Jeremías 18 - Bible in Tzotzil de Chamula

Ta joyob c'op ta xich' albel yabtel ti jpotobe xchi'uc ti ach'ele

¹ Xi laj yalbun ti Dios ti laj sc'oponun talele:

² “Yalan batel ta sna ti jpotobe, ti bu taje ta xcalbot ava'i ti lo'il a'yej ti oy ta co'ntone.”

³ Ti vu'un Jeremíasune liyal batel. Ti jpotobe yacal ta abtel xchi'uc yach'el ti oy ta sjoyoyinobil yu'une.

⁴ C'alal mu jechuc ta xloc' yabtel c'u s'elan ta sc'ane, ta xcha't'us, ta xlic smeltsan ach', ja' to ti c'uxi ta xloc' lec yu'un ti c'u s'elan ta sc'ane.

⁵ Va'i un, ti Diose xi laj yalbune:

⁶ “Israeletic, ¿mi xavac'toicuc mu stac' jech ta jpas ta atojolic jech c'u cha'al ta spas ti jpotob le'e? Oyoxuc ta coc ta jc'ob jech c'u cha'al ti jpotob le'e ti oy ta yoc ta sc'ob ti ach'ele. Ti vu'un Diosune, mu stselbuj ti jc'ope.

⁷ Mi lic xi jol ta xch'ubaele, ta jliquel no'ox lomem lilijem cu'un ti muc' ta lume, mi ja' ti ajvalile.

⁸ Mi ta xicta sbaic ta spasel chopol ti muc' ta lum taje, xu' to ta xch'ay ta be ti tsitsel chapal xa cu'une.

⁹ Nax to mu lic xi jol ta sva'anel, ta svolesel ti muc' ta lume, mi ja' ti ajvalile.

¹⁰ Yan mi ochem yipal yu'un ta spasel c'usi chopol ti muc' ta lum taj une, mi mu xac' ta venta ti c'usi jcaj'aloje, ac'o to me sjip ta spat sjol ti oy c'usi lec chapanbil cu'un ta sventae.

¹¹ “Albo ya'i un cha'e ti yajval lum Judae, xchi'uc ti jnaclejetic yu'un ti jteclum Jerusalene, ti xi ta xcal ti vu'un Diosune: ‘Yacalun ta xchapanel ti c'usi ta xava'iic cu'une. Yacalun ta snopel ti ta xajtsitsoxuque. Comtsanic xa ti bu chopol atamojic batele. Tuq'uibuc ta q'uelel ti atalelique, ti c'usitic ta xapasique.’

¹² Ti stuquique xi ta stac'bote: ‘Altic no'ox ta xach'ay ac'ac'al quere. Yu'un ja' ch'iel c'opojel ta xca'icutic yu'un ti bu c'alal sq'ueloj ti pucujibem co'ntoncutic xchi'uque.’ ”

¹³ Jech o xal ti Dios une xi ta xale: “Jac'beic junuc ta scotol ti muc'tiquil lumetic mi oy bu ya'binojic ti va'i s'elan ti c'op taje. Ti lum Israele oy c'usi toj ech'em chopol spasoj.

¹⁴ ¿Mi oy bu ta xc'ot ta pasel ti mu xtal taiv ta toyol vitstic yu'un ti Líbanoe? ¿Mi oy bu ta xc'ot ta pasel ti ta be no'ox ta xvul ti vo' ti siquet no'ox x'oquin talel ta toyol vitstique?

¹⁵ Ja'uc ti jteclumal une laj xa xch'ayun ta yo'nton. C'ajomal xa no'ox ta xchic'beic matanal pom ti loc'obbailetic ti ma'uc Diose. Ch'ayic xa ti bu stamojic batele, laj xa yictaic comel ti vo'neal bee. St'unojic batel jun be ti mu sna'ic bu ta xbate.

¹⁶ C'ot ta sts'ijlajan banomil yu'unic ti muc' ta lume, ti mu xlaj ta alel ti slabanele. Scotol ti buch'u ta x'ech' teye, yan xa sat ti sjimolan xa sjol yu'une.

¹⁷ Co'ol j'elan ic' ta xlic talel ta sloq'ueb c'ac'al ti tan puc ta jbec' batel ti Israele, ti jatvilic xa yu'un ti scontraique. Ta jvalopatinic ya'iic comel; ta jq'uej jba loq'uel ta stojolic ti c'alal ta xc'ot sc'ac'alil ti stsitselique.”

Nopbil ti j'ech'el ta xich' ti j'alc'ope

¹⁸ Ti jnaclejetique xi lic snopique: “Jchapantic lec ti ch'ayuc sc'oplal ti Jeremías ta jtojoltique. Yu'un oy ono'ox paleetic ti ta xistojobtasotique. Oy ono'ox bijil viniquetic ti ta xisbijubtasotique. Oy ono'ox j'alc'opetic xu' ta xisjelubtasbotic c'usi ta xal ti Diose. Jtic'betic ya'i smul yo' ta xich' milel. Mu jch'unbetic ti c'usi ta xale.”

Ta xc'opoj xti'in ti Jeremiase

¹⁹ Cajval, ts'etano ani' achiquin ta ya'yiel ti jc'opojel jti'inele. A'yio ava'i c'u s'elan ta xc'opojic ti cajcontrataque.

²⁰ ¿Mi ta ilbajinel ta spaquel sutel ti c'usi lec laj yich' pasele? Ti stuquique laj xa sjoq'uic jch'enal. Vuleso ta ajol ti laj jtic' jba ta c'opojel ta aventa ta spacbel ti sc'oplalic ta atojole, ti lamajuc ti sc'ac'al avo'ntone.

²¹ Tana le' une, c'otuc ta pasel avu'un un, chamicuc ta vi'nal, mi espada xve' yu'unic ti xnich'nabique. C'oticuc ta me'unal antsetic ti yajnilique, ti mu junuc ta xcom ti yalab xnich'nabique. Lajicuc ta tsots chamel ti smalalique. Tsutsuc sc'oplalic ta leto ti jva'lej queremetic yu'unique.

²² Ta jech yepaluc, taco talel jvoletel j'eleq'uetic ta stojolic. Vinajuc un ti batemuc xa xch'ulelic ta avlajetel yu'un ti xi'ele. Yu'un jomol yu'unic jch'enal bu ta xisjipic yalel ya'iic, yu'un laj yac'beicun jpets'al ti bu ta xi'ech'e.

²³ Ti vo'ot une, Cajval, xavojtiquin scotol c'u s'elan chapbil yu'unic ti ta smilicune. Laj to sc'oplal avu'un ti ch'aybil ta xc'ot ti c'u s'elan chopol ta spasique, ti ts'ij xi sc'oplal avu'un ti smulique. Toj yaleluc ta lum c'otuc ta atojol. Tsitso ya'i ta sc'ac'al avo'nton un.