¹⁸ “Ti Ajvalil Dios yu'un Israel ti scotol xu' yu'une, xi ta xale: ‘Ti c'u s'elan ti sc'ac'al soquemal co'nton ta scontrainel ti jnaclejetic ta Jerusalene, ja' no'ox jech ta jtiles ta atojolic ec mi ta xabat naclanic ta Egiptoe. Mu xlaj ta alel ti bisbil ta cotol chaval ti ac'oplal ti xi'el xac' ta xa'i yu'un ti yane, j'ech'el xch'ay o ta asatic ma' ti banomil unbi.’

¹⁹ “Ti c'u to yepal cuxul lacomic ta Judae, ti Diose ta xalboxuc ti ta xabatic ta Egiptoe. Na'ic ava'iic lec un, ipaluc ti laj jcaj-t'amboxuque.

²⁰ Yalel xa ta xasa' abaic ta j'ech'el unbi, yu'un atuquic loc' ta avo'ntonic ti laj avac'beicun jbain ta sjaq'ueloxuc ta stojol ti Ajvalil Dios avu'unic ti xi laj avalbeicune: ‘Vocoletan ta stojol ti Dios cu'untique. Scotol ti c'usi ta xayalbote, ac'bun jna'cutic yo' jech ta jpascutic.’

²¹ Laj xa cac' ana'ic ti c'u s'elan laj sc'ubanbun ti Ajvalil Dios ta yalbeloxuque, mu xac'an xach'unic un.

²² Ja' no'ox un, na'ic me lec, ti buyuc no'ox ta xabatic ta nacleje, jbel sc'oplal ja' xava'i xacham xalajic yu'un ti letoe, ti vi'nale, ti muc' ta chamele.”