Isaías 49 - Bible in Tzotzil de Chamula

Ti yajtunel Diose ta xc'ot ta saquilal osil yu'un ti muc'tiquil lume

¹ A'yibeicun ava'iic lec ti xi ta xcale, lumetic ti nacaloxuc ta ti' nabe. Avocolicuc, ts'etano ani' achiquinic, namal muc'tiquil lumetic: Laj staun ta iq'uel ti Dios ti c'alal mu'yuc to ox ta xivoq'ue. Laj sbiiltasun ti c'alal oyun to ox ta xch'ut ti jme'e.

² Ti que jti'e, c'ot ta juxbil espada yu'un. Laj snac'un ta chabiel ta yolon yaxinal yoc sc'ob. Lic'ot yu'un ta jun jich'il sni' abtejebal ti xach'obil yolobe, ti laj stic'un ochel ta xch'amobil yav sni'e.

³ Xi laj yalbune: “Cajtunelot ma' ti vo'ote, Israel, ti jun no'ox cutsilal ta xcac' iluc ta atojole.”

⁴ Xichi ma' ti laj jnop une: “Ta jeche' no'ox ma' ti li'abtej une. Ta jeche' no'ox ma' ti laj jlubtsan jbae.” Ta melel un, ti c'usi lamal c'ot ta jbae, oy ta yoc ta sc'ob ti Diose. Ti jmotone oy ta smuc'ul stsatsal yoc sc'ob ti Diose.

⁵ Laj jta ti ich'bil lic'ot ta muc' ta stojol ti Ajvalil Dios cu'une, ti ja' ono'ox quip ti stuque. Laj yac'bun quich' jbec'tal ta xch'ut jme' ti Diose. Lic'ot ta yajtunel yo' jech ta xc'ot ta pasel ti ta xjunajic cu'un ta svolel sbaic sutel talel ta stojol ti Israel sts'unubaltac ti Jacobe.

⁶ Ti Diose xi no'ox lic yalbune: “Ma'uc no'ox ma' ti cajtunelot ta stamel liquel snitilultac ti Jacobe, ti ta sutic talel ta jtojol avu'un ti c'u yepal c'uxul to ti Israele. Ja' jech xtoc ta xac'ot cu'un ta saquilal osil yu'un ti muc'tiquil lumetique, yo' jech ta xavich' batel scoltaelic cu'un ti buch'utic oyic ta namal banomile.”

⁷ Ti jpojvanej jcoltavanej Ajvalile, Ch'ul Dios yu'un ti Israele, xi ta xalbe ti lum ti tan puc batic ta j'ech'ele, ti bajbil tenbil c'otic yu'un ti yan lumetique, ti c'otic ta yajmosovtac ti buch'u spajebal xa no'ox j'ilbajinvanej xa'i sbaique: “C'alal ta xayil ti ajvaliletique, xchi'uc ti its'inal ajvaliletique, ta xlic va'iicuc, ta squejan sbaic ta atojol, yu'un ti jech Ajvalilune, ch'ul Diosun yu'un ti Israele, laj jt'ujot, ta xc'ot ta pasel cu'un ti c'u s'elan calojane.”

Ta xcaj'ale ti ta xich' cha'meltsanel ti lum Jerusalene

⁸ Ti Diose xi ta xale: “Ti jech c'ot yorail laj cac' ta ilel ti yutsil slequil co'ntone, laj jtac' ma' ti ac'op une. Ti jech c'ot yorail ti pojel colele, laj jtic' jba ta acoltael un. Laj jtic' jba ta achabiel un. Ta aventa vo'ot ta jc'otes ti jtrate ta stojol ti lume. Ta xlic yich' cha'meltsanel ti lume yo' jech ta xu'ninic ti banomil ti bu bec'bil loq'uique.

⁹ Ma'uc no'ox taje, xi ta xavalbe ya'i ti jchuqueletique: ‘Lac'otic xa ta colel.’ Ti buch'utic tiq'uilic ti bu spajeb ic' ta j'ech'el ti osile, xi ta xalbe ya'iique: ‘Ac'o abaic ta ilel.’ Ti ta bebetique, jmoj xvoletic batel ta sta ech'el ti sve'elique. Buyuc no'ox ti stselej ta sbajtical banomile, oy no'ox ma' ti sve'el xchon sbolomique.

¹⁰ “Mi ja'uc ta xa'iic vi'nal taqui ti'il. Mi ja'uc xchic'chun ta xa'iic ti c'ac'ale. Mi ja'uc xq'uixnal ti banomile. C'ux ta xca'iic, ta jtojobtasic batel. Ta xquic' batel ti bu oy ti sat vo'etique.

¹¹ Ta jpol ech'el beetic ta vitstic. Ta jnojes ech'el ti bu slomol spulule.”

