Jeremías 38 - Bible in Tzotzil de Chamula

Jipe ochel ta jun taquin joc' ti Jeremiase

¹ Ti Sefatías xnich'on ti Matane, ti Gedalías xnich'on ti Pasure, ti Jucal xnich'on ti Selemiase, ti Pasur xnich'on ti Malquiase, ja'ic ti laj ya'iic ti xi s'elan xcholet laj yal c'opetic ti Jeremías ta stojol ti jteclume:

² “Ti Diose xi ta xale: ‘Ti buch'u li' ta xcom ta jteclume, ta xcham ta leto, mi ta vi'nal, mi ta tsots chamel. Ja'uc ti buch'u ta xloc' batel ta jteclume, xchi'uc ti ta xac' sba ta yoc ta sc'ob ti caldeoetique, xu' ta spoj ti xcuxleje.’

³ Ti Diose xi s'elan ta xale: ‘Ti jteclum li'e ta x'och ta yoc ta sc'ob ti soldadoetic yu'un ti ajvalil ta Babiloniae. J'ech'el ta xu'nin, mu'yuc buch'u stac' spajes.’ ”

⁴ Va'i un, ti j'opisialetique xi laj yalbeic ya'i ti ajvalile: “Sc'an milel ti vinic le'e. Ti c'usi ta xloc' ta yee, ta stsiq'uesbe yo'nton ti c'u to yepal oy ti soldadoetic li' ta jteclume, xchi'uc scotol ti jnaclejetique. Ti vinic le'e, ma'uc ta sa'be slequilal ti jnaclejetique. C'ajomal no'ox ta xac'be ti svocole.”

⁵ Va'i un, ti ajvalil Sedequiase xi laj staq'ue: “Lec oy, pasbeic ti c'usi lec ta xava'iique. ¿Mi yu'un stac' ta jpajesoxuc xana' un?”

⁶ Va'i un, och ta c'abal yu'unic ti Jeremiase. C'alal to taquin joc' sq'ueloj yu'unic ti ja' yu'un ti Malquías xnich'on ti ajvalile, ti oy ta amac' ti bu oy ti jchabivanejetique. Laj sjoc'anic yalel ta ch'ojon. Ch'abal ya'lel ti joq'ue. C'ajomal no'ox mulij yalel ta ach'el ti Jeremiase.

⁷ Oy jun etiope vinic ti sbiinoj Ebed-meleque, ti cajal yabtel yich'oj ta sna ti ajvalile, laj ya'ibe sc'oplal ti bat yich' tiq'uel ta taquin joc' ti Jeremiase. Ti jech yorail taje, ti ajvalile ja' o batem ta tsobajel ti ochebal Ti'na ti sbiinoj Benjamine.

⁸ Va'i un, ti Ebed-meleque loc' batel ti oy ta nae, ti xi bat yalbe ti ajvalile:

⁹ “Jcuch abtel, ti vi s'elan laj spasic ti viniquetic ta stojol ti Jeremías ti laj stiq'uic ta taquin joq'ue, milvanej xa xal o. Vi'nal xa'i xcham un, yu'un ch'abal ta tael ve'lil li' ta jteclume.”

¹⁰ Ta jech yepal ti ajvalile laj yalbe mantal ti Ebed-melec ti ac'o yic' batel lajuneb xcha'vinic (30) ta vo' viniquetic yo' ta sloq'uesic ti Jeremías ti jech tiq'uil ta joq'ue yo' to mu ta xcham.

¹¹ Ti Ebed-meleque laj yic' batel ti viniquetique, bat ti bu oy q'uejajtic ti c'u'iletic ta muc' ta nae. Laj stam jaylicuc lajem poq'uetic ti laj sjoc'anic yalel ti bu tiq'uil ta joc' ti Jeremiase.

¹² Va'i un, xi laj yalbe ya'ie: “Tic'o ta yolon alots'op ti c'a' poq'uetique yo' mu xa syayijesot ti avaq'uile.” Ti Jeremiase jech laj spas un.

¹³ Ti viniquetic une laj sjoc'anic yalel ti ch'ojone. Laj xchechic o loq'uel talel. C'alal c'ot ta pasel ti va'i s'elan taje, ti Jeremías une, com xa no'ox ta yamaq'uil na ti bu chabibile.

Ti Sedequiase ta stac ta iq'uel ti Jeremiase

¹⁴ Ti ajvalil Sedequiase laj yal mantal ti ac'o ic'batuc batel ta stojol ti j'alc'op Jeremiase ta yoxc'olal ochebal yu'un ti ch'ulnae. Ti bu taje, xi albat yu'un ti ajvalile: “Ta jc'an ta jac'bot ca'i jbel c'op, ti jamaluc lec avo'nton ta xataq'ue.”

¹⁵ Ti Jeremiase xi laj staq'ue: “Mi ta jtac' sutel ti c'usi ta xajaq'ue, Jcuch abtel, ta xaval mantal ti quich'uc milele. Mi oy c'usi ta jbijubtasote, mi ja'uc ta xavich' ta muc'.”

