Isaías 8 - Bible in Tzotzil de Chamula

Ti jun xnich'on Isaíase ta xc'ot ta senyail c'op

¹ Ti Diose xi laj yalbune: “Sa'o jpechuc muc'ul tenel-te'. Ta xats'iba letraetic ti xchiquintaj no'ox yu'un ta a'yibel smelol ti buch'uuc no'ox xojtiquin ti xi ta xale: ‘Maher-salal-hasbaz.’

² Ta tsacal to un, ic'o batel ti c'otuc ta rextico ti pale Uríase, xchi'uc ti Zacarías xnich'on ti Jeberequíase.”

³ Ech' nan c'u sjaliluc un, lic jchi'in ti me' j'alc'op ti ja' cajnile, ti lic nabiuc ti yole, ti ja' jun querem laj yilbe sate. Va'i un, ti Diose xi lic yalbune: “Sbiinojuc c'otuc avu'un ti Maher-salal-hasbaze.

⁴ C'alal mu to ta xloc' ta alel yu'un ‘tot, me'’ ti xie, ti lum Damascoe xchi'uc ti lum Samariae, ta x'elc'anbatic loq'uel ti sc'ulejalique. Jech ti sc'ulejalique, ta x'ich'batic batel ta stojol ajvalil yu'un ti Asiriae.”

⁵ Xi to lic yalbun xtoc ti Diose:

⁶ “Ti oy xi'el ta xava'iic yu'un ti Rezine xchi'uc xnich'on ti Remalíase, ta scoj ti laj abajic ti Dios ti co'ol s'elan naca sta sts'ananet ta xanav ti vo' ti oy ta Siloe,

⁷ ta xamut'iatic yu'un Dios ti mu no'ox albajuc xbitomaj no'ox ta xtal jech c'u cha'al yoc ti uc'um Eufratese. (Taje, ja' slo'il ya'yejal ti ajvalil yu'un Asiria ti toj ech'em tsots xu' yu'une). Yu'un ta xnoj muyel ti bu ono'ox c'alal ta x'ech'e, ti ta xmal batel ta scotol ti jujujot sti'il ti uc'ume.

⁸ Ta x'ech' ta Judá, ta smut'i, c'alal to nuq'uil xtits'et c'otel ti vo'e. Yu'un co'ol s'elan jcot mut xlich'oj xic' ta smac scotol ti avosil abanomile, Emanuel.”

⁹ Tsobo abaic un, muc'tic lumetic, batuc ach'ulel ta xi'el; chiquintao ava'iic ti xi s'elan ta xich' alele, scotol lumetic ti liquemoxuc talel ta nome: ac'o mi avac'ojbeic yipal ta stsaquel ma' ti avabtejebique, batem xa ach'ulelic ta xi'el. Jech un, ac'o mi avac'ojbeic yipal ta stsaquel ti avabtejebique, batem xa ach'ulelic yu'un ti xi'ele.

¹⁰ C'otuc xa ta nopel avu'unic ti c'usi sc'an pasele, ta xc'ot ta soquel ta be; abtelano xa avilic ti c'usi sc'an pasele, mu'yuc xc'ot ta pasel, yu'un sva'anoj sba ti Dios ta jtojolcutique.

Ti buch'u sc'an xi'talele, ja' ti Diose

¹¹ Tsots laj svuyilanun ti Diose. Laj sbijubtasun ti mu jchan ta stamel batel ti bu stamojic batel ti jnaclejetique. Xi laj yalbune:

¹² “Mu xavalic ti mucul paybil xa sc'oplal scotol jech c'u cha'al ta xalbeic sc'oplal ti jteclum ti mucul paybil xa ti sc'oplale. Mu xbat ach'ulelic yu'un. Mi ja'uc stsic' avo'ntonic yu'un ta scotol ti c'usitic ta xi'ic yu'une.

¹³ Xi'taic ti Dios ti scotol xu' yu'une, yu'un ch'ul Dios ta j'ech'el. Tsotsuc sc'oplal, xi'taic. Oyuc xi'elal ava'iic ta stojol.

¹⁴ Ti stuque, co'ol to s'elan pets' ta sjoybin sba ta atojolic. Co'ol s'elan ta xc'ot ta jbej ton ti macal ta xc'ot avacanic yu'une. Ta xc'ot ta pasel ta xyal ta lum yu'un ti chib ajvaliletic yu'un ti Israele. Ta xc'ot ta pets' ta syacobilic ti jnaclejetic yu'un ti jteclum Jerusalene.

¹⁵ Ep ta sbosi yacanic xchi'uquic ti ta xyalic ta lume, ti ta xchamic o xchi'uquique. Ep ta stsaqueic ta pets' ti mu xcolic loq'uele.”

Ti Isaíase ta scaj-bijubtas ti yajchanc'optaque

¹⁶ Bejluc me ta ajol avo'ntonic ti c'op li'e; avo'ntonuc no'ox me sna' ti c'u s'elan laj avich'ic tojobtasele, ti laj avich'ic chanubtasel cu'une.

¹⁷ Ac'o mi snac'oj xa sba ti mu xa xac' sba iluc ti Dios ta stojol steclumal ti Jacobe, jpatoj co'nton ta stojol. Yu'un laj xa cac' jol co'nton ta smalael ti oy c'usi ta jta yu'une.

¹⁸ Ti vu'une xchi'uc ti calab jnich'nab ti laj yac'bun ti Diose, lic'otcutic ta senyail ti ch'ayal ta xc'ot o'ntonal yu'un ti Israele, ti ja' yabtel stuc ti Dios ti scotol xu' yu'une, ti nacal ta vits Sione.

¹⁹ Mu stselbuj ma' ti xi ta xlic yalbeic ti jnaclejetique: “Jac'o abaic ta stojol xch'ulel ti animaetique, xchi'uc ta stojol ti jt'unvanejetic ti mu a'yibaj ti c'usi ta xloc' ta yeique, ti ts'etel xa xchiquin ta xa'i ti c'usi ta st'une. ¿Mi yu'un la mu xu' ta st'un sba ta stojol sdiostac ti jun lume? ¿Mi yu'un la mu xu' ta st'un sba ta sc'anel bijubtasel ta stojol animaetic ta sventa ti buch'u cuxulic toe,

²⁰ yo' jech ta staic tojobtasel, mi ja' ti oy c'usi xu' ta x'albatique?” Ta j'ech'el jeche' ono'ox ti ta xc'opojique, ti c'usi ta xalique, jeche' no'ox lo'il a'yej.

²¹ Ti jnaclejetique xloc' x'ochic no'ox batel, ilbajinbilic, mu x'ech' xjelav ta xa'iic ti vi'nale. Ti jech mu x'ech' xjelav ta xa'iic ti vi'nale, ta xlic pucujibuquic xchi'uquic. Ta xlic sbisic ta cotol chaval ti ajvalil yu'unique, ti sdiosique. Ti stoy xa satic ta toyole.

²² Ts'acal to xtoc un, ta sq'uelic xa yalel ti banomile. Ta xilic ti mu'yuc xa c'usi x'ayane, ti c'ajomal no'ox ti me'un mu'natile, ti ilbajinele, ti mu x'ech' xjelav ti vocole, ti ic'uneb ti osil banomil ta scoj ti vocole, ti ic'uneb ti osil banomil ta xa'iic scotolique. Ti buch'u ilbajinbilique, mi ja'uc xa ta sta spojel scolelic.