Isaías 59 - Bible in Tzotzil de Chamula

Smul scolo' ti Israele xchi'uc ti tsitsel ta xich'e

¹ Ti smuc'ul stsatsal Diose, mu'yuc ch'ayem ti jelavem xu' yu'une. Ma'uc ta xcaltic ti mu xa xu' yu'un ta pojvaneje. Mu yu'unuc pas xa ta cocorix. Ma'uc ma' ti xcaltic mu xa yu'un xa'i ti c'usi ta xich' alele.

² Ti bu lic valopatinel comel avu'unic ti Diose, ja' yabtel mulil colo'il ti me'inem avu'unic ta sa'ilanele. Ta scoj ti amulique, laj snac' ti sat avu'unique, jech laj smac sni' xchiquin.

³ Yu'un ti avoc ac'obique, balal ta ch'ich'. Mu ch'anuc xi sni' ac'obic ta milvanej. Yeilaluc avu'unic ti jutbil c'ope. Yeilaluc avu'unic ti acvanej ta mulile.

⁴ Yu'un mu'yuc buch'u junuc ti ja' melel ti c'usi ta xale. Mi ja'uc ta yutsilal yo'nton ti tuc' ta xchapanvane. Ja' xa xch'i o ta xa'i ti jut c'ope, ti scajanan no'ox ta bail ti c'usi ta xloc' ta yee. Naca mulil noj ta stojolic. Chamebal xa xal ti c'usitic ta xloc' ta pasel yu'unique.

⁵ Naca ston sts'unubal jti'oval chon ti yac'ojbeic yipal ta sbolesele. Xloc'taj yu'unic ta jalel snajel jti'oval om. Ti buch'u ve'lil yaloj ti ton chon taje, ta xcham xchi'uc mi laj slo'e. Mi oy buch'u ta xpuch' ta teq'uele, vol xiic no'ox loq'uel ti nene' jti'oval chonetique.

⁶ Ti najel om xloc'taj yu'unic taje, mu yu'unuc sventauc c'u'il. Mi ja'uc oy buch'u ti bal xa xa'i ta sc'u'iltas o sba yu'unic ti sjolobique. Ja' xojolic o ti xi s'elan chamebal xal scotol ti ochem yipal yu'unique: Mu ch'anuc xi sc'obic ta yaq'uel ti vocole.

⁷ Yacanilaluc xa yu'un ti buyuc no'ox xyal xmuy ta spasel ti chopole. Mu xc'opoj xyal yu'un ta smalbel xch'ich'el ti buch'u ch'abal smule. Xojol ta sjol ti naca milvanej batem ta yo'ntone. Ja' to xlaet ta xa'i mi j'ech'el tsutsesvane, mi stuc xa na pochol com yu'une.

⁸ Mu x'och ta be ta stamel batel sc'oplal ti lamajem o'ntonale. Mu'yuc stuq'uil ma' ti c'usi xnopnun sjolic ta xloc' ta pasel yu'unique. Q'uejel ma' ti bu stamojic batele. Ti buch'utic lec xa xa'i nabalic batel ta stamel eque, mu staic ti lamajem o'ntonale.

⁹ Jech o xal un, namajem ti colebal ta jtojoltique. Mu xvul ta loq'uel ti pojel colele. Saquilal osil jmalaojtic ti calojtique, ja' laj jtatic ti vul ta loq'uel ti ic'al osil une. Jmalaojtic ti ta sac jamtaj ti calojtique, ja' laj jtatic ti vul ta loq'uel ti ic'al osil ta xijxanav une.

¹⁰ Ta max-max picbil ta xijxanav, co'ol j'elantic jech c'u cha'al ma'satetic ta st'un ti bu ta xbat ti yibel nae, co'ol s'elan ch'abal sbec' jsatic. Ac'o mi o'lol lec tixil ti c'ac'ale, ta ono'ox jtsuculin ti coctique, co'ol s'elan ta ac'ubaltic oyotic. Animaotic xa xcaltic, xlajet xa ma' ti lec oyotique.

