Isaías 48 - Bible in Tzotzil de Chamula

Ti Diose ta scaj'al ti oy c'usi ach' ta xc'ot ta pasele

¹ “Ts'et chiquintao ava'i li'e, ti laliquic talel ta sventa sts'unubal ti Jacobe, ti avich'ojbeic sbi ti Israele, ti snitilulot ti Judá xtoque, ti ava'anoj ta rextico ti Diose, ti xavocolet ta stojol Dios yu'un ti Israele, ti mu'yuctic alequile, ti mu xava'ibe lec xchiquinale,

² ti xachi ta xaval ti liquemoxuc talel ta ch'ul jteclume, ti ja' yip avo'nton ti Dios yu'un ti Israele, Dios ti scotol xu' yu'une:

³ Ta sliquebal ono'ox, laj caj'albot sc'oplal ti c'usitic c'otem ta pasel ta vo'nee. Ti vu'une lic cac' ta ojtiquinel. Ta jech to yepal un, lic cabtelan, ti c'ot ta pasel xtoque.

⁴ Jna'oj xa ono'ox ti mu xava'ibe xchiquinale, ti tsots ta j'ech'el avo'nton jech c'u cha'al ti tsatsal taq'uine, ti mu stac' ca'el puxel jech c'u cha'al ti c'anal taq'uine.

⁵ Jech o xal un, ta vo'ne lic caj'albot talel. Laj ono'ox jt'ambot ta yalel ava'i ti c'alal mu to ta xc'ot ta pasele. Mi ja'uc xu' ti xachi ta xavale: ‘Le'e ja' yabtel ma' ti uni loc'obbail cu'un une. Ja' c'ot ta pasel yu'un ma' ti cuni loc'obbail laj cac' ta meltsanele.’

⁶ Ava'binoj scotol taje, tuc'ulano avil lec un cha'e. C'otuc ta avo'nton ti c'ot ta pasele. Avi tana li'e, ta ach' ta jcaj'albot ava'i sc'oplal ti oy c'usi mucul ti mu ja'uc xavojtiquine.

⁷ Ja' to no'ox c'ot ta chapel ta nopel avie. Ma'uc ma' ti le' xa talel ta vo'nee. Mu'yuc to ya'binojic sc'oplal avi tanae. Ti jech taje, mi ja'uc jutebuc ma' ti xachi xu' ta xavale: ‘Ca'binoj xa ono'ox ma' taj une.’

⁸ Taje, mi ja'uc oy bu ava'binoj ti sc'oplale. Mi ja'uc xavojtiquin, yu'un uni cocorix xava'i aba ono'ox. Jna'oj ono'ox ti mu'yuc atuq'uil xava'i abae, ti bisbilot ta uni toyobba ti c'alal lavoq'ue.

⁹ “Ja'uc le' une, ts'ic cu'un, jna' xquich' jba ta c'ac'al, mu jc'an jsoques ti jc'oplale. Mu'yuc laj jtub ac'oplal ta j'ech'el.

¹⁰ Laj jch'ulot ta poquel. Mu jechuc laj jpasbot jech c'u cha'al ta xich' pasbel ti platae. Laj jq'uel c'u s'elan ta xanop yu'un ti avocol ti laj jtic'ot ochel ta jornoe.

¹¹ Sventa quich'el ta muc', sventa jlequil cutsilal ti jech laj jpase, yu'un mu stac' soquesel ti jc'oplale. J'ech'el mu xcac' que jti' ti yan o xa ti buch'u ta xich' slequil yutsilale.

Ti Diose ta stic' sba ta spojel ti steclumale

¹² “Ts'et chiquintaic ava'iic li'e, Israel, ti liquem talel ats'unubalic ta stojol Jacob ti xichi yu'un laj jta ta iq'uele: C'ajomal vu'un ma' ti Diosune, ti oy ta jventa ti sliquebale, ti stsutsebale.

¹³ Ta jc'ob laj cac'be yip ti banomile. Ta jc'ob laj jq'ui ech'el ti vinajele. C'alal laj jbiiltase, lic ayanuc talel.

¹⁴ Tsobo abaic talel, ts'et chiquintao ava'iic acotolic ti xi s'elan ta xcale: ¿Buch'u junucal avu'unic laj scaj'alic ti xi s'elan ta xc'ot ta pasele: Ti vinic ti laj jt'uje, ta xc'ot ta spasel yu'un ta Babilonia ti c'usi jnopoj ta jpase, xchi'uc svinquileltac ti caldeoetique?

¹⁵ Vu'un laj calbe ya'i. Vu'un laj jta ta iq'uel. Tal cu'un un. J'ech'el ta stsalvan ti buyuc no'ox ta xbate.

¹⁶ Nopajanic talel, ts'et chiquintao ava'iic ti xi ta xcale: Ta sliquebal ono'ox, mu'yuc c'usi ta mucul laj calilan. C'alal ta xc'ot ta pasel taje, tey oyun ec. Avi tana li' une, ti vu'un Diosune laj xa cac'be yich' ti jmuc'ul jtsatsale. Laj xa jtac batel.”

¹⁷ Ti jpojvanej Ajvalil avu'une, Ch'ul Dios yu'un ti Israele, xi ta xale: “Vu'unun ti Ajvalil Dios avu'une. Co'ntonuc jchanubtasot ca'i ta yaq'uel avil ti alequilale. Co'ntonuc jtojobtasot ca'i ta sbeiltaselot batel ti bu stac' xatame.

¹⁸ ¡Ati lajuc avac' ta venta ti c'u s'elan laj cale, lec ma' ti jechuc une! Ti alequilal avutsilale, c'ot jech c'u cha'al ta xanav yoc ti uc'um jechuque. Ti c'usitic ta xtun avu'une, c'ot jech c'u cha'al ya'lel nab ti xva'i xcoti no'ox ta beinel jechuque.

¹⁹ C'ot ta pasel ti mu no'ox albajuc yepal ma' ti anitilultac jechuc une, ti mu xlaj ta chapel jech c'u cha'al ti syi'al ti' nabe, ti mu ja'uc laj jtub ti sc'oplalique, ti mu ja'uc laj jch'ay ta jsat ti jechuque.”

²⁰ Loc'anic talel ti ta Babiloniae. Jatavanic loq'uel ta stojol ti caldeoetique. Avetanic ta muyubajel ta scaj'alel ti va'i s'elan taje. Aq'uic ta ojtiquinel ta jujujot xchiquin ti banomile. Xi xavalique: “¡Ti Diose laj stic' sba ta spojel scoltael ti Jacob ti ja' yajtunele!”

²¹ Ac'o mi ech'ic yu'un ta sbajtical banomil, mu'yuc ya'iic taqui ti'il. Ti stuque laj sjav ti ch'ene. Ta jech yepal loc' talel vo' yu'un, ti xbalaq'uin no'ox ti yoque.

²² Ta stojolic ti buch'u chopolique, mu'yuc c'usi lec ta staic une. Ja' yaloj stuc ti Diose.