Isaías 58 - Bible in Tzotzil de Chamula

Smelolal ti bats'i ic'taej vaje

¹ Ti Diose xi laj yalbune: “Tsots xa'avan, mu xaxi', co'oluc s'elan yech'omal snuc' oq'ues ti yech'omal avee. Vulo ya'i ti jteclumal ta scoj ti stoyobbailique. Vulo ya'i slumal ti Jacob ta scoj ti smulique.

² Xaval yilele, yac'ojbeic xa yipal ta xisa'icun jujun c'ac'al. Xmuyubajic no'ox ta stamel ti bu ta jtojobtas batele. Co'ol xa s'elan jun jteclum ti batem yo'ntonic ta spasel ti c'usi leque. Mu'yuc stenojic ta spat ta xoconic ti c'usitic jbel tsots albil cu'une. Sc'anbeicun xa ti ac'o lecuc batuc yu'unic ti c'usitic jbel tsots albile. Stuc xa no'ox jech xmuyubajic ta q'uelel ti ta xnopajic talel ta jtojole.

³ “Manchuc mi jech un, xi ta xalique: ‘¿C'usi xtun o ti ic'taej vaje ti c'alal jeche' xjax q'uel no'ox ti Diose? ¿C'usi xtun o ta xquich' jvocoltic ti c'alal mu'yuc c'usi xtun o ta xil ti stuque? Yu'un ti sc'ac'alil ta xavictaic ti vaje, ja' ta xjelav sc'oplal avu'un ti bolomajele, ja' o ta xbat avo'ntonic ta yilbel svocol ti avaj'abtelique.

⁴ Yu'un ti sc'ac'alil oyoxuc ta ic'taej vaje, c'ajomal no'ox jelavem yeilal avu'unic ti letovajele, ti j'ech'el abtel ta xat'an abaic ta majele. Yu'un ti jun c'ac'al ic'taej vaj ti jech s'elan taje, mu'yuc c'usi ta tael yu'un, ma'uc ma' ti ts'etel xa jchiquin yu'un ti ac'opojel ati'inelique.

⁵ ¿Mi avalojic ti ja' to lec ta xquil ti co'ol xa a'elanic jchop o ta puj ti nijiloxuc xa c'alal oyoxuc ta ic'taej vaje, ti alapojic xa lajemal c'u'il ta xavac'be aba avocolic ta svajel ti tanil c'oq'ue? ¿Mi ja' abisojic ta ‘ic'taej vaj’ taj une? ¿Mi lec xa xa'i ti Dios ti jech c'ac'al taj une?

⁶ “Yu'un ma'uc xa ono'ox ma' taj une. Ti ic'taej vaj ti ximuyubaj yu'une, ja' jech c'u cha'al li'e: ti yich'uc lilinel avu'un scarinailtac ti jti'o'nton j'ac'-vocole, jituno ti jpech'vanej j'ac'-vocol ch'ojon une, ti c'otuc ta pojel colel avu'un ti oyic ta ilbajinele, ti tubuc sc'oplal avu'un scotol ti j'ac'vanej ta lajel tubele.

⁷ Ma'uc no'ox taje, yu'un yorail ta xat'olbij xchi'uc ave'el avuch'om ta stojol ti oyic ta vi'nale, ta yiq'uel ech'el ta ana ti buch'u ch'abal ti snae, ta yac'bel sc'u' ti buch'u ch'abal yu'une, ti mu xavicta aba ta sventainel ti avinquilele.

⁸ “Va'i unbi, jun to saquilal xojobal ic'luman ta xvinaj ti avutsilale. Ta ora no'ox ta xlic poxtajan yu'un ti ayayijemale. Jba'be avu'un ti c'usi lec ta xapase. Mu xa scomtsanot ti cutsilale.

⁹ Va'i un, ti c'alal ta xac'opoj ta jtojole, ta xajtac'bot. Mi xa'avet no'ox ta xac'anbun ti apojele, xichi ta jtac'bote: ‘Li'une.’ Mi ta xc'ot ta tsutsel avu'un sc'oplal scotol ti ilbajinele, mi mu'yuc ta xatsacolan ta c'op ti yane, mi laj sc'oplal avu'un ta sa'bel smul ta jeche' ti yane,

¹⁰ mi ta xavac' aba ta tunel yu'un ti buch'u ta xvi'naje, mi ta xacolta ti c'usi ta xtun yu'un ti buch'u ilbajinbile, va'i unbi, ti avutsilale, sacub to osil ta xa'iic ti buch'utic oyic ta ic'al osile, ti sc'oplal achopolale, ta xjoybij ta saquilal o'lol c'ac'al ta xa'iic.

¹¹ Mi jliqueluc ta xajcomtsanot ta spasel ti lec ta xquile, ta xcac'bot lec ave'el avuch'om ti c'alal oyot ta sbajtical banomile, ta xcac'be yip ti lum ach'el avu'une, ti co'ol a'elan jun yavil nichimetic ti lec maltabile, ti co'ol s'elan sat vo' ti j'ech'el xtuctun oe.

¹² Ti ateclumale ta xlic xcha'meltsanic ta ach' ti vo'ne sjinel talele. Ta xlic xcha'ac'beic yip ti sliquebtac yoc ti vo'ne ac'bile. Xi ta x'albat sc'oplal ti ateclumale, ‘jcha'va'anej lomemal moquetic’, ‘jcha'va'anej jinemal naetic’.

Sc'oplal ti sc'ac'alil cuxob o'ntonale

¹³ “Ich'o ta muc' sc'ac'alil ti cuxob o'ntonale. Ma'uc me xbat avo'nton ta bolomajel ta yorail ti ch'ul c'ac'al cu'une. C'otuc ta avo'nton ti ja' yorail muyubajel ti c'ac'al taje, ti xc'ot o ta yich'obil ta muc' ti jun ch'ul c'ac'al yu'un ti Diose. Xi'tao, yu'un ma'uc yorail ti oy c'usi quechel macalote. Ma'uc yorail ti avac'ojbe xa yipal ta sa'el ti c'usi ta xtun avu'une, ti batem avo'nton ta bolomajele.

¹⁴ Yu'un mi jech ta xapas taje, ta xata ti xmuyubaj no'ox avo'nton ta jtojole, banquilal jtsalvanej ta xac'ot cu'un. Peq'uel ta xcom avu'un ti muc'tiquil lumetique. Ta xcac'bot avu'unic ta sc'upinel rextoil yu'un ti atot Jacobe.” Ti va'i s'elan taje, laj yal stuc ti Diose.