Isaías 46 - Bible in Tzotzil de Chamula

¹ Ti loc'obbail dios Bele ta xpajcuj yalel ta lum. Ti loc'obbail dios Nebo eque ta xyal ta lum. Cuchbil ta xbatic ta ca' ti loc'obbail diosetique, ti ja' jun alal icatsil ta xa'iic ti xlubic xa ta xcuchel batel ti chon bolometique.

² Ti loc'obbail diosetique, sts'ebuj no'ox ta xbaj yalel ta lumtic, ti mu ja'uc xa ta stam sba liquele, ti cuchbil ta xbatic ta yan banomile.

³ A'yibeicun ava'iic lec ti xichi ta xcale, snitilultac Jacob, acotolic ti c'u yepal ta xacomic ta steclumal ti Israele: Jpetoj jcuchoxuc ono'ox ti c'alal mu'yuc to ta xavoq'uique.

⁴ Jech ono'ox stalel ta jpas, ac'o mi yijoxuc xa. Mi sac chijanoxuc xa, staoj yav quicojoxuc japojoxuc. Laj cac' avich' abec'talic ti staoj yav ti jpetoj jcuchojoxuque, ti oy apojel acolel abainelic cu'une.

⁵ “¿Buch'u xu' ta xaco'oltasicun xchi'uc ti avalojique? ¿Buch'u xico'olaj xchi'uc ti ta xanopique?

⁶ Oy buch'u naca sloq'ues no'ox epal oro ta yavil, ti sbiseluc xa ta xchechel ti plata ta sbisobile. Ta jech yepal un ta spas trate xchi'uc jun jten-taq'uin yo' jech ta smeltsanbat junuc sdios ti ta xlic snijan xchiman sba ta stojol ta yich'el ta muq'ue.

⁷ Xq'uechojic xa batel ta snequebic. Ta scajanic ta scajleb ti va'al ta xcom yu'unic ti bu taje. Mu ja'uc xa ta sjel yavil ti bu va'al c'ote. Ac'o mi x'avlajetic ta sc'anbel vocol ti pojaticuque, mi ja'uc oy c'usi ta xc'ot ta pasel, mi ja'uc ta xpojatic yu'un ti c'alal oyic ta vocole.

⁸ “Vuleso ta ajolic ava'iic lec, jsa'muliletic, ma'ucuc ti batem xa avo'nton yu'une, nopic lec.

⁹ Vuleso ta ajolic ti c'usitic laj c'otuc ta pasel ti le' xa ta vo'ne talele. Vu'un ti Diosune, mu'yuc xa yan. Vu'un ti Diosune, mu'yuc xco'olaj jech c'u cha'al ti vu'une.

¹⁰ Vu'un ta jcaj'al ti c'u s'elan ta xlic talel ta sliquebale, ti c'u s'elan ta xc'ot ta tsutsele. Ta jcaj'al no'ox talel ti c'usi ta xc'ot ta pasel ti le' to batele. Yu'un xichi ta xcale: Ti c'usi jnopoje, ta ono'ox xc'ot ta pasel cu'un un. Ta xc'ot ta pasel cu'un scotol ti c'usi jnopoje.

¹¹ Ta stuq'uil to sloq'ueb c'ac'al, laj jta ta iq'uel jun vinic, ti co'ol s'elan jun jti'oval mut ta nom ta xlic talele, ta yabtelanel yo' ta xc'ot cu'un ti c'u s'elan jnopoje. Ti c'u s'elan loc' xa ta alel cu'une, ja' jech ta jpas un, c'ot ta chapel cu'un, mi ja'uc stselbuj.

¹² A'yio ava'iic ti xi ta xcale, jnaclejetic ti xasa'sunique, ti ta xavalic ti jal to sc'an ti pojel colele.

¹³ Ta xa xnopaj talel cu'un ta yabtelanel ti pojel colele. Mu xa jaluc sc'an ti pojel colel cu'une. Ta xc'ot ta pasel cu'un ta jpoj ta jcolta ti lum Sione. Ta xcac'be yich' cutsilal jlequilal ti Israele.