Jeremías 19 - Bible in Tzotzil de Chamula

Yabtel ti voq'uem q'uib ta xac' ta na'el ti laj yich' alel ta joyob c'ope

¹ Ti Diose xi laj yalbune: “Ba mano talel jbejuc q'uib. Ic'o talel jun chibuc ti banquilaletic yu'un ti jteclume, xchi'uc jun chibuc paleetic ti vulemic xa xch'ulelique.

² Batan ta stenlejal yu'un ti Ben-hinome, ti oy ta stuq'uil ti sbiinoj ti'na Tiestose. Ta xavalbe ya'iic ti c'u s'elan ta xcac'bot ana'e.

³ Xi xavale: ‘Ajvaliletic yu'un ti Judae, jnaclejetic yu'un ti Jerusalene, ts'etano ani' achiquinic ta ya'yiel ti xi ta xal ti Ajvalil ti scotol xu' yu'une, Dios yu'un ti Israele: Ta jtac talel muc'ul cuxul j'ilbajinvanej li'e. Ta xtub yiq'uic yu'un xi'el scotol ti buch'u ta xa'iique.

⁴ Ti israeletique laj sjip laj stenicun comel. Yan o xa ta q'uelel yu'unic ti banomil li'e. Lic xchic'beic pom ti yan diosetic ti mu xojtiquinic jutebuque. Mi ja'uc yojtiquinojic ti stot sme'ic ta vo'nee, mi ja'uc ti ajvaliletic yu'un ti Judae. Buyuc no'ox laj smalbeic xch'ich'el ti buch'u jeche' muts'ul sba sat laj yich'ic milele.

⁵ Laj smeltsanic xtoc altaretic sventa ta xchiq'uic xnich'nabic ta sventa smoton ti Baale, c'alal mu'yuc loq'uem ta quee, mu'yuc calojbeic mantal, mi jutebuc jech oy ta co'nton.

⁶ Jech o xal un, oy bu ta xc'ot sc'ac'alil ti ma'uc xa ta sbiin Tofete. Mi ja'uc xa ta sbiin stenlejal Ben-hinom. Ta sbiin liquel Stenlejal Milobbail. Ti vu'un Diosune, mu stselbuj ma' ti jc'op une.

⁷ Ti c'usi chapal xa yu'un ti Judae, xchi'uc ti Jerusalene, li' ta xc'ot ta soquel ta lilijel une. Ta xc'ot ta pasel cu'un ti ta stsutsesatic yu'un ti jtsutsesvanej jcontrainvaneje. Xulem xchi'uc jti'oval chonetic xve' yu'un ti sbec'tal stacopalique.

⁸ Ta joybin ta sts'ijlajan banomil ti steclumalique. Ta xc'ot ta pasel ti ta xlic yac' xi'ele. Scotol ti buch'u ta x'ech'ic li'e, ch'ayal ta xc'ot yo'ntonic xchi'uc xi'el c'alal ta xilic lilijem ta j'ech'el ti jteclume.

⁹ Ta xc'ot ta pasel cu'un ta xlic sti' yalab xnich'nabic ti jnaclejetique. Ta jujun tal ta sti'an sbaic ta scoj ti mu xa stac' a'yeluc ta xa'iic c'usi stac' ta spas ti volibilic yu'un ti jtsutsesvanej jcontrainvanej yu'un ti jteclume.’

¹⁰ “Mi laj aval taj une, t'uso ta voq'uel ya'i ti q'uib ta sba ta sat ti buch'utic xchi'inojot batele.

¹¹ Xi xavalbe ya'i xtoc une: ‘Ti Dios ti scotol xu' yu'une xi ta xale: Ti jteclum li'e xchi'uc ti lum yu'unique, ta jlilin ta j'ech'el jech c'u cha'al ti buch'u ta slilin ta voq'uel ti q'uibe, ti mu'yuc xa c'usi stac' pasel yu'une. Ti animaetic yu'un ti jnaclejetique, ta Tofet to ta xbat smuquic ta scoj ti mu'yuc xocol ti smucobbaile.

¹² Jech ta jpasbe ya'i ti lume, xchi'uc ti jnaclejetic yu'une. Jech ta xc'ot ta stojolic cu'un jech c'u cha'al laj jpasbe ti Tofete. Ti vu'un Diosune, mu stselbuj ma' ti jc'op une.

¹³ Ti naetic yu'un ti Jerusalene, ti bu chotiic ti ajvaliletic yu'un ti Judae, xchi'uc ti xcha'cojal na ti bu laj yac'beic pom ti c'usitic xojobin ta vinajele, xchi'uc ti bu laj sq'uebic ta malel ta matanal ti vino ta sventa ti yan diosetique, nom to c'ot ma' ti stac' nopel une. Ta x'albat sc'oplal jech c'u cha'al c'ot ta pasel ti ta Tofete.’ ”

¹⁴ Laj taj une, sut ech'el ta Tofet ti Jeremiase, ti bu tacbil bat yu'un Dios yo' ta xc'opoj ta sventae. Laj sva'an sba ta yamaq'uil ch'ulna ti xi lic yalbe ya'i scotol ti jteclum une:

¹⁵ “Ti Ajvalil ti scotol xu' yu'une, Dios yu'un ti Israele, xi ta xale: ‘Ta jtac talel stsitselic ti jteclum li'e, xchi'uc scotol ti jteclumetic joyol ta spat ta xocone, jech c'u cha'al laj calboxuc ava'iic ti sc'oplale, yu'un pucujibemic xa ta j'ech'el, ti mu xa xc'ot ta ch'unel yu'unic ti jc'ope.’ ”