Jeremías 29 - Bible in Tzotzil de Chamula

Ti Jeremiase ta stac batel vun ta stojol ti buch'utic bec'bil loq'uique

¹ Ti j'alc'op Jeremías ti oy ta Jerusalene, laj stac batel vun ta stojol ti c'u to yepal oy ti moletique, ti paleetique, ti j'alc'opetique, xchi'uc ti jteclum ti bec'bil loq'uel ta Jerusalén ti c'alal to Babilonia ic'bil batic yu'un ti Nabucodonosore.

² Taje, ta sjalil xa ox c'alal bec'bil loq'uic ti ajvalil Jeconiase, ti me' ajvalile, ti yajtuneltaque, ti banquilaletic yu'un ti jteclum Judá xchi'uc ti Jerusalene, ti buch'utic sna' xabtelanic ep ta chop abteletic, xchi'uc ti buch'utic sna' xchapanic sbisoltac c'u s'elan ta xlic abtel ti liquic ta Jerusalene.

³ Yo' ta xc'ot ta stojol ti ajvalil Nabucodonosor ti vun taje, ja' ac'bat yich'ic batel ti Elasa xnich'on ti Safane, xchi'uc ti Gemarías xnich'on ti Hilciase, ti tacbilic batel yu'un Sedequías ajvalil yu'un Judá ti oy ta Babiloniae. Ti vun taje xi ta xale:

⁴ Ti Ajvalil ti scotol xu' yu'une, Dios yu'un ti Israele, xi ta xalbe scotol ti c'u yepal bec'bil loq'uic talel ta Jerusalén ti talic ta Babiloniae:

⁵ “Meltsano anaic, naclanic un, ts'unic lo'bolal te'etic yo' ta xalo'beic ti sate.

⁶ Nupijan ts'aquijanic, epajuc avalab anich'nabic. Ti stuquic eque, nupijuc ts'aquijicuc ec, epajuc ta j'ech'el ti yalab xnich'nabique. Ma'uc ti xc'otic ta ulel ti bu taje.

⁷ Abtejanic ta sventa yutsilal slequilal ti jteclum ti bu bec'bil labatic cu'une. C'opojan ti'inicun ta stael ti slequilalic ti ja' alequilalic eque.

⁸ Ti Ajvalilun scotol xu' cu'une, Dios yu'un ti Israele, xi ta st'abboxuc ava'iique: Mu aq'uelojuc no'ox abaic ta xalajic ta lo'lael yu'un ti j'alc'opetique, ti jt'unvanejetic ti nacal ta atojolique. Mu xavich'ic ta muc' ti oy c'usi laj yil ta xvaichic ta xalique.

⁹ Ti c'usi ta scaj'alic ta jventa yalojique, naca jutbil ta spasic. Mu'yuc tacbilic cu'un. Ti vu'un Diosune, mu lo'iluc no'ox ta xcal.”

¹⁰ “Ti Diose xi ta xale: ‘C'alal ta xc'ot ta ts'aquiel ti lajuneb xchanvinic (70) jabil anaquielic ta Babiloniae, ta xlic jtic' jba ta atojolic yo' ta xc'ot ta pasel ti jc'op ti ta xasutic talel li' ta abanomilique.

¹¹ Jna'oj xa ti oy c'usi ta jpas ta atojolic ta sventa alequilalic ti ma'uc avilbajinelique, yo' ta xc'ot ta pasel ti ta xataic liquel ti xpatet avo'ntonic ta j'ech'ele. Ti vu'un Diosune, mu lo'iluc no'ox ta xcal.

¹² Ti vo'oxuc une, xavocoletic liquel ta jtojol, xac'opoj xati'inic xa, ta xca'iboxuc un.

¹³ Xataicun no'ox ta c'oponel c'alal ta xac'oponicune, yu'un sjunul xa avo'ntonic ta xasa'icun.

¹⁴ Jech un, yu'un jmalaoj xa ta xac'opoj xati'inic ti xi s'elan ta xc'ot ta pasel ta jel ti avorailique: Ta jloq'uesoxuc talel ti buyuc no'ox tanijemoxuc labatique, mi ta jujun muc'tiquil lumetic ti tan puc labatic cu'une. Ta xajtsoboxuc un yo' jech ta xasutic talel ta abanomilic ti bu bec'bil laloq'uique. Ti vu'un Diosune, mu lo'iluc no'ox ta xcal.’

¹⁵ “Ti vo'oxuc une xachiic liquele: ‘Ti Diose laj xa yac'botic j'alc'opetic li' ta Babiloniae.’

¹⁶ (Xi ta x'albat yu'un Dios ti ajvalil chotol ta chotlebal bu choti ta ajvalilal ti Davide, xchi'uc ti jnaclejetic ta jteclum ti ja' avuts' avalalic ti mu'yuc xbeq'ueic loq'uel ta alumalique:

¹⁷ ‘Ti Ajvalilun ti scotol xu' cu'une, xichi ta xcale: Ta jtacbeic talel leto, vi'nal xchi'uc chamel ta stojolic. Ta staic cu'un jech c'u cha'al junuc c'a'emal icux toj chopol ta j'ech'el ti mu stac' lo'ele.