¹¹ Jcotoltic xijme'inal oc' jech c'u cha'al ta spas ti osoe. Mu'yuc spajeb ti me'inal oq'uel cu'untic jech c'u cha'al ta spas ti palomae. Jmalaojtic xa calojtic ti colebale, mi ja'uc xvul ta loq'uel. Xlajet to me yilel, nom to me c'ot ti pojel colel jmalaojtic calojtic une.

¹² Ep xa laj jsoquescutic avo'nton, yu'un ti jmul jcolo'cutique naca sbejtsan no'ox sba talel. Jcuchojcutic to lec ti jchopolalcutique. Jna' jbacutic lec xchi'uc ti jmul jcolo'cutique.

¹³ Toyobba, mu'yuc jtuq'uil xca'i jbacutic ta stojol ti Ajvalile. Mi ja'uc ta jts'ac-paticutic batel ti Dios cu'uncutique. Yeilal xa ta yalel cu'uncutic ti ac'-vocole, ti pay c'ope, ti chapal xa cu'uncutic ta slo'lael ti yane.

¹⁴ Ti tuq'uil chapanele, bajbil tenbil c'ot. Nom to me c'ot ma' ti oy stuq'uil jol o'ntonal une. Laj to me sc'oplal ma' ti xco'olaj xchi'uc yutsilal jol o'ntonal ti chapanel ta chapanobbail une. Mu'yuc xa ta alel yu'unic ti oy sc'oplal ti sc'an ich'bil smelole.

¹⁵ Ti yutsilal jol o'ntonale, tub xa sc'oplal. Ta xelc'anbeic c'usi oy yu'un ti buch'u ta xicta sba ta spasel ti chopole. Mu lecuc laj ya'i Dios ti c'alal laj yil ti mu'yuc xa ti lequil chapanele.

¹⁶ Ti Diose ts'ijil com, xjax q'uel xa no'ox ti c'alal laj yil ti mu'yuc buch'u xpoxtaj yu'un ti va'i s'elan taje. Va'i un, lic sva'an sba stuc xchi'uc ti smuc'ul stsatsale. Yabtel stuc ti tsalvanem c'ote.

¹⁷ Co'ol s'elan macobbail sloinoj c'ot ti cuchem yu'une. Co'ol s'elan bin jolal slapoj c'ot ti colebale. Co'ol s'elan loin c'u'il slapoj c'ot ti jbel xal ta tsalvaneje. Co'ol s'elan jilich' poc' laj svol sba ti sc'ac'al yo'nton xchi'uque.

¹⁸ Ti Diose ta jujun ta xac'be stoj ti c'u s'elan loc' ta sa'el yu'unique. Ta stsits ti scontrataque. Ti buch'u xti'et sjolic ta stojole, ta xac'be ti c'u yepal ja' xtun o ta xich'ique, ti ja' jech sc'oplal ec ti jnaclejetic ti oyic ta ti' nabe.

¹⁹ Yu'un scotol ti banomile, ti oyic ta stuq'uil sloq'ueb c'ac'ale, ti oyic ta stuq'uil smaleb c'ac'ale, ta xi'taic ti Dios ti c'alal ta xilic ti yich'oj tsots yabtele. Yu'un ta xvul ta loq'uel jech c'u cha'al junuc nojemal uc'um, ti xq'uechomaj no'ox talel xchi'uc ti tsots yic'ale.

²⁰ Ta xtal ta jpojvanej jcoltavanej yu'un ti jteclum Sione, xchi'uc ta stojol scotol snitilultac ti Jacob ti buch'u ta sutes sba yu'un ti smul scolo'ique. Ja' ta xal stuc ti Diose.

²¹ Ti Diose xi ta xale: “Ta jpas jtrate ta atojolic. Ta xcal ta jamal, ti mu sq'uej sba ta atojolic ti jmuc'ul jtsatsale, xchi'uc ti c'u s'elan ta jchanubtasoxuque. Sbatel osil, mi ja'uc ta xquictaoxuc comel xchi'uc ti anitilultaque.”