Jeremías 16 - Bible in Tzotzil de Chamula

Ti c'u s'elan loc' mantal yu'un ti Diose, ta sbain ti Jeremiase

¹ Xi laj yalbun ti Dios ti laj sc'oponun talele:

² “Mu xanupij xats'aquij yo' mu x'ayan anich'nab li' ta jteclume.

³ Ti vu'un Diosune ta xcalbot ava'i c'usi ta xc'ot ta stojolic ti nich'oniletic ta xvoq'uic li' ta jteclume, xchi'uc ti totil me'iletic ti oy yalab xnich'nabique.

⁴ Ep ta tos jtsutsesvanej chamel xa'i xcham xlajic. Laj to ta alel ma' ti oy yoq'uitaelique, ti oy smuquelique, yu'un xi s'elan ta xc'otic ta stojolique: Q'uiil ta xcomic ta lumtic jech c'u cha'al tso' chon bolometic ti busul no'oxe. Leto, vi'nal xve' yu'unic. Ti sbec'tal stacopalique, xulemetic xchi'uc jti'oval chon bolometic xve' yu'unic.”

⁵ Xi laj yalbun ti Dios xtoque: “Mu xa'och batel ta na bu oyic ta me'inal ti oy buch'u chame. Mu xlic oc'an. Ma'uc ti utsuc xa xapat o'ntonal teye. Yu'un ti jteclum li'e, laj to ta alel ti jun yo'ntonic cu'une, ti oy xc'uxul co'nton yu'une, ti oy jyail jc'uxul ta stojole. Ti vu'un Diosune, mu stselbuj ti jc'ope.

⁶ Ta biq'uit ta muc' ta xlajic scotol ti jteclum li'e. Mi junuc ta xich'ic muquel pixel. Mi ja'uc ta xich'ic oq'uitael. Laj to ta alel ti oy buch'u xtuch'et o'ntonal ta stojole, ti utsuc xa syayijes sbae, ti xt'axbun xa ta loq'uel ti sjole.

⁷ Mi ja'uc oy buch'u utsuc xa stsobvan ta ve'el uch'ubajel sventa smacobil xq'uexlal ti jlajel jtubel yo' xpatet to o'ntonil yu'un ti uts' alaletique. Mu'yuc ta alel mi totil, mi me'il ti cham xae, ts'ij xi no'ox c'op.

⁸ “Ja' jech xtoc, mi ja'uc xa'och batel ta na ti bu xyaquet ti q'uine, ti jmoj xa chotolot ta ve'el uch'ubajel xchi'uquique.

⁹ Ti Ajvalilun ti scotol xu' cu'une, Diosun yu'un ti Israele, xi ta xcal ta jamale: Yu'un ti li' ta jteclume, ta jpas ta stojolic ti ts'ij xi liquel ti q'uejimoletic sventa muyubajel yu'un ti q'uine, xchi'uc ti q'uejimoletic sventa ti lecomajele. Ti va'i s'elan taje, ta xavilic ta aba ta asatic ti ta xc'ot ti c'ac'al ora avu'unique.

¹⁰ “C'alal ta xavalbeic ya'iic ti jteclum ti va'i s'elan ti c'op taje, xi s'elan ta xlic sjaq'uique: ‘¿C'u cha'al ya'yel loc' ta nopel yu'un Dios ti mu no'ox albajuc ti vocol lamal vul ta jtojoltic yu'une? ¿C'usi chopol laj jpastic? ¿C'usi mulil laj jpastic ta stojol ti Ajvalil Dios cu'untique?’

¹¹ Xi xatac'be une: ‘Ti Diose xi ta xal ta jamale: Ti jech taje, ti atot ame'ic ta vo'nee, laj yictaicun comel. Bat sts'acliic yan diosetic ta snijanel xchimanel sbaic ta yich'el ta muc'. Laj stenicun comel ti vu'une. Laj svalopatinic ti chanubtasel laj cac'beique.

¹² Ti vo'oxuc ec une, xjelav to xchopolal ti c'usi laj apasique. Jc'ol to mu sta ti atot ame'ic laj ech'icuque. Ta jujun tal ochem yipal avu'unic ti pucujibemoxuque, ti batem avo'ntonic ta spasel ti c'usi chopole, ti mu'yuc xach'unic ta spasel ti c'usi laj cale.

¹³ Jech o xal ta jtenoxuc loq'uel ti li' ta banomile. Ta xabatic cu'un ta muc' ta lum ti mi ja'uc xavojtiquinique. Mi ja'uc laj yojtiquinic ti atot ame'ic laj ech'uc ta vo'nee. Ti bu taje, c'ac'al ac'ubal ta xavac' abaic ta tunel ta stojol ti yan diosetique. Mi ja'uc ta xc'uxubaj co'nton ta atojolic.’

¹⁴ “Jbel xcal ti vu'un Diosune, oy bu ta sta sc'ac'alil ti ma'uc xa ti xi ta xal ta x'ac'vanic ta rexticoe: ‘Jamal ta xcal ta sventa ti Dios ti laj sloq'ues talel ta Egipto ti israeletique.’

¹⁵ C'ajomal xa ti xi ta xalique: ‘Jamal ta xcal ta sventa ti Dios ti laj sloq'ues talel ti israeletic ti oyic xa ta muc' ta lum ti oy ta yolon ti yolon xocon sloq'ueb c'ac'ale, xchi'uc ti ta muc'tic lumetic ti tanijemic batele.’ Ta jpas ta atojolic ti xu' ta xasutic talel ta avosilalic ta abanomilic ti bu cac'ojbeic ti atot ame'ic ta vo'nee.

¹⁶ “Jbel xcal ti vu'un Diosune, ta jtac talel epal jmas-choyetic ti ochuc yu'unic ta smasobil choyetic ti israeletique. Ts'acal to un, ta xcac' taluc epal jnutsuviletic yo' ta x'och ta c'abal yu'unic. Ta xch'ajatic ta sa'el ta pimilal te'tic, ta vitstic, ta sjap c'al tonetic.

¹⁷ Yu'un quiloj scotol ti c'usi ta xapasique. Mu'yuc c'usi ti macal ta xcom ta jba ta jsate, mi ja'uc ti amulique. Mi ja'uc xu' avu'unic xanac' abaic ta jba ta jsat.

¹⁸ Yu'un ba'yel ta xcac' atojic lec ti c'usi chopol laj xa apasique, xchi'uc ti amulique. Laj asoquesic ti cosil jbanomil yu'un ti j'ac'-ib-o'nton chamem loc'obbailetique. Ta scotol ti banomil laj cac'boxuc ti c'ot ta arextoic cu'une, laj apasic ti c'usi mu jc'an jq'uelbe sate.”

Ti Jeremiase ta sc'anbe vocol ti Diose

¹⁹ Cajval, vo'ot ti jmuc'ul jtsatsalote, ti jpojobbailote, ti jnac'obbailot ta yorail ti xi'bal sba ta xc'ot ta pasele. Ta xtalic ta atojol muc'tiquil lumetic le' to ta jot xchiquin banomile, ti xi ta xalique: “Ti diosetic ti yich'ojic comel ti jtot jme'cutic ta vo'nee, mu'yuc c'usi xu' yu'unic, ch'abal smucul stsatsal.

²⁰ Bu la xata ti stac' ta smeltsan cuxul dios ti viniquetique. Ti xu'uque, ma'uc dios ti laj smeltsane.”

²¹ Xi laj stac' sutel ti Diose: “Jech o xal un, j'ech'el ta xcac' iluc ti jmuc'ul jtsatsale, ja' to jech ta xana'ic jc'oplal ti vu'un Diosune.