Jeremías 11 - Bible in Tzotzil de Chamula

Ti tratee laj yich' soquesbel sc'oplal

¹ Xi laj yalbun ti c'opoj talel ti Dios ta jtojol ti vu'un Jeremíasune:

² “Ti israeletique, ac'o sts'etan lec xchiquinic bu c'alal ta xac' ta na'el ti trate li'e. Albo ti jnaclejetic ta Judae xchi'uc ti jnaclejetic ta Jerusalene,

³ ti vu'un Ajvalil Diosun yu'un ti Israele, ta xcal ta jamal ti buch'uuc no'ox ti mu xc'ot ta pasel yu'un ti oy c'usi ta xal ti jtratee, sve'el bac vocol le'e, xichi ta stojole.

⁴ Ja' ono'ox ti jtrate laj jpas ta stojol ti atot ame'ic ta vo'nee, ti c'alal laj jloq'uesic talel ta Egiptoe, ta jun muc' ta lum ti bu co'ol s'elan yunijesobil taq'uin jorno ti c'ot ta stojolique, ti xichi laj calbeique: Aq'uic ta venta ti c'usi ta xcale. Pasic scotol jech c'u cha'al ti c'usi ta jc'ane. Jech ta xac'otic ta jteclumal, ta xic'ot ta Dios avu'unic ec.

⁵ Mi ta xavac'beicun ta ventae, ta xc'ot ta pasel cu'un ec ti jtrate ti laj jva'an jba ta yalel ti ta xcac'beic banomil ti atot ame'ic ta vo'nee, banomil ti bu avich'ojic tana le'e, ti bu co'ol s'elan vo' xbein no'ox ti chu' vacaxe xchi'uc ti ajapome.” Xichi laj jtac' ec une: “Jechuc, Cajval.”

⁶ Va'i un, ti Diose xi laj yalbune: “Ti c'op li'e, puco batel ta jteclumetic yu'un ti Judae xchi'uc ta calleetic yu'un ti Jerusalene. Xi xavalbe ya'i ti jnaclejetique: ‘Chiquintao ava'i lec ti c'u s'elan ta xal jujubel ti trate li'e. C'otuc ta pasel avu'unic un.

⁷ C'alal laj jloq'uesic talel ta Egipto banomil ti amolmuc'totic ta vo'nee, laj ono'ox jcaj'albeic ya'iic ti ac'o xiyaq'uicun ta ventae, ti jech o ta jcaj'alilan talel tana li'e.

⁸ Mu'yuc laj yac'beicun ta venta. Mi ja'uc laj xch'unbeicun. C'ajomal no'ox pucujib yo'ntonic, ti sujoj sbaic ta spasel ti c'usi chopole. Mi ja'uc loc' ayan ta yo'ntonic ta spasel ti bu c'alal caloje. Jech o xal laj cac' taluc ti lamal c'ot ta sbaic ti tsitsel ti albil ta jtratee.’ ”

⁹ Ti Diose xi lic yalolanbune: “Ti jnaclejetic yu'un ti Judae xchi'uc ti jnaclejetic yu'un ti Jerusalene, joybijic xa ta cajcontra.

¹⁰ Yu'un jech laj xa sta smulic ec jech c'u cha'al laj spasic ti stot sme'ic ta vo'nee. Mi ja'uc laj xch'unic ta spasel ti c'usi ta jc'ane. C'ajomal no'ox laj sts'acliic yan diosetic, ti lic snijan xchiman sbaic ta yich'el ta muq'ue. Ti Israele xchi'uc ti Judae, co'ol c'ot ta soquel yu'unic ti jtrate ti jpasoj ta stojol ti stot sme'ic ta vo'nee.

¹¹ Ja' yu'un ec un, ta jtac talel ta stojolic ti cuxul j'ilbajinvanej vocol ti mu junuc ta xcole. Ac'o mi x'avetic ta sc'anic pojel, mi ja'uc ta jtac'beic. Ti vu'un Diosune, mu stselbuj ti jc'ope.

¹² Va'i un, ti jnaclejetic ta Judae xchi'uc ti jnaclejetic ta Jerusalene, bat sc'anic coltael ta stojol ti diosetique, utsuc xa xac'beic ti pome, c'alal mu'yuc c'usi xu' yu'unic ta pojvanej mi vul ta loq'uel ti cuxul j'ilbajinvanej j'ac'-vocole.

