Jeremías 27 - Bible in Tzotzil de Chamula

Xi s'elan yabtel ma' ti sloc'obbail joyob c'ope

¹ Ta xchanibal jabil yochel ta ajvalilal ta jteclum Judá ti Sedequías xnich'on ti Josiase, ti Diose bat sc'opon ti Jeremías ti xi laj yalbee:

² “Meltsano junuc yabtejeb vacax xchi'uc xchucobil. Va'i un, scotol taje, xojo ta anuc'.

³ Mi laj une, taco batel ts'ibabil vun ta stojol ti ajvaliletic yu'un ti jteclum Edome, ti Moabe, ti Amone, ti Tiroe, xchi'uc ti Sidone, ti ta xich'ic batel ti j'al-mantal j'ich'-c'opetic ti talemic ta svu'lanel ti ajvalil Sedequías li' ta Jerusalene.

⁴ Albo ya'i ta jventa, ti vu'un Ajvalilun ti scotol xu' cu'une, Diosun yu'un ti Israele, ti xi ta xcal ti yalbeicuc ya'i ti yajvalique:

⁵ Ta sjunul jmuc'ul jtsatsal laj jmeltsan ti banomile, ti jnaclejetique, ti chon bolometique, xchi'uc scotol ti c'usitic oy ta stojole. Xu' ta xcac'be yich' ti buch'u xal co'nton ta sventain cu'une.

⁶ Va'i un cha'e, ti banomil li'e, laj xa cac'be ta yoc ta sc'ob ta yu'ninel ti cajtunel Nabucodonosor ajvalil yu'un ti jteclum Babiloniae. Ma'uc no'ox taje, laj xa cac'be sventain xtoc ti chon bolometique.

⁷ Scotol ti muc'tiquil lume, ta xac' sbaic ta ventainel ta stojol. Jech ta xlic sventainic ec ti xnich'one, ti smome, ja' to ti c'uxi ta xc'ot sc'ac'alil ventainbil ta xc'ot sjunul slumal yu'un ti yan muc'tiquil lumetique, xchi'uc ti ajvaliletic ti cajal xu' yu'unique.

⁸ Mi oy bu jchopuc muc' ta lume, mi ja' jun ajvalil ti mu sc'an ventainel yu'un ti Nabucodonosore, ta xlic jtsitsic ya'i ti ta xlajic ta letoe, ti lajicuc ya'i ta vi'nale, xchi'uc ti ta tsots chamele, ja' to ti c'uxi ventainbil ta xcom yu'un scotole. Ti vu'un Diosune, mu lo'iluc no'ox ta xcal.

⁹ “Tana une, mu xavich'ic ta muc' c'usi ta xalic ti j'alc'opetic yilele, ti jt'unvanejetique, ti buch'utic ta sbis sba ti sna' xalbel smelol ti vaichiletique, ti bainometic ti sna'ic scaj'alel ti c'usi ta to xc'ot ta pasele, ti ta xalboxuc ti altic no'ox ta xabic'tajes abaic ta stojol ti ajvalil yu'un ti Babiloniae.

¹⁰ Ti va'i s'elan ta xalic taje, naca jutbil. Mi ta xach'unique, ja' no'ox ta xataic ti bec'bil ta xaloc' ta alumalique, ti tan puc ta xabatic ti bu ta xac'otic ta lajel cu'une.

¹¹ Ja'uc ti muc' ta lum ti ta xac' sba ta ventainel ta stojol ti ajvalil yu'un ti Babiloniae, xu' to ta xcom cu'un ta naclej ta yabtelanel ti yosil sbanomile. Ti vu'un Diosune, mu lo'iluc no'ox ta xcal.”

¹² Ti vu'un Jeremíasune, scotol lic calilan ta stojol ti Sedequías ajvalil yu'un ti Judae, xchi'uc xi laj cal xtoque: “Ac'o aba ta ventainel ta stojol ti ajvalil yu'un ti Babiloniae, xchi'uc ta stojol ti steclumale. Jech ta xacuxiic unbi.

