Isaías 47 - Bible in Tzotzil de Chamula

Ti lum Babiloniae ta xlic sta svocol

¹ “Chotlan ta pucuctic, jteclum Babilonia, ti co'ol a'elan jech c'u cha'al ti jch'iel tseb ti mu'yuc to ts'acal nupul xchi'uc ti vinique. Uni jch'iel jc'opojel caldea tseb, yalan talel ta apasob mantale. Chotlan ta lumtic, yu'un laj xa ac'oplal ma' ti ta xa'albat ti xana' xatuc'ulan abae, ti jun avutsile.

² Tsaco xa no'ox acho' ava'i yu'un ti juch'najele. Lic juch'o ti harinae. Jipo xa loq'uel ti smac asate. Nito ta volel muyel ti atseque. T'anetuc ti avo' ech'an ta uc'ume.

³ Yilicuc ti t'anal ti abec'tal atacopale. Melel un, vinajuc ta j'ech'el ti bu xa spajeb q'uexlal ta xaq'ue. Ta jpac sutel ti c'usi laj xa apase. Mu'yuc xa buch'u ta spac ac'oplal ac'o mi xavocolet ta c'opojel ti'inel.”

⁴ Ti jpojvanej jcoltavanej cu'uncutique, ti Ch'ul Dios yu'un ti Israele, ti sbiinoj Dios ti scotol xu' yu'une, xi ta xale:

⁵ “Ts'ijano xa ono'ox ava'i aba ta chotlej, jch'iel jc'opojel caldea tseb, ochan xa no'ox batel ava'i ti bu ic' ta j'ech'el ti osil banomile, yu'un laj xa sc'oplal ta j'ech'el ma' ti ta to xa'albat ‘me' ajvalil yu'un ti muc'tiquil lumetique’.

⁶ C'alal liquem sc'ac'al co'nton yu'un ti jlumale, laj soquesbe sc'oplal ma' ti muc' ta lum ti c'alal ja' cu'une, ti jq'uel xa no'ox ti och ta avoc ta ac'ob cu'une. Mi jutebuc c'uxubaj avo'nton yu'un. Tsots laj avilbe svocol ti buch'utic ch'iem c'opojemic xae.

⁷ Xi lic avalbe abae: ‘Me' ajvalilun sbatel osil’. Mi ja'uc laj achi'in ta lo'il avo'nton yu'un ti jech ta xc'ot ta pasele. Mi ja'uc laj anop ti c'u s'elan ta xc'ot ta tsutsele.

⁸ Jech o xal un, a'yio ava'i lec avi tana li'e, ants ti lec xava'i stunesel ti c'usitic c'upil sbae, ti mu'yuc c'usi xana' chotolot ta apasob mantale, ti xi ta snopilan ti yut avo'ntone: ‘Laj to c'op ma' ti ta xic'ot ta me'unal antse, oy no'ox ti calabtaque. Ja' no'ox li vu'une, ¿buch'u xa can yan un?’

⁹ Mu ta sjaliluc, ti ta jun no'ox c'ac'ale, xu' ti xi s'elan ta xc'ot ta atojol ti xchibal vocol li'e: Me'unal antsot xa xava'i aba. mi junuc xa avalabtac, manchuc mi mu albajuc xu' avu'un ti j'ac'-vocol lajele, ti slo'laobtac avu'une.

¹⁰ Yu'un atsinanoj aba yu'un ti yacalot ta spasel ti chopole, ti xi laj anope: ‘Mu'yuc la buch'u ta xiyilun un.’ Ti abijil une, ti oy c'usi xavojtiquin ti avaloj une, lalaj ta lo'lael yu'un. Xachi laj anop ti ta yut avo'ntone: ‘Ja' no'ox li vu'une, ¿buch'u xa can yan un?’

¹¹ Ta me xvul ta atojol ti vocoletique, ti mu ja'uc xa xmac ta be avu'une, manchuc mi xana' smets'tael ma' ti avaloj une. Ta xtal ta atojol ti muc' ta vocole, ti mu'yuc c'usi xavut ta xapoj aba yu'une, ti xava'i lamal xa ta atojol ti ilbajinel ti c'alal mi ja'uc anopoj ta xtale.

¹² Ac'bo xa yipal ta spasel slo'laobtac avu'une, ta yaq'uel ti chamel lajel ti ta bic'tal ono'ox lic achan talele. Jq'ueltic quic mi oy to c'usi xtun o avu'un. Jq'ueltic quic mi ta to xata ti xi'tabilot yu'un ti jnaclejetique.

¹³ Yepal no'ox ma' ti jbijubtasvanejetic avu'une, ti lub xa ti ajol abaquil yu'une. ¡Taluc sva'an sbaic ti bainom satinometic avu'une, ti xu' yu'unic ta st'unel ti naca no'ox ta sq'uelic ti c'analetique, ti jujun u ta scaj'alic ti c'usi ta xc'ot ta pasele, ac'o stic' sbaic ta apojel un!

¹⁴ Ja'uc le' une, xi s'elanique: Q'uelo avil lec, co'ol s'elanic jech c'u cha'al ti taquin jobele: Ch'ab xi sc'oplal yu'un ti c'oq'ue. J'ech'el mi ja'uc ta xcolic yu'un ma' ti slebe, yu'un ma'uc yac'alil c'oc' ti chot xi xa ta sts'el ta sc'atinele.

¹⁵ Yu'un ja' to jech ta xc'ot ta tsutsel ti j'ac'-chameletic avu'un ti co'ol ajol avo'ntonic xchi'uc ti c'alal lic ch'ian c'opojan talele. Jujun laj stam batel sbeic ti mu'yuc stuq'uile. Mi junuc xa oy buch'u ta spojot un.