Isaías 53 - Bible in Tzotzil de Chamula

¹ ¿Mi yu'un la oy buch'u ta xch'un xana' ti va'i s'elan laj ca'itique? ¿Mi yu'un la oy buch'u ti ac'bil xa yil smuc'ul stsatsal ti Diose?

² Yu'un ti Diose oy ox ta yo'nton ch'i c'opojuc ti yajtunel jech c'u cha'al ti jch'iel te'e, ti sts'unuc yalel yibel ta taquin banomile. Mu'yuc, mi ja'uc xtixetel yutsilal. Xitic no'ox ta q'uelel ti sat yelove.

³ Bajbil tenbil c'ot yu'un ti jnaclejetique, mu'yuc stu ile. Ja' jun j'ich'-vocol vinic, ti mu sna' spoj sba yu'un ti vocolajele. C'ot jech c'u cha'al ti buch'u tenbil xa ta o'ntonale, ti mu'yuc stu jipbil tenbil c'ot cu'untique.

⁴ Manchuc mi jech un, lamal c'ot ta sba ti jvocoltique. Laj xcuchbotic ti c'usi ya c'ux ta xca'itique. Yu'un laj jnoptic ti yayijesat yu'un ti Diose, ti aq'ue ta tsitsele, ti aq'ue ta lo'il maxile.

⁵ Xcuchoj c'ot ti jtoyobbailtique. Vocolaj cu'untic ta scoj ti jmul jcolo'tique. Xcuchoj c'ot ti vocolajel ta tsitsele. Laj jtatic yu'un ti lamaj jc'oplaltic ti jech yayijesate, ja' to jech laj jtatic ti poxtaele.

⁶ Yu'un jcotoltic lijch'ayotic ta be jech c'u cha'al junuc chij. Laj jtamtic batel ta jujun ti jbetic ti c'u s'elan xal ti co'ntontique. Ja'uc ti Dios une laj scajanbe ta sba scotol ti jmul jcolo'tique.

⁷ Laj yich' ilbajinel. Sjunul yo'nton biq'uit laj yac' sba, mi ja'uc oy bu laj stoy ti ye sti'e. Co'ol s'elan jcot chij laj yiq'uic ech'el ta smilobil ti ts'ijil come, mi ja'uc jutebuc cajal ye sti'. Co'ol s'elan jcot chij ts'ijil c'alal yacal ta xich' loc'bel ti stsotsile.

⁸ Ta jeche' no'ox laj sjochic batel, mi ja'uc junuc oy buch'u laj stic' sba ta spojel, mi ja'uc junuc oy buch'u laj svul yo'nton yu'un ti c'usi ta xc'ot ta stojole. Laj xch'aybeic sc'oplal li' ta banomile. Laj smilic ta scoj smulic ti jteclumale.

⁹ Laj smuquic ta spat xocon ti jlajel jtubel chopol jnaclejetique. Laj xchi'in ta muclej yu'unic ti chopol jnaclejetique, ac'o mi mu'yuc jutebuc ti smule, mu'yuc lo'lavan jbeluc ti c'usi loc' ta yee.

¹⁰ Ti Diose laj slamanbe ta sba ta yich'el ti vocole. Ti jech loc' ayan ta yo'nton ti c'ot ta matanal ta scoj ti mulile, ta sta ti mu'yuc spajeb ti xch'iel sc'opojele, ja' jech ta xilic ec ti snitilultac ta sventa ti stuque. Mu xch'ay ta be sc'oplal ti c'u s'elan chapanbil yu'un Dios ta stojolique.

¹¹ C'alal mi ech' xa ox ta stojol ti mu albajuc vocolajele, ja' to ta xlic sac jamtajuc ti osil banomil ta xa'ie, laj yil ta sq'uelel ti mu'yuc c'usi sna' ta j'ech'ele. Ti lequil yajtunel Diose, ep buch'u ta sta scolel yu'un, ja' ti laj sbainbe ta xcuchbel ti smul scolo'ique.

¹² Ja' yu'un un, tiq'ue ochel yu'un Dios ti bu oyic ti buch'utic cajal sc'oplalique. Jmoj ta xlic tsalvanuc xchi'uc ti buch'u jelavem xu' yu'unique, yu'un laj yac' sba ta milel. Jun to jpas-mulil c'ot. Jmoj c'otic ta tsutsel xchi'uc ti jpas-muliletique, ja' ti ta jech no'ox yepal xcuchojbe c'ot smul ti epal jnaclejetique, c'ot ta jc'opojel jti'inel yu'un ti jpas-muliletique.