Isaías 60 - Bible in Tzotzil de Chamula

Yutsilal liquel ti ach' Jerusalene

¹ Tamo aba liquel, Jerusalén, tixetuc liquel ti alequilal ti oy ono'ox ta atojole, yu'un vul xa ta loq'uel ti saquilal osil avu'une, ti xtixet xa vulel ta atojol yutsilal ti Diose.

² Ti ic'al osile smacoj sjunul ti banomile. Ti ac'ubaltique oy ta stojol ti muc'tiquil lumetique. Ja'uc le' une, xtixet no'ox liquel yutsilal ti Dios ta atojole, yu'un ta atojol ta xvinaj ti yutsilale.

³ Ti muc'tiquil lumetique ta xnopajic ta stojol ti saquilal osil avu'une. Ti ajvaliletique ta xtalic ta stojol ti co'ol s'elan xtixetel sob ic'luman ti avutsilale.

⁴ Xi xatoy ti asate, q'uelo batel avil ta jujujot. Scotolic ta stsob sbaic, xvoletic no'ox talel ta atojol. Ta nom ta xtalic ti aqueremtaque. Ic'bil ta xtalic ti atsebtaque.

⁵ Ti jech ta xavil une, xvic'luj to asat ta muyubajel yu'un, ti spajeb to xamuyubaj ta xac'ot yu'une. Ta xich'boxuc talel ti c'usi toyol stojol laj stabeic talel ti jnaclejetic ti oyic ta ti' nabe. Ta xac'boxuc ta avoc ta ac'ob sc'ulejalic ti muc'tiquil lumetique.

⁶ Ta xavil ta aba ta asat ti c'ulul ta xvul ta atojol ti epal camelloetic ti lic talel ta lum Madiane, ti lic talel ta Efae. Ti nacalic ta Sabae ta xtalic scotolic ti xcuchojic talel ti oroe xchi'uc ti pome, ti ta xalic ta jamal yutsilal yabtel ti Dios laj spase.

⁷ Scotol ti chijetic ti oyic ta Cedare, ta xc'ot ta avu'un. Ti tot chijetic ti oyic ta Nebaiote, ta xc'ot ta avajtuneltac ta yaq'uel ti matanal ta stojol Dios ta sba ti altar yu'une, ti jun yutsil ta j'ech'el ta to sts'acubtasic yutsilal ti xch'ulna ti c'alal jun ono'ox yutsile.

⁸ ¿Buch'uic le'e ti xvoletic no'ox jech c'u cha'al xtemet talel ti toque, ti co'ol s'elan paloma jmoj xvoletic no'ox liquel ti ta xbat ta svayebique?

⁹ Barcoetic ti jmoj xnuletic talele, ti jba'be talel ti barcoetic yu'un ti lum Tarsise, ti yic'ojic talel ta nom ti avalab anich'nabe, jmoj xchi'uc ti oroe, ti plata yu'unique, ta yich'el ta muc' ti Ajvalile, ch'ul Dios yu'un ti Israele, ti xtixet lac'ot ta yutsilale.

¹⁰ Naca jyanlum ta xcha'meltsanic ti amoctaque, ti ta xac' sbaic ta tunel ti ajvaliletic yu'unique. Ac'o mi laj stsitsot ta sc'ac'al yo'nton ti Diose, avi tana une, ta sventa ti oy slequil yutsil yo'ntone, tal to xc'uxul yo'nton ta atojol.

¹¹ J'ech'el jamal o liquel ti ti'naetic avu'une. C'ac'al ac'ubal mi jliqueluc ta xich' maquel yo' jech xu' ta xich'ic talel sc'ulejal ti muc'tiquil lume, ti xvoletic no'ox ochel ti ajvaliletic xchi'uc ti yajtuneltaque.

¹² Ti muc'tiquil lum ti mu xac' sba ta tunel ta atojole, ta xich'ic tsutsesel. Sjunul muc'tiquil lum, ch'ab xi sc'oplal.

