Jeremías 17 - Bible in Tzotzil de Chamula

Ta xich' tsitsel yu'un oy smul ti Judae

¹ “Ti amule, Judá, ta jich'il ni' taq'uin ts'ibabil lec com ta ch'ojel. Ti ton s'elan oy ti avo'ntone, xchi'uc ti xulubtac ti altaretic avu'une, ch'ojbil lec ta ts'ibael ta jun ts'ub ts'ub ni' saquil xixib ton.

² Ti anich'nabe ta svules ta yo'ntonic ti altaretique, ti bu va'ajtic ti c'usitic meltsanbil ta te' ti oyic ta yolon ti limlim te'etique, ti oyic ta toyol stselejtique,

³ xchi'uc ti oyic ta volol te'tic ti oy ta yavil abtelaltique. Ta scoj ti amul une, ta xcac' que jti' ti ta xa'elc'anbat batel ti ac'ulejale, xchi'uc ti c'usitic toyol stojol q'uejbil avu'une, xchi'uc ta xchajic ta sa'el ti c'usitic oy avu'un ta toyol vitsetic ti oy ta sjunul ti avosilale.

⁴ Ta jech yepal ta xaten comel ti banomil laj cac'bot ta arextoe. Ta xcac' c'otan ta mosovil yu'un avajcontratac ta banomil ti bu mu xavojtiquine, yu'un til xa ti sc'ac'al co'nton jech c'u cha'al junuc c'oc' ti j'ech'el ta stsutsesote.”

Ep ta tos c'usi ta xich' alel

⁵ Ti Diose xi ta xal xtoque: “Ta jbis ta cotol chaval ti buch'u yan yo'nton ta jtojole, ti viniquetic no'ox ta spat yo'nton ta stojole, ti utsuc xa ta xba snaban sba ta sa'el ti spojel scolele.

⁶ Taje, co'ol s'elan jal-jal ch'ix ti oy ta sbajtical banomil ti xi s'elan mu'yuc stuc'ulanele: ta c'al tontic ch'iem liquel, ta quech lumtic ch'iem ti mu junuc jnaclej ti bu oye.

⁷ “Yan yutsil ti buch'u spatoj yo'nton ta jtojole, ti j'ech'el smalaoj ta sta ti spojel ta jtojole.

⁸ Co'ol s'elan jpets te' teq'uel ta ti' uc'um, ti ta sts'un ech'el yibel ti bu ta x'ech' ti vo'e. Mu'yuc c'usi xal yo'nton yu'un ti corixmae, limil no'ox yutsil xchi'uc ti yanale. Mu xa'i ti q'uepelale, c'ajomal pich'il no'ox ti sate.

⁹ “Ti o'ntonale, mu'yuc xa c'usi jech yan ta lo'lavanej yu'un ti spajebal xchopolale. ¿Mi yu'un la oy buch'u sna' ti bu sq'ueloj batele?

¹⁰ C'alal ta jt'un lec ti vu'un Diosune, chajal ta jba ta jsat bu c'alal c'otem ta snopel ti c'usi ta sc'an ti o'ntonale. Jujun ta xcac'be stoj c'u s'elan sta o ta xich' ta sventa ti c'usi loc' ta sa'el yu'une.”

¹¹ Ti buch'u ma'uc ta xchic' ta ya'lel ta sta ti sc'ulejale, ja' xchi'il jchop o ta muc' ta ub ta svol ta tsobbel ston xchi'il c'alal ta xpatie. Ja' to no'ox xa'i, jeche' smeyoj yoc sc'ob ti caj tsacal to ox xa'i sbae, jun bolat c'ot ta loq'uel xchi'uc xcaltic unbi.

¹² Ti jch'ulnatique c'otem ta jun pasob mantal ti cajal sc'oplal ta j'ech'ele, yu'un jech ono'ox oy sc'oplal ti ta sliquebale.

¹³ Cajval, vo'ot spatobil yo'nton ti Israele. Scotol ti buch'u ta stenot sjipot comele, nijil chimil ta xc'ot ta q'uexlal. Scotol ti buch'u ta xnamaj ta atojole, ta sac ch'ay batel jech c'u cha'al junuc biil ti ts'ibabil ta pucuque, ta scoj ti laj stenot comel c'alal vo'ot ti sat vo' ti siquet no'ox ta uch'ele.

Ti Jeremiase xvocolet ta stojol ti Diose

¹⁴ Colesun, Cajval, yo' ta xpoxtaj ti jvocole. Tic'o aba ta jpojel yo' jech ta xicol. Atuc xa no'ox ta jlequil-c'optaot unbi.

¹⁵ Ti jnaclejetique xi ta xalbeicune: “C'otuc xch'a ta pasel ti c'u s'elan ta xloc' ta alel yu'un ti Diose, ma'uc ti naca no'ox xvulvune.”

