Jeremías 34 - Bible in Tzotzil de Chamula

Ta x'albat sc'oplal ti ajvalil Sedequiase

¹ Ti Nabucodonosor ajvalil yu'un ti muc' ta lum Babiloniae, c'alal loc' talel xchi'uc scotol yajsoldadotac ti liquemic talel ta scotol muc'tiquil lumetic ti pasbilic ta mantal yu'une, ti svolojic ti Jerusalén xchi'uc scotol ti jteclumetic nopol xil sbaic xchi'uque, yo' ta stsaquic ta letoe, c'oponat talel yu'un Dios ti Jeremías ti xi albate:

² “Ti vu'un Ajvalilun Diosun yu'un ti Israele, ta xcalbot ava'i ti xi xba avalbe ya'i ti Sedequías ajvalil yu'un ti Judae: Xi ta xal ma' ti Diose: ‘Ta x'och ta sc'ob ti ajvalil yu'un Babilonia ti lum li'e. Ta spajbe sc'ac'al.

³ J'ech'el mu xu' xapoj aba ta yoc ta sc'ob. Ta xaschuquic batel. Ta xa'aq'ue ta stojol. Mi laj avich' aq'uel ta stojol une, ic'bil ta xabat ta Babilonia.

⁴ Ti jech scotol taj une, ts'et chiquintao ava'i lec li'e, Sedequías ajvalil yu'un Judá, ti xi ta xcalbot ava'i ti vu'un Diosune: Mu xve' avu'un ti espadae.

⁵ Lequil chamel ta xava'i ta xacham. Ta xavich' chic'bel muil poxiletic c'alal tuts'ulot jech c'u cha'al laj xchic'beic muil poxiletic c'alal tuts'ulic ti atot ame' ti laj ech'uc ta ajvaliletic ta ba'yel avu'une, ti xi ta xalboxuque: Ajvalil, mu cha'bel x'ech' ma' ti me'inal ta aventa une. Jech xcal ma' ti vu'un Ajvalilune, mu stselbuj ma' ti jc'ope.’ ”

⁶ Scotol ti c'op taje, lic yalilan ti j'alc'op Jeremías ta stojol ti Sedequías ajvalil yu'un ti Jerusalene.

⁷ Ta yorail taje, ti yajsoldadotac ti ajvalil yu'un Babiloniae, ochem yipal yu'unic ta stsaquel ta leto ti Jerusalene, ti Laquise, xchi'uc ti Azeca ti c'ajomal xa no'ox jech yepal pojobbail jteclumetic oy ta Judae.

Laj soquesbeic sc'oplal ti trate yu'un spojel scolelic ti mosovil hebreoetique

⁸ Ti Jeremiase, c'oponat talel yu'un Dios c'alal laj xa ox spas trate ti ajvalil Sedequías ti laj yal coluc loq'uel ti mosoviletic yu'unic scotol ti jnaclejetic ta Jerusalene.

⁹ Ti trate ta xale, mi vinic, mi ants ti ja' hebreoe, coluc loq'uel ta mosovil yu'unic, yo' jech mu'yuc buch'u junuc svinquilel no'ox sbaic ta judio ti mosovinbil yu'unique.

¹⁰ Scotol ti banquilaletique, xchi'uc ti jteclume, c'ot ta yo'ntonic ti c'u s'elan ta xal ti tratee. Laj scoltaic batel ti mosovile. Mi ja'uc xa laj sujic ti yac'uc sbaic ta tunele.

¹¹ C'alal col xa ox loq'uel yu'unique, xcha'na'ic xa liquel, lic xcha'sujic ti ochicuc ta tunel ta mosovil xtoc un.

¹² Va'i un, ti Diose bat sc'opon ti Jeremiase, ti xi laj yalbee:

¹³ “Ti vu'un Ajvalilune, Diosun yu'un ti Israele, laj jpas jtrate xchi'uc ti atot ame'ic ta vo'ne c'alal laj jloq'uesic talel ta Egipto ti bu ochemic ta mosovile.

¹⁴ Laj cal mantal, c'alal ta sta ti jujun vucub jabile, scoltaicuc batel ti buch'uuc no'ox junuc hebreo ti laj xchon sbaic ta stojolique, ti laj xa yac' sbaic ta tunel vaquib jabil yu'unique. Ti atot ame'ic ta vo'ne une, mi ja'uc laj yaq'uicun ta venta. Mi ja'uc laj xch'unbeicun.

¹⁵ Tana une, laj xa ox ajel ti snopobil avu'unique. Laj xa ox apasic ti c'usi lec ta xquile. Laj acoltaic loq'uel ta mosovil ti avinquilelique. Yu'un laj avac' atrateic ta jtojolal ta ch'ulna ti meltsanbil ta jventae.

¹⁶ Ts'acal to xtoc un, lic ayanijesic ti snopobil avu'unique. Lic asoquesic ti jc'oplale ta scoj laj acha'tiq'uic ta mosovil ti buch'utic laj xa ox acoltaic batele.

¹⁷ Ti vu'un Ajvalilune xi ta xcal ava'iique: Ti vo'oxuc une, mu'yuc xach'unbeicun ti loc'uc ta mosovil avu'unic ti avinquilelique. Tana ec une, jq'ueloj ta xvul ta loq'uel ta atojolic ti letoe, ti tsots chamele, ti muc' ta vi'nale, yo' ta xc'ot ta atojolic yu'un ti mu x'ech' xi'elal ta xa'iic scotol ti ajvaliletic ti oy ta banomile. Ti vu'un Diosune, mu lo'iluc no'ox ta xcal.

¹⁸ Ta xcac' ya'iic ta c'abal ti buch'utic mu'yuc xaq'uic ta venta ti tratee, ti mu'yuc yip laj ya'iic ti c'op ti laj yac' strateic ta jtojol ti c'alal laj spasic ta cha'xet' ti ch'in vacaxe, ti ech'ic ta o'lol ti bu xet'ajtique.

¹⁹ Ta xcaq'uic ya'i ta c'abal ti banquilaletic ta Judae, ti banquilaletic ta Jerusalene, ti jtunel ta sna ti ajvalile, ti paleetique, xchi'uc scotol ti jnaclejetic ta banomil ti jelavic batel ti bu xet'ajtic ti ch'in vacaxe.

²⁰ Ta xcaq'uic ech'el ta yoc ta sc'ob ti jti'oval yajcontraique, ti xulemuc jti'oval te'tical chon bolometic xve' yu'unic ti sbec'tal stacopalique.

²¹ Ta jpas xtoc ta stojol ti Sedequías ajvalil ta Judae xchi'uc ti yaj'opisialtaque ti ochicuc ta sc'ob ti jti'oval yajcontrataque, ti ochicuc ya'i ta c'abal yu'un yajsoldadotac ti ajvalil ta Babilonia ti spajesoj to sba ti tsacvanej ta leto tana le'e.

²² Ta xcalbe mantal ti suticuc talel ta scontrainel ti jteclum li'e, ti svoluc sbaic ta stojole, ti yu'ninicuque, xchi'uc ti stsanbeicuc ti sc'ac'ale. Ta xc'ot ta pasel cu'un ti sts'ijlajan ta xcom ti jteclumetic yu'un ti Judae, ti mu ja'uc xa junuc ti jnaclejetic ta xcom yu'une. Ti vu'un Ajvalilune, mu me lo'iluc no'ox ta xcal.”