Isaías 6 - Bible in Tzotzil de Chamula

Tabil ta iq'uel ti Isaíase

¹ Ta sjabilal c'alal cham ti ajvalil Uzíase, laj quil ti Dios ti chotol ta jun toyol chotlebale, ti smacoj sjunul ch'ulna ti sti'iltac sc'u'e.

² Ti ta yac'ole, oy jayibuc c'usitic cuxul ti co'ol s'elan c'oc' yilele. Oy vaquib xiq'uic ti jujune. Chib xic' ta smac o ti yelov satique. Chib xic' ta smac o ti sbec'tal stacopale. Chib xic' ta xvilic o xchi'uquic.

³ Xi ta xalbe sbaic ti jujune: “Ti ch'ul Dios ti scotol xu' yu'une, oy xch'ul lequilal, oy xch'ul lequilal. Smacoj sjunul banomil ti slequilal yutsilale.”

⁴ C'alal jech tsots ti sc'opojele, nic sti'tac ti ch'ulnae. Noj com ta ch'ail ti ch'ulnae.

⁵ Xichi laj jnop une: “Mu xa ono'ox cha'bel un, ta xicham, yu'un laj xa quil ta jba ta jsat ti Ajvalil Dios ti scotol xu' yu'une, ti c'alal vinicun no'oxe, ti mu'yuc smelol ti c'usi ta xloc' ta que ta jti' ti li' jmoj nacalun xchi'uc ti jnaclejetic ti mu'yuc smelol ti c'usi ta xloc' ta ye ta sti'ique.”

⁶ Ta jech no'ox yepal un, ti jun ta scotol ti c'usi cuxul ti co'ol s'elan c'oc' yilele, xvilil talel ta jtojol ti bu oyune. Slots'oj ac'al ta stsacobil ti laj stam ta sba ti altare.

⁷ Ech' snabanbun ta que, ti xi laj yalbune: “A'yio ava'i, ti ac'al ti laj yich' nabanel ta avee, c'ot ta tubbel ti achopolale, ti ch'aybil c'ot ti amul acolo'e.”

⁸ Va'i un, laj ca'ibe sc'opojel ti Dios ti xi ta xale: “¿Buch'u ta jtac batel xana' un? ¿Buch'u ta x'och ta j'alc'op cu'untic?” Xichi laj jtac'bee: “Li' oyune, tacun batel.”

⁹ Xi laj stac'bune: “Batan, ti xi xcholet xavalbe ya'i ti lum jech c'u cha'al li'e: ‘Ac'o mi avac'ojbeic yipal ta ya'yiel, mi ja'uc xava'ibeic ti smelole; ac'o mi avac'ojbeic yipal ta sq'uelel, mi ja'uc xchiquintaj avu'unic.’

¹⁰ Yanijesbo snopobil yu'unic ti lum li'e. Macbo ti xchiquinique, macbo ti satique, yo' jech mu xilic, mi ja'uc xc'ot ta yo'ntonic ti lo'il a'yeje, yo' jech mu sutic talel ta jtojol ti ta xc'ot ta pasel ta jpoxtaique.”

¹¹ Xichi laj jac'be une: “¿C'u sjalil ta xjoc'tsaj taj une, Cajval?” Xi laj stac'bune: “Ja' to ti c'uxi lilijem ta xcom ti lumetic ti mu xa junuc nacal ta snaic ti jnaclejetique, ti mu xa junuc ti jnaclejetic ta nae, ti ta xcom ta sbajtical ti osil banomile,

¹² ti tenbil ta xloq'uic batel ta steclumalic yu'un Dios ti jnaclejetique, ti sts'ijlajan ta xcom ta j'ech'el ti muc' ta lume.

¹³ Ti mi oy ta xc'ot ta pasel ti cuxul ta xcom lajunvoc'uc ti lume, ta xich' tsutsesbel sc'oplal xtoc jech c'u cha'al ta xich' lomesel ti c'an tulane, mi ja' ti tulan ti c'ajomal xa xchumanil ta xcome.” (Ja'uc ti ta xchumanil une, ta xlic ayanuc sq'uelom ti t'ujbil ta xc'ote.)