¹³ Yu'un yajdiostac ti Judae, co'ol yepal jech c'u cha'al yepal ti jteclumetic yu'une. Ti jnaclejetic yu'un ti Jerusalén eque, mu xa ono'ox albajuc yepal ti altaretic yu'unic yo' ta xchic'beic pom ti dios Baale, ti co'ol yepal jech c'u cha'al oy ti calleetic yu'un ti jteclume.

¹⁴ Ja' yu'un un, Jeremías, mu xatic' aba ta c'opojel ta ti'inel ta sventa ti jteclumetic li'e. Ma'uc me ti utsuc xa xava'an aba ta c'opojel ti'inel ti xavocolet ta sc'anel ti spojelique. Yu'un mu'yuc ta jtac'beic sc'opic ti c'alal ta sc'anic coltael ti ta xvul ta loq'uel ti cuxul j'ilbajinvanej j'ac'-vocole.

¹⁵ “¿Mi oy yu'un oy c'usi ta sa' ta jch'ulna ya'yel ti Israel ti xitic no'ox s'elan xquil jbacutic ti c'alal mu albajuc chopol c'usi laj spase? ¿Mi yu'un yac'touc ta sventa no'ox xepu' xchi'uc sbec'tal milbil chon bolometic ti utsuc xa xiyac'bun yo' ta spoj o sba ti vocol lamal ta xvul ta stojole?

¹⁶ Ti le' talel ta vo'nee, ti vu'un Diosune, sbiinoj to ox cu'un muc' ta limil olivo te' ti c'upil sbae, ti xcuchojan no'ox ti sate. Tana une, xc'avlajet ta xmaje ta chauc. Ta jchic'be ti yanale. Ta jecbe ti sc'obtaque.

¹⁷ “Ti Diosun ti scotol xu' cu'une, laj cal mantal ti lamal ta xc'ot ti cuxul j'ilbajinvanej j'ac'-vocol ta stojol ti c'usi laj jts'une, ta scoj ti oy c'usi chopol laj xa spas ti jteclum Israele, xchi'uc ti jteclum Judae. Yu'un laj soquesbeicun co'nton ta scoj ti laj yac'beic matanal chic'bil pom ti Baale.”

Nopbil sc'oplal ta xmilat yu'un yajcontra ti Jeremiase

¹⁸ Ti Diose laj yac'bun jna', yu'un laj sjambun jba jsat yo' ta xquil ti oy c'usi chopol ta snopic ti cajcontrataque.

¹⁹ Ti vu'une ca'binoj jba jech c'u cha'al ic'bil ta xbat ta smilobil ti chije. Muts'ul jba jsat yu'unic ti yacal ta xchapic ti jc'oplale. Yu'un xi ta xalique: “Jlomestic xa ya'i ti te' le'e, ti stsacoj xa lec yipe. Jtubbetic ya'i sc'oplal ta stojol ti jnaclejetic li' ta banomile yo' jech mu'yuc xa buch'u ta svulesat ta o'ntonal.”

²⁰ Ti vo'ot une, Dios, ti scotol xu' avu'une, jun tuq'uil jchapanvanejot, xavojtiquin bu c'alal pajem xnopnun sjol ti vinique. Ac'bun quil ta jba ta jsat c'u s'elan ta xatsits ti jnaclejetic le'e, yu'un laj xa cac'bot ta avoc ta ac'ob ti jc'oplale.

²¹ Manchuc mi jech un, ti viniquetic nacalic ta jteclum Anatote, ta xismilic ya'iic. Laj yalbeicun ti mu xa xic'opoj ta sventa ti Diose. Ti mi mu jpajes jbae, ta xismilic un.

²² Le'e, xi laj yalbun ti Dios ti scotol xu' yu'une: “Xi s'elan ta xcac' c'otuc ta stojolique: Ti jva'lej viniquetique ta xchamic ta leto. Ti squerem stsebique ta xchamic ta vi'nal.

²³ Scotol ta xtub sc'oplalic. Ta xc'ot yorail ta jbain ta xchapanel ti viniquetic yu'un ti jteclum Anatote. Ta xcac' taluc ta stojolic ti cuxul j'ilbajinvanej j'ac'-vocole.”