Isaías 57 - Bible in Tzotzil de Chamula

¹ Mu'yuc buch'u ta svul yo'nton yu'un. Ta xcham ti lequil tuq'uil vinique. Mi ja'uc xa ta svulesat ta o'ntonal ti lec ech'ique, mi junuc buch'u xa'ibe smelol c'alal mi chamique, yu'un laj xa stijel ta c'op ti c'usi chopole.

² Ma'uc no'ox un, laj xa me sta ta j'ech'el ti xcux yo'ntonic une. Yu'un ti buch'utic laj stamic ta spasel ti c'usi leque, ta xa xcux ti ta smuquinal avi tana une.

Contrainbilic ti buch'u nijil chimil ta yich'el ta muc' ti loc'obbailetique

³ Nopajanic talel, yalab me' j'ac'-chamel, ti xi s'elan lavoq'uic talel ta stojol ta jun mulivajele, xchi'uc ta stojol jun ants ti sna' sbolomalin sbae:

⁴ ¿Buch'u ta xana'leic ti avalojic une? ¿Buch'u xajim xa ajol ta sbajel stenele? ¿Buch'u ta xapasbe ti xbet'bun xa avoc ta xavac'be yile? Jpas-mulil nich'nabiloxuc, jutc'op jnaclejoxuc.

⁵ Ta yolon c'an tulanetic, ta yolon scotol limajtic te', laj avac' abaic ta c'upinel. Laj avac'beic yich' svocol ta milel ti ololetic ta matanal ta sts'el be vo', ta yolon nail ch'en.

⁶ “Israel, batem avo'nton yu'un ta snijanel xchimanel aba ta stojol ti ch'uletel ton ti oy ta ti' uc'ume. Ti bu taje, chapal xa sc'oplal ti c'ot xa ta avavile. Laj xa amalbe ta sba ti matanal vinoe. Laj xa yich' ta matanal avu'un ti jchop o ta trigoe. ¿Mi ximuyubaj xa yu'un scotol avaloj ta ts'acal taj une?

⁷ Ta toyol stselej vitstic, laj apoyan atem, ti lamuy batel ta yaq'uel ti matanal ti c'usi ta xich' svocol ta milel ti bu taje.

⁸ Ti ta spat sti' anae, laj ava'an ta xvechanel ti loc'obbailetic ti mu xal o'ntonal ta q'uelele. Laj ach'ayun ta avo'nton, lic at'anan aba. Laj ametsan aba ta ajamal tem. Lic apasic trate xchi'uc viniquetic ti buch'u xal avo'nton ta xavay xchi'uque, xchi'uc ti avac'oj xa asat ta stojol ti loc'obbaile.

⁹ Xabitet no'ox ta anil ta spat ti dios Méleque, ti avich'ojanbe batel ti aceitee, xchi'uc ti mu no'ox albajuc yepal ti muil poxiletique. Laj atacan batel ti avaj'alc'op j'ich'-mantaletique, ti c'ot avu'un ti bu oy ti lajebale.

¹⁰ Lalub yu'un ti yalel muyelote. Mi ja'uc laj atuc'ulan un ti jeche' no'ox ech' ti c'ac'ale. Oy lec ma' ti yipal avu'un une, jech o xal mi ja'uc lalub.

¹¹ “¿Buch'u xcal ti diosetic ti laxi' yu'une, ti laj avich' ta muq'ue, ti yanij ajol ta jtojol yu'une, ti j'ech'el laj ach'ayun ta avo'nton xchi'uque? C'alal mu'yuc xa quich'el ta muc' avu'une, ts'ijilun xa no'ox, co'nton xa no'ox sna'.

¹² Ja'uc le' une, ta jvinajes ma' ti avuni talel une, ti tac'al lec avu'un ti oy atuq'uil avaloje.

¹³ Yu'un ti c'alal xa'avet xa ta xac'an ti apojele, mi ja'uc xascolta, mi ja'uc ta stic' sba ta apojel ma' ti avajdiostaque. Bec'bil ta ic' ta xbat scotolic, ta jvuch'tael no'ox ch'ab xi sc'oplalic. Ja'uc ti buch'utic spatoj yo'nton ta jtojole, ta xnaqui ta jteclum. Ta xlic ch'i c'opojuc ta ch'ul vits cu'un.”

Ti tsitsel ta xich'ique xchi'uc ti ta xich' poxtael ti Israele

¹⁴ Va'i un, oy bu ta xvinaj ti xi ta xich' alele: “Pasic lec ta stenlejal ti bee. Loq'uesic ti c'usi ta xmacvan ta bee yo' jech ta x'ech' ti jteclumale.”

¹⁵ Yu'un ti Buch'u oy ta cajale, ti Buch'u stalel cuxule, ch'ul Dios ti xi sc'oplale, xi ta xale: “Ta lequilal to, ta toyol to, ti bu nacalune, ac'o mi jech taje, oyun ta stojol ti buch'u biq'uit yac'oj sbae, ti sna' sutes sbae. Ta xcac'be yip yo'ntonic ti siquet to ta xa'i ti banomile.

¹⁶ Mi ja'uc ta xcalilanbe smul ti jteclumale. Mi ja'uc ti capem jol sbatel osil ta stojolique. Mi mu jechuc ta jpase, ti jnaclejetic ti laj cac'be xch'ulel yanimaique, ta xlic yanijuc yo'nton ta jtojol unbi.

¹⁷ Oy bu xi sjalil li'ilin ta scoj smul ti Israele. Laj jtsits, laj jq'uej jba loq'uel ta stojolic. Staoj yav stoyoj sbaic, yac'ojbeic yipal ta spasel ti c'usi xal ma' ti yo'ntonic une.

¹⁸ “Quiloj xa ma' ti yuni talelic une. Ja'uc le'e, ta jpoxta, ta xcac'be xcux yo'ntonic. Ta staic cu'un ti mu'yuc c'usi sna'ic ta xc'otic ta j'ech'ele. Ta jpatbe yo'ntonic ti buch'utic oyic ta vul o'ntone.

¹⁹ Xi ta xcalbe scotolique: ‘Cuxetuc xa banomil xava'iic ti le' to nom oyoxuque. Cuxetuc xa banomil xava'iic ti li' no'ox nopol oyoxuque. Ta jpoxta ma' ti jteclumale.’

²⁰ Ja'uc ti jpas-muliletique, co'ol s'elan jech c'u cha'al ti nab ti xyuc'uq'uet ta jujujote, ti mu ja'uc spajes sbae, ti naca ach'el ic'obal ta sjip loq'uel ta syuc'benale.

²¹ Ti jpas-muliletique, mi jutebuc lec ma' ti c'usi ta xc'ot ta stojolique.” Ja' laj yal stuc ti Diose.