Jeremías 4 - Bible in Tzotzil de Chamula

Bijubtasel ta scomtsanel ti c'usi mu lecuque

¹ Ti Diose xi ta xale: “Israel, mi xac'an to xasutes aba, mu yanuc bu xatam batel, tuc' xasut talel ta jtojol. Mi j'ech'el laj aten loq'uel ti j'ac'-vocol loc'obbailetic avu'une, mi mu xach'ac aba ta jtojol,

² mi naca melel, mi naca pojel xchi'uc naca slequil o'ntonal ti xava'an aba ta rextico ta jventae, va'i unbi, ta xjoybij ta xc'uxubinelic, ta slequil c'optaelic ti muc'tiquil lumetic ta jventae.”

³ Ti jnaclejetic yu'un ti Judae xchi'uc ti Jerusalene, xi ta x'albatic yu'un ti Diose: “Abtelanic ta sloquel ti banomil ti mu'yuc picbil oe. Mu xats'un ta yut ch'ixtic ti ats'unubalique.

⁴ Jnaclejetic yu'un jteclum Judá, xchi'uc jteclum Jerusalén, ich'ic ti circuncísione, ojtiquinicun ti vu'un Ajvalilune. C'otuc ta avo'ntonic senyail ti jtratee, naca me ta scojuc achopolalic ta xlic tiluc ti sc'ac'al co'nton jech c'u cha'al junuc c'oc' ta xtile, ti xvo'o'et no'ox liquel ti mu'yuc buch'u xu' ta xtub yu'une.

Ilbajinbil ta xc'ot ti Judae

⁵ Ti ta jteclum Jerusalene, xchi'uc ta Judae, oq'uisanic oq'ues ta sjunul ti muc' ta lume. Xi xavaq'uic ta na'el ti tsots ta xa'avanique: ‘La'ic un, batic ta nac'obbail jteclumetic, ba jtsob jbatic.’

⁶ Toyo batel ac'obic ta xch'utubtael ti jteclum Sione yo' ta stamic batel. Mu teyuc no'ox xach'ayetic, batanic ta nac'obbail ta anil un. Yu'un ti cuxul j'ilbajinvaneje, xchi'uc ti jtsutsesvaneje, q'uelel xa talel ta atojol cu'un ti ta xlic talel ta yolon ti yolon xocon sloq'ueb c'ac'ale.

⁷ Ti jti'oval leone loc' xa talel ta xch'en. Stamoj xa talel sbe ta stsutsesel ti muc'tiquil jteclumetique, yu'un loc' xa talel ta slumal yo' ta stsutses ti muc' ta lum avu'une, ti sts'ijlajan ta xcom yu'une, ti j'ech'el lilijem ta xcom yu'un ti jteclumetic avu'une.

⁸ Jech o xal un, lapic ti lajemal c'u'ile, oc'anic, ajetanic xchi'uc ti xc'uxule. Ti stilemal sc'ac'al yo'nton ti Diose, mu'yuc sq'uejoj sba loq'uel ta jtojoltic.”

⁹ Ti Diose xi ta xale: “C'alal ta xc'ot sc'ac'alil taje, ti ajvalile xchi'uc ti banquilaletique, xnicnunic xa liquel ta xi'el. Ti paleetique mu ech'baj ti xi'el ta xa'iique. Ti j'alc'opetique ta xbat xch'ulelic ta xi'el.”

¹⁰ Xichi laj cal une: “Mu xa ono'ox cha'bel un, Dios, yu'un laj xa alo'la ti jnaclejetic yu'un ti jteclum Jerusalene. Laj avalbe ya'i ti ta staic ta xlamaj ti c'ope. Le' une, c'ajomal no'ox q'uelel ta stojolic ti cuchilu xve' yu'un ti snuq'uique.”

¹¹ C'alal ta xc'ot xa yorail taje, xi ta xlic yich' albel ti jnaclejetic ta Jerusalene: “Ti ic' ta xlic talel ta sbajtical banomile, toj q'uixin ta jmec ti xvuch'et no'ox ta xtal ta stojol ti jteclumale. Ma'uc ti siquet no'ox yutsil ta xtun ta sventa yic'ael solepal ti trigoe.

¹² Ti ta scoj taje, tsots ta j'ech'el ta jtac talel ti iq'ue. Ta xcal ta jamal ti mu xa ono'ox xcolic ta j'ech'ele.”

Joyobtabil ta xc'ot ti Israel yu'un ti yajcontrae

¹³ Q'uelo avilic, ti jcontrainvaneje xvolet no'ox talel jech c'u cha'al junuc toc. Ti scarretaic sventa ti pasob letoe, co'ol s'elan sutub ic' ti sts'otobaj no'ox talele. Ti sca'ique xvilet no'ox talel, ja' mu sta xvil ti muc' ta xique. Mu xa ono'ox cha'bel, ja' to lijlaj un.

¹⁴ Jteclum Jerusalén, tuch'o loq'uel ta avo'nton ti c'usi chopole, ja' to jech ta xapoj aba. ¿C'usi to ora ta xajel ajol ta yictael ta snopilanel ti c'usi chopole?

