Jeremías 26 - Bible in Tzotzil de Chamula

Oy sc'oplal ta xmile ti Jeremiase

¹ C'alal lic ochuc ta ajvalilal yu'un Judá ti Joacim xnich'on ti Josiase, xi c'oponat talel yu'un Dios ti Jeremiase:

² “Ba va'ano aba ta yamaq'uil ti ch'ulnae. Scotol ti c'u s'elan laj calbote, albo ya'i scotol ti jnaclejetic ta xliquic talel ta jteclumetic yu'un Judá ti ta xtalic snijan xchiman sbaic li' ta ch'ulnae. Ma'uc me ti avo'nton no'ox sna'e.

³ Xu' nan ta xlic yich'beicot ta muc' yo' jech ta xicta sbaic ta spasel ti c'usi chopole, ti xu' to stselbuj ti nopbil xa cu'un ta jtsitsic ta scoj ti c'usi chopol ta spasique.

⁴ Albo ya'iic ti vu'un Diosune xi ta xcale: ‘Mi mu xaq'uic ta venta, mi mu xc'ot ta pasel yu'un ti bijubtasel ti laj calbeic ya'iique,

⁵ mi mu xaq'uic ta venta ti c'u s'elan cajbijubtasvanic ti cajtunel j'alc'opetique, ti mu'yuc stu laj yilic ti laj ono'ox jtaquilan talel ta stojolique,

⁶ va'i unbi ti ch'ulna li'e, mu yanuc ta jpas ta stojol jech c'u cha'al laj jpasbe ti ch'ulna yu'un ti Siloe. Ta jventa, ti muc'tiquil lumetic ti oy ta sjunul banomile, ta sbisic ta cotol chaval ti jteclum li'e.’ ”

⁷ Ti va'i s'elan ti c'op taje, laj ya'i ti paleetique, ti j'alc'opetique, xchi'uc scotol ti jteclum ti laj xchap ti Jeremías c'alal oy ta ch'ulnae.

⁸ C'alal tsuts ta alel yu'un ti c'u s'elan albil batel yu'un ti Diose, ti paleetique, ti j'alc'opetique, xchi'uc ti jteclume, tsac xutic ti xi laj yalbeique: “Ta xavich' ta j'ech'el tana.

⁹ ¿Mi stac' no'ox alel ta xava'i ta yac'bel sbainel Dios ti ta xaval ti oy c'usi q'uelel ta stojol ti ch'ulna li'e, jech c'u cha'al c'ot ta stojol ti ch'ulna ta Siloe, ti lilijem ta xcom ti jteclume, ti mu junuc ta xcom ti jnaclejetic yu'une?” Ta jech yepal un, scotol ti jteclum ti oyic ta ch'ulnae, snet'-net' xa sba liquel vol xutic ti Jeremiase.

¹⁰ C'alal laj ya'iic ti banquilaletic yu'un ti jteclum Judá ti va'i s'elan ta xc'ot ta pasele, loq'uic batel ta muc' ta na yu'un ti ajvalile. Batic ta ch'ulna ti bu sbiinoj Ach' Ti'na xi sc'oplale. Laj xchotan sbaic ti bu taj une.

¹¹ Va'i un, ti paleetique, xchi'uc ti yan j'alc'opetique, xi lic yalbeic ya'iic ti banquilaletique xchi'uc scotol ti jteclume: “Ti vinic le'e, tsots sc'oplal ti ac'o yich' milele, yu'un laj xa stij ta alel ti oy c'usi chopol ta xc'ot ta pasel ta jteclum li'e. Yu'un laj ava'iic lec ta ani' ta achiquin atuquic.”

¹² Ti Jeremiase laj stoy batel sat ta stojol ti banquilaletique, xchi'uc ta stojol ti jteclume, ti xi laj yalbe ya'iique: “Ti c'u s'elan lic'opoj ava'iique, ja' laj stacun talel ti Dios ta yalel ti c'usi q'uelel ta stojol ti ch'ulna li'e, xchi'uc ti jteclume.