¹³ Ti Diose xi ta xalbe ti Jerusalene: “Xi s'elan ta xvul ta atojol ti c'usitic jun yutsil x'ayan ta vits Líbanoe: ti tojetique, ti abeto te' sbie, ti nucul-pate, yo' jech c'upil ta q'uelel ti jch'ulnae, ti tixil no'ox yutsil ti bu ta jtec'an ti coque.

¹⁴ Xnich'nabic ti buch'u laj yil ti avocole, ta xtal sbic'tajes sbaic ta atojol. Scotolic ti buch'utic laj sjip laj stenote, ta xtal squejan sbaic ta avoc ti xi ta xalbote, ‘Steclumalot ti Ajvalile’, ‘Sión, steclumal ch'ul Dios yu'un ti Israele’.

¹⁵ “Laj sc'oplal ti jipbil tenbilote, ti ti'joltabilote, ti atuc oyote. Xatixet no'ox liquel cu'un sbatel osil. Sbatel osil, xmuyubaj no'ox liquel o'ntonal avu'un.

¹⁶ Ti c'usitic jun yutsiquil ve'lil ta stun slajesic ti muc'tiquil lumetique, ta x'ech' ta ave ta ati' yu'un. Ta xich' talel ta atojol ti sc'ulejalique. Ta xlic avojtiquin ti vu'un Diosun jcoltavanej avu'une, ti muc'ul Ajvalilun yu'un ti Jacob ti jpojvanejun avu'une.

¹⁷ “Ta sventa ti c'anal taq'uine, oro ta xcac'bot. Ta sventa ti tsatsal taq'uine, plata ta xcac'bot. Ta sventa ti c'usi naca te' no'oxe, c'anal taq'uin ta xcac'bot. Ta sventa c'usi naca tonetic no'oxe, tsatsal taq'uin ta xcac'bot. Ja' ta xc'ot ta pasel cu'un ti ventainbilucot yu'un ti lamajem o'ntonale, ti tojobtasbilucot yu'un ti c'usi lec tuc' ta pasele.

¹⁸ Laj sc'oplal ti naca ilbajinel xvochvun no'ox ta alumale. Ti bu c'alal smacoj ti avosilale, laj sc'oplal ti tsutsesel ta stojolique, ti stuc slilijemal busul ta xcome. ‘Jpojobbail ma' le' une’, xachi ta xavalbe sc'oplal ti amoque. ‘Stoyel xi'el Dios ma' le' une’, xachi ta xavalbe sc'oplal ti ti'naetic avu'une.

¹⁹ “Ti ta c'ac'altique, mu xa tsotsuc sc'oplal liquel ti xchijlajan no'ox xojobal ti c'ac'al ta atojole. Ti xojobal u ta ac'ubaltique, mu xa tsotsuc sc'oplal ta xava'i. Yu'un ti vu'un Ajvalilune ta xic'ot ta saquilal osil avu'un sbatel osil, ti xatixetic no'ox liquel ta jtojol ti vu'un Diosun avu'une.

²⁰ Ti xojobal c'ac'al ataoje, mu sna' xch'ay batel. Ti xojobal u ataoje, mu xyam ti saquilale. Yu'un ti vu'un Diosune lic'ot ta saquilal osil avu'un sbatel osil. Laj to me sc'oplal yorail sc'ac'alil ma' ti vul o'nton avu'un une.

²¹ “Scotol ti lum avu'une, ja' jun jnaclejetic ti sna' x'ich'vanic ta muq'ue, ti c'otic ta yajval ti yosil sbanomilic sbatel osile, sq'uelomtac xa ts'unubal ti laj jts'une, ti laj cabtelan ta coc ta jc'obe yo' jech ta xvinaj ti cutsilal jlequilal yu'unique.

²² Ti jvoc' ti xi yuni epalic li'e, ta jech yepal, lajuneb ciento (1,000) xc'ulet liquel. Ti jun chib uni jvoc' li'e, ta xc'ot cu'un ta jun muc' ta lum. Vu'unun ti Ajvalile, ta yorail no'ox c'otuc ta pasel cu'un ti c'alal ta sta ti sc'ac'alile.”