¹⁸ Ta xlic quilbeic ya'i svocolic ta leto, ta vi'nal, ta tsots chamel. Ta xc'ot ta pasel cu'un ta stojolic ti yan muc'tiquil lumetic ta banomile, ti xbat xa xch'ulelic ta xi'el yu'une. Ta xjoybijic ta j'ac'-xi'el ti xvic' to satil yu'unic ti nijil chimilic ta q'uexlale, ti ta sbiseic ta cotol chavale. Ta xc'otic ta tsots j'ac'-xi'el yu'un scotol ti muc' ta lumetic ti bu tan puc laj jtaquic batele.

¹⁹ Yu'un mu'yuc laj yaq'uic ta venta ti scajbijubtaselic ta sventa ti cajtunel j'alc'optac ti laj ono'ox jtacolan talel ta stojolique. Mu jset'uc laj xchiquintabeic ti sc'ope. Ti vu'un Diosune, mu lo'iluc no'ox ta xcal.

²⁰ Jbelucoxuc ta mantal un cha'e, ch'unbeicun ti jc'op acotolic ti bec'bil loq'uic ta Jerusalén ti lavulic ta lum Babiloniae.’)

²¹ “Ti Ajvalilun ti scotol xu' cu'une, Dios yu'un ti Israele, xi ta xcalbe sc'oplal ti Acab xnich'on ti Colaiase, xchi'uc sc'oplal ti Sedequías xnich'on ti Maaseiase, ti naca yesomal spat sjolic ti sva'anoj xa sbaic yilel ta xc'opoj ta sventa ti Diose: ‘Ta xc'ot ta pasel cu'un, ta xcaq'uic batel ta yoc ta sc'ob ti Nabucodonosor ajvalil yu'un ti lum Babiloniae, ti ta aba ta asatic ta smil un.

²² Ti jech taj une, ti jteclum Judá ti bec'bil loq'uic ti batic ta Babiloniae, mi oy nan jlom yu'unic ta sbisic ta cotol chavale, xi yalicuque: Jechuc spas ava'i ti Dios ta atojol jech c'u cha'al laj spasbe ti Sedequiase, xchi'uc ti Acabe, ti cuxul jipatic ochel ta c'oc' yu'un ti ajvalil ta Babiloniae.

²³ Jech ta xc'ot ta stojolic un ta scoj ti xi s'elan ech'em chopol c'ot ta pasel yu'un ta stojol ti Israele: mulivajic xchi'uc yajnil ti svinquileltaque, xchi'uc naca yesomal sjolic ti c'opojic ta jventa ti mu'yuc calojbeic ya'iique. Jna' lec un, ma'uc ta xcal no'ox. Ti vu'un Diosune, mu lo'iluc no'ox ta xcal.’ ”

Xi ta x'albat ya'i ti Semaiase

²⁴ Ti Jeremiase, albat ya'i yu'un ti Dios ti xiuc yalbe ya'i ti Semaías ti liquem talel ta jteclum Nehelame:

²⁵ “Ti Ajvalil ti scotol xu' yu'une, Dios yu'un ti Israele, xi ta xalbote: ‘Ta amantal no'ox atuc, laj atac batel vun ta jteclum ti oy ta Jerusalene, ta stojol ti pale Sofonías xnich'on ti Maaseiase, xchi'uc ta stojol scotol ti yan paleetique. Xi laj avalbe ya'i ti Sofonías ta vun une:

²⁶ Ti Diose laj xa stic'ot ta pale ti la'och ta xq'uexol ti Joiadae yo' jech lac'ot ta banquilal jq'uelvanej ta ch'ulnae. Mi ta xc'ot jun chuvaj ta xlic c'opojuc jech c'u cha'al junuc j'alc'ope, oy avabtel ta scacanbel yacan ta jun ch'ojbil te' ti chucbil lec ta carinae.

²⁷ ¿C'u cha'al ya'yel un cha'e aq'ueloj no'ox ti Jeremías ti liquem talel ta jteclum Anatot ti ta xc'opoj jech c'u cha'al junuc j'alc'op ta atojolique?

²⁸ Laj to no'ox atacbuncutic talel vun xtoc ta Babilonia ti xi ta xale: Ti naclej ta yan banomil ta scoj ti beq'uele, ta xjalij ta j'ech'el. Tsinbo xa no'ox ava'i sc'oplal. Meltsano anaic yo' ta xanaquiic. Ts'unic lo'bolal te'etic yo' xalo'beic ti sate.’ ”

²⁹ Ti pale Sofonías une laj yavta ti vun ta stojol ti Jeremiase.

³⁰ Va'i un, ti Diose bat sc'opon ti j'alc'op Jeremiase, ti xi laj yalbe ya'ie:

³¹ “Taco batel mantal ta stojol scotolic ti c'u yepal bec'bil loq'uic ta yosilique, yu'un xi ta xcalbe ya'iic ti vu'un Diosune: Ta jeche' no'ox laj apat avo'ntonic yu'un ti Semaías liquem talel ta jteclum Nehelam ti ta xal ti c'opoj ta jventae.

³² Ta xcal ma' ti vu'un Diosun une, ta jtsits ya'i ma' ti Semaías xchi'uc scotol ti snitilultaque. Mi junuc ti snitilultac ta xcom xchi'uc ti jteclumale. Mu ja'uc ta sta ta maquiel ti lequilal ta xcac'be ti jlumale, yu'un ja' ta sc'op lic scontrainun. Ti vu'un Diosune, mu lo'iluc no'ox ta xcal.”