¹³ ¿C'usi xloc' o mi ta xachame, ti jmoj ta xalajic ta leto xchi'uc ti alumale, mi ta vi'nal, mi ta tsots chamel ta xac'otic ta lajel yu'une? Yu'un ti Diose laj xa yal ti jech ta xc'ot ta stojol scotol ti muc'tiquil lumetic ti mu xac' sbaic ta ventainel ta stojol ti ajvalil yu'un ti Babiloniae.

¹⁴ Mu xatsacbeic sc'op ti j'alc'opetic ti ta sbijubtasoxuc ti mu tsotsuc sc'oplal ta xavac' abaic ta ventainel ta stojol ti ajvalil yu'un ti Babiloniae. Yu'un ti c'usi ta xayalboxuque, naca jutbil.

¹⁵ Ti Diose ta xal ta jamal ti buch'u ma'uc tacbilic yu'une, naca spat sjolic no'ox ti utsuc xa xac'beic sbain Dios ti c'usi ta xalilanique. Va'i un, ta xc'ot ta pasel yu'un Dios ti tan puc ta xabatic yu'une. Jech ti vo'oxuque, xchi'uc ti j'alc'opetic yalojique, jmoj ta xatoj ta ajolic un, xchi'uc ti lec xava'iic ti c'usitic ta xalilanique.

¹⁶ Lic jc'oponic xtoc ti paleetique xchi'uc scotol ti jteclume, ti xichi laj cale: “Ti Diose xi s'elan ta xale: ‘Mu xatsacbeic ta muc' sc'op ti j'alc'opetic ti ta xalilanic ti mu xa xjalij ta xich' ich'el loq'uel ta Babilonia ti c'usitic toj tunel ti oy to ox ta ch'ulnae. Ti jech ta xalic taje, naca yesomal spat sjolic.

¹⁷ Mu xavich'beic ta muc' sc'op quere. Ac'o abaic ta ventainel ta stojol ti ajvalil yu'un ti Babiloniae, ta to xacuxiic unbi. ¿Mi yu'un xloc' venta ya'yel mi stuc slilijemal busul ta xcom ti jteclum li'e?

¹⁸ Ti bats'iuc j'alc'opeticuc ta melele, ti melel vu'unuc laj jc'oponique, ac'o xisc'anbeicun ta jtojol ti vu'un Diosun ti scotol xu' cu'une, ti mu xcac' que jti' ti x'ich'e batel ta Babilonia ti c'usitic toj jtunel oy ta ch'ulnae, xchi'uc ti oy ta sna ti ajvalil yu'un ti Judae, xchi'uc ti ta Jerusalene.

¹⁹ ‘Ti va'i s'elan taje, ti Dios ti scotol xu' yu'une laj ono'ox yalbe sc'oplal ti comuc li' ta jteclum ti chib c'usitic balajtic va'anbil muyele, ti muc' ta pilail vo'e, ti xchotlebtaque, xchi'uc jlom ti c'usitic to jtunele.

²⁰ Ti Nabucodonosor ajvalil yu'un ti Babiloniae, c'alal bec'van loq'uel ta Jerusalén, mu'yuc laj yich' loq'uel ti c'alal laj xchuc batel c'alal Babilonia ti Jeconías ajvalil yu'un Judá xnich'on ti Joacime, ti jmoj batic xchi'uc scotol ti buch'utic cajal yabtelic ta Judae xchi'uc ta Jerusalene.

²¹ Va'i un, ti Dios ti scotol xu' yu'une, Dios yu'un ti Israele, laj yalbe sc'oplal ti comuc ti c'usitic jtunel oy to ta ch'ulnae, xchi'uc ti oy ta sna ti ajvalil yu'un ti Judae, xchi'uc ti ta Jerusalene.

²² Ic'bil ta xbatic ta Babilonia un. Ta xcom o ja' to ti mi c'ot sc'ac'alil ta xquiq'uic sutel talel li' ti bu loq'uic batele. Ti vu'un Diosune, mu lo'iluc no'ox ta xcal.’ ”