Jeremías 12 - Bible in Tzotzil de Chamula

Ta stac'be sutel sc'opojel Dios ti j'alc'ope

¹ Dios, mi xivulvun no'ox liquel ta stac'belote, oy ono'ox stuq'uil ti c'u s'elan ta xavale. Manchuc mi jech un, oy jaybeluc ta jac'bot ca'i un. ¿C'u cha'al ya'yel lec no'ox oyic ti buch'u mu'yuc xch'ulel xa'i sbaique? ¿C'u cha'al jun yo'nton cuxulic ti jpayc'opetique?

² Ats'unojan, ta x'ibelinic batel avu'un; ta xch'iic, ta x'esomajic ech'el avu'un. Oy no'ox ta ye ta sti' ta slequil-c'optaelot, ja'uc ti yo'ntonique, nom oy ta atojol

³ Ja'uc ti vo'ot une, Dios, xavojtiquin buch'uun. Xana' xavil c'u s'elan ti jol co'nton ta atojole. Co'oluc s'elan chij, ic'o batel ta smilobil ti jnaclejetic li'e, ti ac'biluc xa senyail avu'un ta sta sc'ac'alil ti yorail smilele.

⁴ ¿C'u to sjalil ta xbat avu'un taquijem ti banomile, ti nucultajem ti c'usitic yaxbalan to ox ta osiltique? Yu'un ti chon bolometique, ti mutetique, ta xchamic ta scoj ti jelav xchopolalic ti jnaclejetic ta jteclume, ti yalojic mu xavil ti c'usi ta spasique.

Ti Diose ta stac' talel ti c'ope

⁵ Xi laj yalbun ti Diose: “Jeremías, mi nom xa xaquilcun ta slubiel ta be ti buch'u ta yoc no'ox ta x'anilaj ech'ele, ¿c'usi ta xavut ta xalubi comel ta be ti cajalic ta ca'e? Mi mu junuc avo'nton ta xava'i lamajem to ti banomile, ¿c'usi ta xapas c'alal oyot ta chuculaltic yu'un ti uc'um Jordane?

⁶ Yu'un avinquileltac no'ox, junoxuc ta na xchi'uc, ta spay ac'oplal, xbic'tal c'opojic xa ta apat ta axocon ti sbiselot ta cotol chavale. Laj to c'op ma' ti xapat xa avo'nton ta stojol unbi, manchuc mi jun xa yutsil ti ye sti'ic ta xasc'oponique.

Ti oy c'usi q'uelel talel ta stojol steclumal ti Diose, ta xat yo'nton yu'un

⁷ “Laj xa jip jten comel ti jteclumale; laj xa jbaj ti c'otem to ox ta cu'une. Ti muc' ta lum ti mu tuch'baj ta co'nton to oxe, laj xa cac'beic ta sc'ob ti yajcontraique.

⁸ Ti jteclum ti c'otem to ox ta cu'une, co'ol s'elan león ta te'tic ti xlocoquet no'ox snuc' ta xiscontrainune, jech o xal laj quiltaic un.

⁹ Ti jteclumale, co'ol s'elan mut c'upil sba ti sc'uc'umale, ti ta xich' contrainel yu'un ti yan mutetique. La', acotolic abnal chon bolometic, volo abaic talel ta muc' ta ve'el.

¹⁰ Yepal no'ox jcontrainvanej banquilaletic ta soques ti jts'unubal uvae, ta xpech'ilanel ta teq'uel ti cosile. C'ot xa ta sbajtical banomil yu'un, ti banomil ti juteb ta co'nton ta j'ech'ele.

¹¹ Sbajtical banomil laj yictaic comel, sts'ijlajan xa ta j'ech'el, xcha'na'ic xa ta xquil un. Sts'ijlajan sjunul ma' ti muc' ta lum une. Mu junuc ta stij yo'nton yu'un.

¹² Ta scotol ti vitstic ta sbajtical banomile, vulic ta loq'uel pucujil viniquetic ta slilinel ta sjoylejal ti muc' ta lume, yu'un oy ta coc ta jc'ob ti quespada ti vu'un Ajvalilune. Mi junuc oy ma' ti lamajem ti c'op ta stojole.

¹³ Ti laj sts'unic ti trigoe, naca ch'ix laj staic ta tsobel. Jeche ech' ti svocol xlub xcham ti yoc sc'obique. Mu'yuc c'usi laj sbalinbeic ma' ti ts'unubajique ta scoj ti tilem ti sc'ac'al co'ntone.”

Ti jteclumetic sts'aquinoj sba xchi'uc ti Israele oy c'usi ta x'ac'batic yu'un ti Diose

¹⁴ Ti jteclumetic ti mu'yuc xch'ulel xa'i sbaic sts'aquinoj sba xchi'uc ti Israele, ti laj slilinic ti banomil ti laj yac'be ta xrextoic steclumal ti Israele, xi ta x'albatic yu'un ti Diose: “Vu'un ta jbec' loq'uel ta sbanomilic, xchi'uc ta jbec' loq'uel ya'i ti Judá ti capaloxuc xchi'uque.

¹⁵ Mi laj xa jbec' loq'uel une, ta xlic c'uxubajuc co'nton yu'unic. Ta sutic talel cu'un ti ta yosil sbanomilic ono'oxe.

¹⁶ Ti stuquique yu'un ja' laj yac'beic yil ti jteclumal ti sva'aneluc ta rextico ti Baale. Tana le' une, xu' jmoj ta xnaquiic xchi'uc ti jteclumale, mi ta xc'ot ta yo'ntonic ti c'u s'elan xch'unojic ti jteclumale, xchi'uc mi xi ta xal c'alal ta sva'an sbaic ta rexticoe: ‘Cuxul ma' ti Dios une.’

¹⁷ Ti muc' ta lum ti mu xiyaq'uic ta venta une, ta jpits loq'uel xchi'uc yibel ta stubbel ti sc'oplale. Ti vu'un Diosune, j'ech'el mu stselbuj ti jc'ope.”