¹⁵ Xi s'elan ta xvul ta loq'uel ti xi'bal sba lo'il ta xlic talel ta jteclum Dane, xchi'uc ta stselejtic yu'un ti Efraine:

¹⁶ “Caj t'abbeic ya'iic ti muc'tiquil jteclume, xchi'uc ti Jerusalene ti ta namal banomil ta xlic talel ti jcontrainvaneje, ti x'avlajetic no'ox ta stsaquel ta leto ti jteclumetic yu'un ti Judae.

¹⁷ Co'ol s'elan jchabiej osiletic, joyobtabil ta xc'ot yu'unic ti jteclum Judá ta scoj ti jelav stoyobbailic ta stojol ti Diose. Ti vu'un Diosune, mu stselbuj ti jc'ope.

¹⁸ “Ti c'u s'elan ti atalele, ti c'usi ta xapase, ja' ta scoj ti jech c'ot ta atojole. Yu'un ti c'usi chopol apasoje, ja' me yutsil ti va'i s'elan c'ot ta atojol une, ti xbiet no'ox ti avo'nton yu'une.”

Mu x'ech' ta xa'i Jeremías ti q'uelel vocol ta stojol ti slumale

¹⁹ Xibalet no'ox yu'un ti xc'uxul ta xca'ie. Xpujpun xa co'nton yu'un ti mu albajuc ti vocole. Mu xits'iji ta j'ech'el, xtal xbat xa ti co'nton yu'une. Laj ca'i yech'omal ti oq'uese, ti naca sliquesel leto x'avlajetic ta yalele.

²⁰ Xpuquet no'ox ya'yejal ta xvul ti c'u s'elan ta xlaj c'otuc ta tsutsele, ti stuc slilijemal com sjunul ti muc' ta lume. Ta jech yepal un, laj yich' lilinel ti axibaletic cu'une, ti jipbil tenbil com ti caxibalnataque.

²¹ ¿C'u to ono'ox sjalil sc'an ta xquil ti ta xc'ot ta pasel ti utsuc xa yich' toyel ti c'obale, ti ta xca'i ti ta xich' oq'uisanel ti oq'uese?

²² Xi ta xal ti Diose: “Ti jteclumale bolinebic ta j'ech'el, mu xiyojtiquinic. Alab nich'nabiletic ti mu'yuc xch'ulelique, ti mu sna'ic snopele, mi ja'uc spas yu'unic ti c'usi leque. C'ajomal ja' xojol xchi'uquic ta spasel ti c'usi chopole.”

Ti tsutsesel q'uelel talel ti laj yil ti Jeremiase

²³ Laj quil ti banomile, mu'yuc smelol, jeche' sts'ijlajan. Laj quil ti vinajele, ch'abal ti c'usi ta xac' xojobale.

²⁴ Laj quil ti xnicnun no'ox ta j'ech'el ti muc'tic vitsetique, ti xc'uyc'un no'ox ta j'ech'el scotol ti bic'tal vitsetique.

²⁵ Laj quil ti mu'yuc xa buch'u junuc oye. Jatavic ech'el scotol ti mutetique.

²⁶ Laj quil ti yav nichimetique, joybijem xa ta sbajtical banomil. Stuc slilijemal busul scotol ti jteclumetique. Scotol taje, ja' c'ot ta pasel yu'un ti mu albajuc sc'ac'al yo'nton ti Diose.

²⁷ Yu'un xi ta xal ti Diose: “Ta xjoybij ta sbajtical banomil scotol ti banomile, ja' no'ox ti mu'yuc ta jtsutsesic ta j'ech'ele.

²⁸ Ti banomile mu albajuc ta xlic ya'i ti at-o'ntone. Ti vinajele ta xlic ya'i ti me'inale. Jech laj xa cal, mi ja'uc ta jsutes jba. C'ot ta nopel cu'un, mi ja'uc ta jcha'na'.

²⁹ Ti x'avlajetic ti buch'utic cajajtic ta ca'e, xchi'uc ti j'ac'-yolobetique, scotol ti jnaclejetique xbitic no'ox loq'uel ta anil ta xbat snac' sbaic ta chuculaltic, mi mo'oje, ta xmuyic ech'el ta lican ch'entic. Tenbil jipbil ta xcom yu'unic scotol ti jteclume. Mu'yuc xa buch'u xu' ta xnaqui un.

³⁰ Ti vo'ote, jteclum, ti c'ot ta atojol ti laj xa avich' jinesele, ¿c'u cha'al alapoj ti tsajal c'u'ile? ¿C'u cha'al ti ch'alalot lec ta oroe? ¿C'u ch'al ta xabon ta ic' ti asate? Mu'yuc xa c'usi xtun o ti ta xac'upiltas abae. Yu'un ti buch'utic laj alo'labe sjole, laj xa stenot ta o'ntonal. C'ajomal xa no'ox ta sa' ti avocole.

³¹ Ta xca'i ti oy buch'u x'avet xa yu'un ti xc'uxule, ti co'ol jech c'u cha'al jun ants ta svoq'ues ti sba yole. Ja' jteclum Sión ti xq'ueq'uet xa ta avetele, ti xi ta xal ti sye' xa tal ti sc'obe: ‘Mu xa ono'ox cha'bel un, ta xismilic ti jmilvanejetique.’ ”