Isaías 61 - Bible in Tzotzil de Chamula

Ta xcaj'albat sc'oplal coltael ti Israele

¹ Xcuxlejal ti Diose oy ta jtojol, yu'un lic'ot ta yajtunel ti Diose. Tacbil lital yu'un ta yalbe ya'i ti me'un mu'nate ti oy c'usi lec ta xc'ot ta stojolique, ta xcuchbel svocolic ti buch'utic mu xnel mu x'ech' ta xa'iique, ta scaj'albel sc'oplal scolelic ti c'usiuc no'ox chuculic o yu'une, sc'oplal scolelic ti jchuqueletic ti oy ta chuquinabe.

² Tacbil lital ta yalbel ya'iic ti ja' xa sjabilal vul ta loq'uel ti mu laj yil ya'iic ta sva'an stec'an sba ti Dios ta stojolique, sc'ac'alil ti ta spacbe sutel Dios ti laj yilbotic jvocoltic ti cajcontratique. Tacbil lital yu'un ta spatbel yo'nton scotol ti buch'utic oyic ta vul o'ntone,

³ ta yac'bel sronail sjolic ti buch'u oyic ta vocol ta lum Sión ti q'uelel ta stojolic ta svijbe sbaic ti tanil c'oq'ue, ta yac'bel muil poxil sventa muyubajel ti q'uelel ta stojolic ti oq'uel avanele, ti ta xjoybij ta laetel q'uejimol yu'unic ti lajemic xa ta xa'iic ta banomile. “Jtsalvanej c'an tulan ma' le'e”, xi sc'oplal yu'unic. Ts'unbil yu'un Dios yo' jech ta svinajes ti yutsilal slequilale.

⁴ Ta xlic yich' cha'va'anel ti c'usitic vo'ne xa jineme. Ta xich' va'anel liquel ti naetic vo'ne xa lilijeme. Ta xlic xq'uextaic ta meltsanel ti bu soquemic ta jinel ti jteclumetique.

⁵ Ti jyanlumetique ta x'ochic ta sq'uelel xchabiel ti achijique, ti avosilique, xchi'uc ti ts'unubal avu'unique.

⁶ Ti vo'oxuc une, ta xa'albat ac'oplalic paleoxuc yu'un ti Ajvalile, jtuneloxuc yu'un ti Dios cu'untique. Ta xatunesic ta sc'upinel sc'ulejal ti yan muc'tiquil lume, xach'aletic no'ox ta xac'otic xchi'uc ti slequilalique.

⁷ Ti jech mu no'ox albajuc laj yich' svocol ti jteclumale, ja' jech yepal ta sta ti sc'ulejal ti sbatel osil xmuyubaj ta sc'upinele.

⁸ Yu'un ti Diose xmuyubaj no'ox xchi'uc ti tuq'uil jol o'ntonale. Ta scontrain ti elec'ale xchi'uc ti c'usi ta x'ac'van ta lum ach'ele. Ti stuque, ta yutsil yo'nton ta xac' ta ich'el ti matanale, ti sbatel osil ta xcom o ti trate ta spas ta stojolique.

⁹ Ti snitilultaque, stuc no'ox ti cajal sc'oplalic ta xc'ot ta stojol ti yan muc'tiquil lume. Scotolic ti buch'utic ta xile, ta xlic ya'i ta yo'ntonic ti ja' jun lum sva'anoj sba ti Dios ta stojolique.

¹⁰ Bats'i xlaet no'ox co'nton ta stojol ti Diose. Ximuyubaj no'ox ta xca'i ta stojol ti Dios cu'une. Laj jta yu'un ti coltaele, ¡jc'u'inoj c'ot yu'un ti tsalvaneje! Co'ol j'elan junuc jlecomajel laj jlap ti sronail jole, mi co'ol s'elan jlequel tseb ti ta xch'al sba ta stunesel ti c'usitic alaq'uic sba oy yu'une.

¹¹ Jech c'u cha'al ti oy c'usi ta xvoc' ta banomile, ti potol no'ox ti sq'uelom ta yavil ts'unbil nichime, ja' jech ta xvul ta loq'uel yu'un Dios ti tsalvaneje. Scotol ti muc'tiquil lum une, xlaetic no'ox liquel ta jun lametel q'uejimol.