Isaías 51 - Bible in Tzotzil de Chamula

Ta x'ale sc'oplal ta xich' patbel yo'nton ti lum Jerusalene

¹ Xi ta xal ma' ti Dios une: “A'yio ava'iic lec acotolic ti buch'utic ta xcuxi ya'i ta spasel ti c'usi oy stuq'uile, ti ta sa'icune. Q'uelo avil ti bu laj yich' anel ti tone, yavil ti ton bu laj yich' loq'uesele.

² Ma'uc no'ox un, a'yibeic sc'oplal ti Abraham ti totil avu'unique, xchi'uc ti Sara ti la'ayanic talel ta stojole. C'alal laj jta ta iq'uele, xch'ul tuc ta banomil. Ja'uc le' une, laj jva'an jba ta stojol. Mu no'ox albajuc yepal laj cac'be ti snitilultaque.

³ C'uxubaj to me co'nton yu'un ma' ti lum Sión une, ti lum ti jinem xa scotole. Ti taquin sbajtical banomile, ta joybin ta jun yavil ts'unbilal nichim ti ta xc'ot jech c'u cha'al yavil sts'unbil nichim Dios ta ts'unubaltic ta Edene. Ti bu taje, naca xa muyubajel xal o, mu'yuc c'usi xal ti o'ntonale, ti xlaet no'ox ti q'uejimol jmoj xchi'uc ti c'usitic ta xich' tijele.

⁴ “A'yio ava'iic, ts'etano achiquinic, jteclumetic, muc'tiquil lumetic, ti xi ta xcale: Ta jpuc ech'el ma' ti chanubtasel cu'une. Ta xc'ot ta saquilal osil yu'un jteclumetic ti jmantaltaque.

⁵ Nopaj xa talel yorail ma' ti tsalbaile. Be xa talel yabtelanel ti colele. Ta jmuc'ul jtsatsal, ta jventain ti jteclumetique. Batem xa yo'ntonic ta smalaicun ti jteclumetic ti nacalic ta ti' nabe, ti spatoj yo'ntonic ta sventa ti jmuc'ul jtsatsale.

⁶ “Toyo batel asatic ta vinajel. Q'uelo avilic ti banomil ti xi s'elan ta xc'ot ta pasele: Ti vinajele ta sac ch'ay ech'el jech c'u cha'al jun ch'ail. Ti banomile ta xlaj ech'el yip jech c'u cha'al junuc c'u'il. Ti jnaclejetic yu'une ta xlic chamicuc jech c'u cha'al junuc us. Ja'uc ti pojel colele, sbatel osil mu xch'ay sc'oplal. Mu'yuc spajeb ma' ti tsalbaile.

⁷ “Ts'etano achiquin ava'iic ti xana'ic spasel ti c'usi oy stuq'uile, jteclumetic ti tac'al xc'ot ta avo'ntonic ti jmantaltaque. Mu xatsiq'ues avo'nton yu'un ti buch'u oy c'usitic chopol ta xloc' ta eal yu'une, ti mu xa stac' a'yeluc ta xava'i yu'un ti c'usi xbet'bun ye ta yalele.

⁸ Yu'un ta jech yepal ta xch'ay sc'oplalic jech c'u cha'al junuc c'u'il ti setbil yu'un ti xchanule, jech c'u cha'al junuc tsots ti sesintasbil xa yu'un ti xchanule. Ja'uc ti tsalbaile, sbatel osil mu'yuc stsutseb. Ti colel ta xcaq'ue, sbatel osil mu xlaj sc'oplal.”

⁹ Ta smuc'ul stsatsal Dios, vic'o asat, julavan, tijo ach'ulel, tsatsajan, ac'bo yipal, vic'o asat jech c'u cha'al laj apas talel le' xa ta vo'nee. Laj asesinta ti muc' ta chanul-nab Rahab sbie.

¹⁰ Ma'uc no'ox taje, taquij avu'un ti nabe, ti bu slajeb xa sninabil ta j'ech'ele. Laj ajoybin ta be snatil ti nabe yo' ta xjelavic ech'el ti buch'utic colic xa batele.