¹² Xi ta xalique, ¡q'uelo avil! nom ti bu liquic talele: Oy jlom liquic talel ta yolon ti yolon xocon sloq'ueb c'ac'ale. Ti jlome liquic talel ta smaleb c'ac'al. Ti jlome liquic talel ta stuq'uil ti Asuane.

¹³ ¡Muyubajan ta avanel un, vinajel! ¡Banomil, mu'yucuc xa c'usi xana' liquel un! ¡Vitsetic, avanan liquel ta yutsil slequil avo'ntonic un! C'ot xa ta pasel yu'un ti Diose ta spatbel yo'nton ti steclumale, ti c'uxubaj yo'nton yu'un ti mu x'ech' xjelav ti svocolique.

¹⁴ “Ti lum Sione xi laj yalilane: ‘Laj stenun laj sjipun comel ma' ti Ajvalile. Laj xch'ayun ta yo'nton ma' ti Dios cu'une.’

¹⁵ Ja'uc le' une, ¿mi oy la xana' ti me'ile ti ta sten ta xch'ay ta yo'nton ti yole? Ac'o mi jech laj xtuch' ta yo'nton un, ja'uc ti vu'une mu xajtuch' ta co'nton.

¹⁶ Yu'un comem yavtac ta coc jc'ob. Bejel ta jol co'nton ti amoctaque.

¹⁷ Ti buch'utic ta xcha'va'anot ta ach'e, yac'ojbeic yipal ta j'ech'el. Ti buch'utic laj yilbot avocole, sicotan laj yictaot comel, batic xa.

¹⁸ Toyo asat, joyetan ta sq'uelel, q'uelo avil, ta stsob sbaic talel scotol, ta sutic talel ta atojol. “Ti vu'un Ajvalilune ta jva'an jba ta yalel scotolic le'e, co'ol s'elan toyol stojol c'u'il ta xalape, co'ol s'elan xach'alet no'ox yu'un jech c'u cha'al ti jlequel tsebe.

¹⁹ Ti ateclumale jinesbil xa, lilinbil xa, jeche' xa pochol. Ti avosil abanomil tana le' une, biq'uit no'ox ta sventa ti jnaclejetic avu'une. Nom xa oyic ma' ti buch'utic laj yilbajinote.

²⁰ Ti anich'nab ti laj anop ti ch'ayem xa avu'une, xi ta xalboxuc ta achiquine: ‘Ti lum li'e, biq'uit ta j'ech'el ta xca'icutic. Sa'o yan bu x'ech' to ti smuc'ul xu' xinaquicutique.’

²¹ Ti vo'ote xachi ta yut avo'nton: ‘¿Buch'u laj yac'bun xcal ti jnich'nabtac li'e? Mu'yuc ono'ox jnich'nab une, yu'un mu ono'ox jna' xinich'naj. Tacbilun loq'uel, slecoj bu oyun. ¿Buch'u laj sts'ites xcal un? Jtuc xa laj yictaicun comel. ¿Bu talic ya'yel le' un cha'e?’ ”

²² Ti Diose xi ta xale: “Ta xcalbe ya'iic ti muc'tiquil lume. Ta xcac'be yilic senyail ti jteclume ti ta spetic talel ti aqueremtaque, ti cajal ta xtal yu'unic ta snequebic ti atsebtaque.

²³ Ti ajvaliletique ta xc'otic ta jts'itesvanej totil. Ti tojol tsebetic ti oy sc'oplal ta xc'ot ta me' ajvalile, ta xc'ot ta avajch'ipomtac. Snupilan xa banomil ta snijan sbaic ta atojol, ti slec' xa ti spucuquil avacane. Ja' jech ta xlic ana' ti vu'un ti Diosune. Ti buch'utic spatoj yo'ntonic ta jtojole, mu xlajic ta lo'lael.”

²⁴ ¿Mi stac'van ti poj x'utbat jun tsatsal vinic ti c'usi laj sta talel ta letoe? ¿Mi stac'van xjatav loq'uel jun vinic ti chucbil yu'un ti buch'u spajebal xa no'ox chopol ta spase?

²⁵ Jech ono'ox ta xc'ot ta pasel xi ti Diose: “Ti tsatsal vinique, ta xpojbat ti c'usi ja' xa yu'un ti yaloje. Ti c'usi c'otem xa ta yu'un ti buch'u spajebal xa ti xchopolale, ta xpojbat. Vu'un ta jc'opon jba xchi'uc ti buch'u ta stsacot ta letoe. Ta jtic' jba ta spojel ti anich'nabe.

²⁶ Vu'un ta jsuj ta xach'el ta sti'el sbec'tal stuc ti avajcontrae, ti xq'uixet xa liquel sjol ta yuch'el ti xch'ich'el stuc jech c'u cha'al ta xyacub yu'un ti vinoe. Scotol ti jnaclejetique, ja' to jech ta xlic sna'ic ti vu'un ti Ajvalilune, ti jpojvanejun avu'une, ti yipun ti Jacobe, ti jcoltavanejun avu'une.”