¹⁶ Ti ajvalil Sedequiase, ta mucul, xi laj sva'an sba ta yalel ta stojol ti Jeremiase: “Ta jva'an ta rextico ti Dios ti ja' laj yac' ti jcuxlejaltique, mi ja'uc ta xcal mantal ti avich'uc milele. Mi ja'uc ta xcac'ot batel ta yoc ta sc'ob ti buch'utic oy ta yo'nton ta smilot ya'ie.”

¹⁷ Va'i un cha'e, ti Jeremiase xi laj yalbe ya'i ti Sedequiase: “Ti Ajvalil ti scotol xu' yu'une, Dios yu'un ti Israele, xi ta xale: ‘Ti vo'ote, xchi'uc ti c'u yepal oy ta anae, mi j'ech'el ta xavac' abaic ta yoc ta sc'obic ti banquilal soldadoetic yu'un ti ajvalil ta Babiloniae, ta xacolic to unbi. Mu xich' chiq'uel xtoc ti jteclum li'e.

¹⁸ Yan mi mu xavac' abaic ta yoc ta sc'obique, jech unbi ti caldeoetique ta xu'ninic ti jteclum li'e. Ta stsanbeic sc'ac'al, mu xacol ec un.’ ”

¹⁹ Ti Sedequiase xi laj staq'ue: “Oy xi'el ta xca'i yu'unic ti judíoetic ti jelavemic xa batel ta stojol ti caldeoetique. Mi li'och ta c'abal yu'unique, na'tic c'u j'elan ta xibat yu'unic.”

²⁰ Ti Jeremiase xi laj staq'ue: “Mi ja'uc xa'och ta yoc ta sc'obic, Jcuch abtel. Avocoluc, Jcuch abtel, ch'uno ti c'usi laj yalbun ti Dios ti ja' yacal ta xcalbote. Lec ta xc'ot ta atojol. Mu xavac' ajol abaquil xchi'uc.

²¹ Ti Diose, yu'un xi s'elan laj xa yac'bun quil ti c'usi ta xc'ot ta pasel mi c'ajomal no'ox j'ech'el mu xavac' aba ta stojol ti banquilal soldadoetic yu'un ti ajvalil ta Babiloniae:

²² Scotol ti antsetic ti oyic ta muc' ta na yu'un ti ajvalil ta Judae, quiil xi loq'uel yajvalic. Ta xba yich'ic aq'uel ta yoc ta sc'obic ti banquilal soldadoetic yu'un ti ajvalil ta Babiloniae. Xi ta xlic yalic ma' ti stuquic une: ‘Tsale xa, laj sta lo'lael ti ajvalil yu'un ti buch'utic lec xil sbaic xchi'uque. Xjax q'uelic xa no'ox ti muquij yalel ta ach'ele, sjoybin xch'a satic ta stojol.’ ”

²³ Ti Jeremiase xi to lic yalilan ech'el ta stojol ti ajvalile: “Scotol ti antsetique, xchi'uc ti alab nich'nab avu'une, Jcuch abtel, ta x'aq'ueic batel ta yoc ta sc'obic ti caldeoetique. Ti Jcuch abtele mu xa c'usi xut sba mi och ta c'abale, ac'o xa no'ox smala ya'i ti xba yich' aq'uel ta yoc ta sc'ob ti ajvalil yu'un Babiloniae, xchi'uc ti jum xi sc'ac'al yu'unic ti jteclume.”

²⁴ Va'i un, ti Sedequiase xi laj stac'be ti Jeremiase: “Mi ta to xach'i ava'ie, mu'yuc buch'u xavalbe ya'i ti va'i s'elan laj caltique.

²⁵ Mi c'ot ta sni' ta xchiquin ti j'opisialetic ti lijlo'ilajotique, ta xtalic ta sjac'belot c'usi laj avalbun, c'usi laj calbot, yo' jamal ave ta yalel ta stojolic c'alal ta sc'anic ti ac'o achapbe ya'iic scotole, ja' ti mu yajvaluc ajol abaquil yilel ti c'u s'elan ta sva'an sbaic ta yalele.

²⁶ Albo ya'iic ti ja' no'ox ta xac'anbun vocol ti mu ta jcha'tacot batel ta sna ti Jonatán yo' mu xacham ti bu taje.”

²⁷ Jech ono'ox c'ot ta pasel un. Scotol ti j'opisialetique bat sq'uelic ti Jeremiase, ti oy c'usi lic sjaq'uilanbeique. Ti stuque, ja' no'ox jech laj stac' sutel jech c'u cha'al albat ya'i yu'un ti ajvalile. Va'i un, mu'yuc xa c'usi laj sjaq'uilanbeic, ja' ti mu'yuc buch'u laj ya'i ti c'u s'elan lo'ilajique.

²⁸ Ti Jeremías une tiq'uil com ta chuquel ta yamaq'uil na yu'un ti jchabivaneje, ja' to ti c'uxi c'ot sc'ac'alil ti laj yich' u'ninel ti Jerusalene.