¹¹ Ja' jech ta sutic tal ec ti buch'utic c'uxubinatic yu'un ti Diose, ti x'avlajetic no'ox ta muyubajel ta x'ochic talel ta lum Sione, ti xlaet no'ox ta xvinaj ti sat yelovique, ti ta staic ti mu'yuc c'usi sna'ique, ti xlaet no'ox ta xa'iique, ti nom to c'ot ti oq'uel avanele ti mu x'ech' ti vocole.

¹² “Vu'un ta xcac' tsatsuban. ¿Buch'u ti ta xaxi' yu'une, mi ja' ti viniquetique, mi ja' ti viniquetic ti sna' xcham xlajic co'ol s'elan ti momole?

¹³ ¿Mi yu'un laj xa aten ach'ay ta avo'nton ti Buch'u laj yac' ach'ulel avanimae, ti Buch'u laj sq'ui ech'el ti vinajele, ti laj yac'be yictac ti banomile? ¿Mi yu'un j'ech'el xanicnun ta xi'el sbatel ora ta scoj ti capem sjolic ti j'ac'vanej ta vocol ti chapalic xa yo' ta stub ti ac'oplale? Ja'uc le' une, ¿mi oy to van ti sti'emal sjolic xana' une?

¹⁴ Ti buch'u ilbajinbile, mu xa jaluc sc'an xc'ot ta colel, mu xcham ma' ta chuquinab une, mi ja'uc ti mu xa sta ti sve'ele.

¹⁵ “Vu'unun ti Ajvalil Diosun avu'une, biiltasbilun ti Dios scotol xu' yu'une. Ta xyuq'uilaj ti nab cu'une. Xpomlajet no'ox xva'i xcoti cu'un.

¹⁶ Vu'un laj jq'ui ech'el ti vinajele. Laj cac'be yip ti banomile. Laj cac' ta ave ta ati' ti jc'ope. Ta yip stsatsal jc'ob, laj jchabiot. Xichi laj calbe ti lum Sione: ‘Ti vo'ote jteclumalot.’ ”

¹⁷ Vic'o asat, tijo xa ach'ulel, Jerusalén, lican xa. Laj xa ata tsitsel yu'un sc'ac'al yo'nton ti Diose jech c'u cha'al ti sjip xch'a ochel ta ye ti jbis poxe, ti sts'ubta xa ti stsutsebe, ti yacub xchi'uque.

¹⁸ Ta scotol ti anich'nab ti laj avile, mu'yuc buch'u junucal ta stojobtasot batel. Ta scotol ti anich'nab laj ats'itese, mu'yuc buch'u junucal ta snitbot ti ac'obe.

¹⁹ Ti cha'tos vocole, xi s'elan ma' ti vul ta atojole: Lilij ti alumale, ti laj yich' pojel batel ti c'usitic x'ayan yu'une. Chamic ta vi'nal ti avinquileltaque xchi'uc ta leto. ¿C'u no'ox cha'al jech c'ot ta atojol le' une mi oy buch'u xi xana'? ¿Mi oy to la buch'u ta spat avo'nton xana'?

²⁰ Co'ol xa s'elanic jech c'u cha'al jchop o ta te'tical chij ti mu xa cha'bel xcol loq'uel ta syacobile. Alunebic xa ti anich'nab ti telelic ta jujun xuc'av buyuc no'ox calleale. Yayijemic yu'un sc'ac'al yo'nton ti Ajvalile, ti tojobtasel yu'un ti Dios avu'une.

²¹ Jech o xal un, jteclum ti mu xlaet ta xava'i ti banomile, a'yio ava'i li'e. Ma'uc ta scoj vino ma' ti jech jyacubelot le' une.

²² Ti Avajvale, ti ja' Dios avu'un une, ti Buch'u ta stic' sba ta spaquel sc'oplal ti steclumale, xi ta xale: “Ta jtenbot batel ti abis ti oy ta ac'ob ti layacub xa xchi'uc ti ya'lele. Mu xa ja'uc ta xavuch' ya'lel ti jbis ti laj yac' ti sti'emal jole.

²³ Ja' xa ta xcac'be yuch'ic ti buch'utic laj yilbot ti avocole, ti xayutot to oxe: ‘Patano aba ta lumtic, ta xibitcutic jelavel ta aba.’ Laj apatan aba ta lumtic yo' jech ta x'ech' xpech'ot ta teq'uel jech c'u cha'al junuc pucuc.”