¹⁶ Manchuc mi jech un, mu'yuc xivulvun ta sc'anel ti staicuc ti svocol avu'une, ti staicuc ti cuxul ilbajinel avu'une. Xana' lec ti c'u s'elan laj calbote, yu'un jamal laj cal ta atojol.

¹⁷ Mu xac'atajes aba ti ta xac'ot ta jun cuxul jsibtasvanej ta jtojole, yu'un c'otemot ta jnac'obbail c'alal xyaquet ti oy c'usi chopol ta xc'ot ta pasele.

¹⁸ Nijil chimil comicuc ta q'uexlal ti j'ilbajinvanejetique, ma'ucuc ti xjoybij ta jbae. Batuc ya'iic xch'ulel ta xi'el, ma'ucuc ti xjoybij ta jbae. J'ech'el c'otuc ta stojolic ti lajem ta xcomic xchi'uc ti svocolic ti ta xc'otilan ta stojolique.

Stuc'ulanel c'usi sc'an pasel ti sc'ac'alil cuxob o'ntonale

¹⁹ Ti Diose xi laj yalbune: “Batan, ba va'ano aba ta ochebal ti'na yu'un ti jteclume, ti bu ta xloq'uic ta x'ochic ti ajvaliletic yu'un ti jteclum Judae. Mi laj une, jech xba apas xtoc ta ochebal ti'naetic yu'un ti jteclum Jerusalene.

²⁰ Xi xalbe ya'i ti jnaclejetique: ‘Ajvaliletic, scotol ti jnaclejetic yu'un ti Judae, scotol ti jnaclejetic yu'un ti jteclum Jerusalén ti ta xa'ochic talel ta ti'naetic li'e, a'yio ava'iic sc'opojel ti Diose.

²¹ Xi ta xal ti Diose: Ti sc'ac'alil cuxob o'ntonale, ja' sventa alequilalic. Mu xavich'ic talel ti icatsile. Mi ja'uc xatiq'uic ochel ta ochebal ti'naetic yu'un ti jteclum Jerusalene.

²² Mu xacuchic loq'uel icatsiletic ta anaic c'alal ja' o sc'ac'alil ti cuxob o'ntonale. Mi ja'uc xapasic jtosuc abtel. Ich'beicun ta muc' ti sc'ac'alil cuxob o'ntonal jech c'u cha'al laj calbeic ya'iic ti atot ame'ic ta vo'nee.

²³ Ti stuquic une, mi ja'uc laj xch'unbeicun. Mi ja'uc laj yaq'uic ta venta. Jelav ti stoyobbailique. Mi ja'uc c'ot ta yo'ntonic ti ta xch'unique. Mi ja'uc sc'anic albel.

²⁴ “ ‘Xi ta xcal ta jamal ti vu'un Diosune: Ch'unbeicun ti jc'op ta melele. Mu xacuchic batel icatsil ta sti'tac jteclum c'alal ja' o sc'ac'alil ti cuxob o'ntonale. C'otuc ta jventa avu'unic ti jech c'ac'al taje. Mu xapasic jtosuc abtel.

²⁵ Mi jech ta xapasic une, va'i unbi, oy ono'ox ajvaliletic ti ta xchotiic ti bu choti ti Davide, ti ta x'ochic talel ta ti'naetic yu'un ti jteclum li'e, xchi'uc ti scarretaique, xchi'uc ti sca'ique, ti chi'inbilic ta xtalic yu'un ti banquilaletic yu'un ti jnaclejetic ta Judae, xchi'uc ti ta jteclum Jerusalene. Ti Jerusalene, oy ono'ox ti jnaclejetic yu'une.

²⁶ Ta xtalic ti jnaclejetic yu'un ti jteclumetic ti oyic ta Judá ti joyolic ta spat ta xocon ti jteclum Jerusalene, ti oyic ta yosilal ti Benjamine, ti oyic ta stenlejaltique, ti oyic ta muc'tiquil vitstic yu'un ti Négueve. Ta xich'ic talel ta ch'ulna ti chon bolometic ta sventa ta xich' svocole, ti ta xich' chiq'uel ta matanale, ti matanal sat ts'unubale, xchi'uc ti pome, xchi'uc ti yan matanaletic sventa ta xich' albel coliyal ti Diose.

²⁷ Mi mu xach'unic ti jmantaltaque, mi mu xavaq'uic ta venta ti sc'ac'alil cuxob o'ntonale, mi mu xapajes abaic ta xcuchel talel icatsil ta ti'naetic ta Jerusalén ti jech c'ac'al taje, va'i unbi, ta jtiles c'oc' ta ochebal ti'naetic yu'un ti jteclume, jun c'oc' ti j'ech'el ta slilin ti muc' ta naetic yu'un ti Jerusalene, mi junuc buch'u ta xtub yu'un ti c'oq'ue.’ ”