¹³ Ictaic ti c'u s'elan atalelique, xchi'uc ti c'usi me'inem xava'iic ta spasele. Ch'unic c'usi ta sc'an ti Ajvalil Dios avu'unique yo' jech xu' to ta stselbuj ti cuxul ilbajinel ti q'uelel talel laj caj'albe sc'oplale.

¹⁴ Ja'uc ti vu'une, oyun xa ta avoc ta ac'obic. Xu' xapasic ta jtojol ti c'usi xal ti avo'ntonique.

¹⁵ Ti xcaltic le' une, sc'an xana'ic jech li'e: Mi ta xamilicune, oy me amulic ta xc'ot xchi'uc ti jnaclejetic ta jteclum li'e, ti c'alal jeche' no'ox muts'ul sat ti buch'u ta xich' milele. Yu'un melel, ja' Dios laj stacun talel ta scaj'alel ta jamal scotol ti va'i s'elan taje.”

¹⁶ Va'i un, ti banquilaletique xchi'uc ti jteclume, xi laj yalbeic ya'i ti paleetique, xchi'uc ti yan j'alc'opetique: “Mu'yuc smelol ta j'ech'el ti ta xich' svocol ta milel ti vinic le'e, yu'un laj sc'oponotic ta sventa ti Ajvalil Dios cu'untique.”

¹⁷ Oy jun chib moletic ti xi laj sva'an sbaic ta yalel ta stojol ti jteclum ti bu tsobolic taje:

¹⁸ “C'alal yorail ochem ta ajvalilal yu'un jteclum Judá ti Ezequiase, ti Miqueas ti liquem talel ta Moresete, xi c'opoj ta sventa Dios ta stojol scotol ti jteclum yu'un ti Judae: ‘Ti Ajvalil ti scotol xu' yu'une xi ta xale: Ti jteclum Sione ta xjoybij ta jun locbil banomil. Ta xc'ot ta pasel un ti stuc xa xch'uch'ulil busul ta xcom ti Jerusalene. Ti stselej vits yu'un ti ch'ulnae, ta xnoj ta pimilal abnaltic.’

¹⁹ “¿Mi yu'un laj smilic Miqueas ya'yel ti ajvalil Ezequiase, xchi'uc scotol ti jteclum Judae? Yu'un c'ajomal xi ma' ti c'ot ta pasele: ti ajvalile lic xi'ta ti Diose. Laj sc'anbe ti ayanuc syail xc'uxul yo'nton ta stojolique. Ti Diose mu'yuc stac talel ta stojolic ti cuxul ilbajinel ti caj'albil xa ox sc'oplale. ¿Mi yu'un sta o ti cajal ta xc'ot ta jbatic ti muc' ta mulil taj une?”

²⁰ Ja' jech xtoc ti j'alc'op Urías xnich'on ti Semaías liquel talel ta Quiriat-jearime, c'opoj ta sventa Dios ti laj yalbe sc'oplal ti jteclum li'e, ti oy c'usi chopol ta xc'ot ta stojol jech c'u cha'al laj yal ti Jeremiase.

²¹ Ti ajvalil Joacime, ti yaj'opisialtaque, xchi'uc ti banquilaletic yu'une, laj ya'iic ti c'usi laj yale, ti ta x'ac'van ta milel ti ajvalile. Va'i un, c'alal c'ot ta sni' ta xchiquin ti Uriase, och xi'el ta yo'nton. Jatav batel c'alal to Egipto.

²² Ti ajvalil Joacime laj stac batel ta Egipto ti Elnatán xnich'on ti Acbore, xchi'uc jun chib viniquetic.

²³ Taje, ta Egipto to, laj staic talel ti Uriase, ti vul yaq'uic ta yoc ta sc'ob ti ajvalil Joacime, ti laj yal mantal ti ac'o yich' milele, ti ac'o ba smucbeic sbec'tal stacopal ti bu oy smuquinalic ti mu'yuc stu ech'ique.

²⁴ Ti Ahicam xnich'on ti Safane lic spacbe sc'oplal ti Jeremiase. C'ot ta pasel un, mu'yuc x'ac'at batel ta yoc ta sc'ob ti jteclum yo' ta xich' milele.