Jeremías 36 - Bible in Tzotzil de Chamula

Ti ta ch'ulnae, ta xavta balbil vun ti Baruque

¹ Ta xchanibal jabil yochel ta ajvalilal ta Judá ti Joacim xnich'on ti Josiase, ti Jeremiase xi c'oponat talel yu'un ti Diose:

² “Tamo junuc jts'ibael balbil vun. Xlic ats'iba un scotol ti c'u s'elan laj calbot sc'oplal ti Israele, ti Judae, xchi'uc sc'oplal ti yan muc'tiquil lumetique, ti lic ono'ox jc'oponot talel ta yorail ti ochem ta ajvalilal ti Josías ti jech to tana li'e.

³ C'alal mi laj ya'iic scotol Judá ti va'i s'elan jnopoj ta jtac talel ta stojolic ti cuxul j'ilbajinvanej vocole, yic'al nan xictaic ti c'usi chopol yac'oj sjolic ta spasele. Jech xu' to ta jch'aybe ti xchopolalique, ti smul scolo'ique.”

⁴ Ti Jeremiase laj sta ta iq'uel ti Baruc xnich'on ti Neriase. Lic xchol ta alel scotol ti c'u s'elan albat ya'i yu'un ti Diose. Ti Baruc eque lic xchapan sba ta sts'ibael ti balbil vune.

⁵ Laj taj une, jech ti Jeremías une xi xcholet laj yalbe ya'i ti Baruque: “A'yio ava'i, ti jech tsots tsotstic ti jc'oplale, mu stac' xibat ta xch'ulna ti Diose.

⁶ Batan un c'alal ta sta yorail ta scomtsan ti yotic xtoque. Xavavta liquel ti c'u s'elan laj jchol ta alel ti laj ats'ibae, yo' jech ti jteclume, xchi'uc scotol ti jnaclejetic yu'un ti jteclum Judá ti talemic li'e, ya'iicuc sc'opojel ti Diose.

⁷ Yic'al nan ja' to jech xvocoletic liquel ta stojol ti Dios, ti ta sten ta yo'ntonic ti c'usi yac'oj sjolic ta spasele. Yu'un vinaj ti xi'bal sba ta j'ech'el ti q'uelel ta stojol jteclum ti lamal ta xc'ot ta stojol scotol ti sti'emal sjol ta sc'ac'al yo'nton ti Diose.”

⁸ Ti Baruque laj spas scotol ti xi s'elan albat mantal yu'un ti j'alc'op Jeremiase: Bat ta ch'ulna ta yavtael ti c'usi ta xac' ta na'el Dios ti ts'ibabil ta balbil vune.

⁹ Ta sbalunebal (9) yual ti ja' xa yo'obal (5) jabil yochel ta ajvalilal ta Judá ti Joacim xnich'on ti Josiase, lic yictaic yotic ta stojol Dios ti jnaclejetic ta Jerusalene, xchi'uc jlom ti liquemic talel ta yan jteclumetic ti oy ta yosilal ti Judae.

¹⁰ Ti Baruque bat ta jamal amac' yu'un ch'ulna, ta Ach' ochebal Ti'na, bu ti oy jc'ol na yu'un ti Gemarías xnich'on ti Safan ti sbainoj ta yalel ti c'usitic ta xc'ot ta pasele. Lic yavtabe ya'i scotol jteclum ti c'usi yaloj Jeremías ti ts'ibabil ta balbil vune.

Ti Baruque laj yavta ti balbil vun ta stojol ti banquilal j'abteletique

¹¹ Ti Micaías xnich'on ti Gemarías smom ti Safane, laj ya'i scotol ti c'u s'elan yaloj talel Dios ti ts'ibabil ta balbil vun ti laj yavta ti Baruque.

¹² Va'i un, bat ta muc' ta na yu'un ti ajvalile, ti bu xi s'elan ti buch'utic cajal yabtelic ti tsobol scotolic ta na ti bu sventainoj ti buch'u ta xac' ta na'el ti c'usi ta xc'ot ta pasele: Ti bu oy ti Elisamae, ti buch'u ta xac' ta na'el ti c'usitic ta xc'ot ta pasele; ti Delaiase, xnich'on ti Semaiase; ti Elnatán xnich'on ti Acbore; ti Gemarías xnich'on ti Safane; ti Sedequías xnich'on ti Hananiase, xchi'uc ti yan jtuneletique.

¹³ Ti Micaiase lic xchapbe ya'i scotol ti c'u s'elan laj ya'i ti laj yavta ti Baruc ta stojol jteclum ti c'usi oy ta balbil vune.

¹⁴ Ti j'abteletique laj staquic batel ti Jehudi xnich'on ti Netanías smom ti Selemiase, syial mom ti Cusie, ti ac'o bat yalbe ya'i Baruc ti yich'uc batel ti balbil vun ti laj yavta ta stojol ti jteclume. Ti Baruc une laj stam batel ti balbil vune, c'ot yac' ta stojolic.

¹⁵ Ti stuquique xi laj yalbeique: “La' chotlan, avtabun ca'icutic c'usi ta xal ti balbil vune.” Ti Baruque lic yavtabe ya'iic.

¹⁶ C'alal laj ya'iique, ta jech to yepal och xi'el yu'unic ta j'ech'el. Sq'uel q'uelbe xa sba satic ta jujun tal ti xi lic yalique: “Scotol ti va'i s'elan taje, sc'an ta xba jchapbetic ya'i ajvalil scotol ma' taje.”

