Isaías 55 - Bible in Tzotzil de Chamula

Oy c'usi ta xac' ta yutsil yo'nton ti Diose

¹ Xi ta xal ti Diose: “Scotolic ti buch'utic ta xa'iic ti taqui ti'ile, talicuc ta yuch'el ti vo'e. Ti buch'u ch'abal ti staq'uinique, la'ic. Sa'ic ti trigo ti bu mu manbiluque. Sa'ic ti vinoe xchi'uc chu' vacax ti mu'yuc tojbil jutebuque.

² ¿C'u cha'al ta xats'ile ataq'uinic yu'un ti c'alal ma'uc ve'lile? ¿C'u cha'al ja' xa abejanoj avuni tojol yu'un ti c'alal mu'yuc c'usi ta x'ech' ta ave ta ati' jutebuque? A'yibeicun ava'iic lec, tunic lajesic atuquic ti lequil ve'liletique. Ech'uc ta ave ta ati'ic ti c'usitic chi' pojique.

³ La'ic ta jtojol, ts'ijano ava'i abaic lec. Chiquintabeicun lec ava'iic yo' jech ta xacuxiic. Sbatel osil ta xcom o ti jtrate ti ta jpas ta atojolique, ti mu xch'ay ta be ti c'usi loq'uem ta alel cu'un ti laj jpas ta syail xc'uxul co'nton ta stojol ti Davide.

⁴ C'ot ta rextico cu'un ta stojol ti muc'tiquil lumetique. C'ot ta banquilal, c'ot ta jchanubtasvanej yu'un ti jteclume.

⁵ Ta xavol talel ta atojol ti jnaclejetic ti mu xavojtiquinane. Xvoletic no'ox talel ta sts'aclielot ti jnaclejetic ti mu ja'uc xayojtiquinique. Yu'un Ajvalilun avu'un, Ch'ul Diosun yu'un ti Israele, laj cac'ot ta ich'el ta muc'.

⁶ “Ochanic ta sa'el ti Diose, yorail to me xu' xataic, c'opojan ti'inanic yo' to me nopol oy.

⁷ Ti buch'u mu'yuc xch'ulel xa'i sbae, ac'o yicta ti chopol bu sq'ueloj batel xchi'uque. Ti j'esom-jole ac'o yicta ti xtal no'ox ta sjol ti c'usi ta spase. Lic ac'o abaic ta ventainel ta stojol ti Diose. Jech ti stuque, ta to xtal ti syail xc'uxul yo'nton ta atojolique. J'ech'el sutanic talel ta stojol ti Dios cu'untique, ti oy yutsil yo'nton ta xch'ayel ti mulil colo'ile.

⁸ Yu'un ti c'u s'elan ta xac' ti snopobil cu'une, mu stsac sba xchi'uc ti snopobil avu'unique. Ti c'u s'elan oy ta co'nton ta jpase, mu xac' avo'ntonic jech.

⁹ Jech c'u cha'al ti vinajel ti oy ta toyol yu'un ti banomile, ja' jech c'otem ti snopbenal cu'une. Ti c'u s'elan oy ta co'nton ta jpase, mi ja'uc sta snopbenal avu'unic tey c'alal. Mu me lo'iluc no'ox ta xcal ti vu'un Diosune.

¹⁰ “Ti vo'e xchi'uc ti taive ta xyal talel ta vinajel. Mu xa xcha'sut muyel, yu'un tal smalta ti banomile, yu'un tal sit'es, tal svoq'ues, yo' jech ta xlic ayanuc sts'unubal ti c'usi ta xich' ts'unele, yo' oy ti ve'lil ta lajesele.

¹¹ Ja' jech ec ti c'u yepal ta xloc' ta que ta jti'e. Mu yu'unuc ch'abal yabtel ta xcom ti c'alal ta sut ta jtojole. Ta xlic spas ti c'usi ta jc'ane. Ta xc'ot ta pasel yu'un ti c'u s'elan ta xcale.

¹² “Xamuyubajic no'ox ta xaloq'uic talel ti bu taje. Jun avo'ntonic ta xasutic talel ta ateclumalic. C'alal ta xilic ti muc'tic vitsetique xchi'uc ti stselejtique, xmuyubajic no'ox xlaetic liquel ta q'uejimol, smaj no'ox sc'obic scotol te'tic ti oy ta osiltique.

¹³ Yu'un ta xch'i liquel tojetic ti bu ch'iemic ti ch'ix te'tique. Ti bu ch'iemic ti tomal ch'ixe, ta xlic ch'iuc ti arrayan sbie. Ti jech taje, ta svinajesbe yutsil slequilal sc'oplal ti Diose, ti com o ta senyail sbatel osil ti jech mu xc'ot ta tsutsele.”