¹⁷ Laj un, xi laj sjac'beic ti Baruque: “Albun ca'icutic, ¿c'usi laj avut laj ats'iba scotol ti va'i s'elan ta xal taje?”

¹⁸ Ti Baruque xi laj staq'ue: “Ta ye ta sti' stuc Jeremías xchapchun laj yal. Jech ti vu'une jluchbe no'ox jelavel laj jts'iba ta balbil vun.”

¹⁹ Va'i un, xi laj yalbeic ya'i ti Baruque: “Ja' lec un cha'e, ti vo'ote, xchi'uc ti Jeremiase, ba nac'o abaic ti mu'yucuc buch'u sna' bu oyoxuque.”

Ti ajvalil Joacime ta xchic' ti balbil vune

²⁰ Ti buch'utic yich'oj tsots yabtelique, laj yictaic comel ti balbil vun ta sna ti Elisama ti buch'u sbainoj ta yalel scotol ti c'usitic ta xc'ot ta pasele. Batic ta muc' ta na ta xcholbel ya'i ajvalil scotol ti va'i s'elan taje.

²¹ Ti ajvalile laj stac batel ti Jehudi ta stamel talel ti balbil vun ti oy ta sna ti Elisama ti buch'u sbainoj ta yalel scotol ti c'usi ta xc'ot ta pasele. C'alal laj yich' batel ti Jehudie, lic yavta ta sba ta sat ti ajvalile, xchi'uc ta sba ta sat ti buch'utic yich'oj tsots yabtelic ti joyol ta spat ta xocone.

²² Taje, sbalunebal (9) u xa yu'un ti jabile, c'alal ja' o ta xc'atin ta yorail sictic ta sna ti ajvalile, chac uban no'ox yu'un ti c'oc' ta xch'amlebe.

²³ C'alal ta xa xlaj yo'nton ta yavtael ti Jehudi oxcojuc, mi chancojuc bu c'alal voc'bile, ti ajvalile naca xtuch'el yu'un loq'uel ta cuchilu. Jip xut ochel ta c'oc' ti bu xtil ta xch'amlebe. Ja' jech laj spas, ja' to ti c'uxi c'ot ta c'aq'uel yu'un sjunul ti balbil vune.

²⁴ Ti ajvalile, xchi'uc ti j'abteletic ti yich'oj tsots yabtelique, mi ja'uc jutebuc oy xi'elal laj ya'iic ti c'u s'elan laj yich'ic avtabele. Laj ta alel ma' ti xtuch'et yo'ntonic ta q'uelele.

²⁵ Ti Elnatane, ti Delaiase, xchi'uc ti Gemariase laj sc'anbeic vocol ti ajvalile ti mu xchic' ti balbil vune. Ti stuque mi ja'uc laj ya'ibe xchiquinal.

²⁶ C'ajomal no'ox laj yalbe mantal ti Jerahmeel ti c'otem ta its'inal xa'i sba eque, ti Seraías xnich'on ti Azriele, xchi'uc ti Selemías xnich'on ti Abdeele, ti ac'o stsaquic ta chuquel ti j'alc'op Jeremiase, xchi'uc ti Baruc ti sbainoj ta yalel ti c'usi ta xc'ot ta pasele. Ja' no'ox un, naq'ueic yu'un ti Diose.

Ta ye ta sti' Jeremías c'u s'elan ta xich' ts'ibael yan balbil vun

²⁷ C'alal laj xa ox xchic' balbil vun ti ajvalil ti ta ye sti' Jeremías, laj sts'iba ti Baruque, ti Jeremiase, xi c'oponat talel yu'un ti Diose:

²⁸ “Tamo yan balbil vun. Ac'o yich' ts'ibael scotol ti c'u yepal oy ta ba'yel balbil vun ti laj xchic' ti Joacim ajvalil yu'un ti Judae.

²⁹ Xi xcholet xavalbe ya'i batele: ‘Xi ta xalbot ava'i ti Diose: Laj achic' ti balbil vune. Laj asa'be smul ti Jeremías ti laj sts'ibabe sc'oplal ti ta xvul ta loq'uel ta slilinel muc' ta lum ti ajvalil yu'un Babiloniae, ti mu junuc jnaclejetic ta scomese, mi ja'uc ti chon bolometique.

³⁰ Lec un cha'e, ti Ajvalilune ta xcal ava'i, Joacim, ajvalilot yu'un ti Judae, ti mu'yuc anitilultac ta x'och ta ajvalilal bu choti ta ajvalil ti Davide. Ti abec'tal atacopale telel ta x'ech' yu'un ti c'ac'ale xchi'uc ti taiv ta xtal ta ac'ubale.

³¹ Ti vo'ote, ti anitilultaque, xchi'uc ti avaj'abteltaque, tsots ta jtsitsoxuc ta scoj ti amulique. Ta scoj ti mu'yuc laj avac'beicun ta venta ti laj caj'albe sc'oplal ti ta xvul ta loq'uel ti cuxul j'ilbajinvanej vocole, ta jlaman talel ta abaic, ta sba xtoc ti jnaclejetic ta Jerusalene, xchi'uc ti ta Judae.’ ”

³² Ti Jeremías une laj stam ti yan balbil vune. Laj yac'be jelavel ti Baruc ti ja' yajts'ibajome. Lic sts'iba scotol xtoc ti c'u s'elan loc' ta alel yu'un ti Jeremiase, ti xcaltique, ja' ti c'u s'elan ts'ibabil scotol ta balbil vun ti laj xchic' ti ajvalil Joacime. Ti Jeremiase laj to stic' ochel ta sts'ibael yan ti co'ol ono'ox smelol ta xale.