Isaías 44 - Bible in Tzotzil de Chamula

C'ajomal xa no'ox stuc Ajvalil Dios ti jelavem yutsil slequil yo'ntone

¹ “Avi tanae, Israel, steclumal cajtunel Jacob ti t'ujbil cu'une, a'yio ava'i ti c'usi ta xcale.

² Vu'unun ti Ajvalil ti laj cac' ach'ulel avanimae, coltabilot cu'un ti c'uxi lic avich' talel abec'tal ti c'alal oyot to ox ta yut ch'utile. Mu xatsiq'ues avo'nton, Jesurún, steclumal cajtunel Jacob, ti t'ujbil cu'une.

³ Yu'un ta xc'ot ta pasel cu'un ti ta xlic beinuc vo' ti ta sbajtical banomile, ti ta xlic t'omuc ch'in uc'umetic ti ta taquin banomile. Yu'un ta xcac'be ach' xcuxlejic ti anitilultaque. Ta jva'an jba ta yac'bel ti jlequilal cutsilale.

⁴ Ta xcac' ch'iuc jech c'u cha'al junuc ts'unubal ti lec maltabile, ti co'ol s'elan jech c'u cha'al ti sbiinoj alomo te' ti ta xch'i ta ti' uc'ume.

⁵ Oy bu xi ta xalbe sbaique: ‘Ti vu'une, yu'unun ti Diose.’ Ti yane ta xalbe sba ti ja' snitilultac ti Jacobe. Ti yan eque xi ts'ibabil ta sc'obe: ‘Yu'unun ti Diose’, xchi'uc quich'ojbe sbi ti Israele.”

⁶ Ti Dios ti ja' Ajvalil jpojvanej yu'un ti Israele, ti ja' Dios ti scotol xu' yu'une, xi ta xale: “Vu'un oy ta jventa ti sliquebale, ti stsutsebale. Jtuc no'ox Diosun, mu'yuc yan.

⁷ ¿Mi oy buch'u xco'olaj jech c'u cha'al ti vu'une? Ac'o yal ya'yej ca'itic, ac'o svinajesbeicun lec smelol. ¿Buch'u laj scaj'al talel ti oy c'usi ta xc'ot ta pasel ti ta sliquebale, ti c'usi ta xc'ot ta pasel le' to batele, ti ta yalel ti c'usi ta xa xc'ot ta pasel avi tana li'e?

⁸ ¡Tsinano avo'ntonic, mu xaxi'ic! Yu'un vo'ne xa no'ox xichi jcaj'aloje, ti vo'oxuque cajrexticooxuc. Ti xcaltique, ¿mi yu'un oy to van bu yan dios? Mu'yuc to bu xquil ec un, ja' no'ox vu'un ti Diosune. Xlajet to ma' ti oy bu ta tael ti yan pojobbail une, mu'yuc to bu xquil ec un.”

Contra x'ileic ti buch'utic yac'oj sjolic ta stojol ti loc'obbailetique

⁹ Mu'yuc c'usi bal o ma' ti buch'utic ta smeltsanic ti loc'obbailetique. J'ech'el mu'yuc c'usi xu' yu'un ti loc'cobbail ti batem yo'ntonic xchi'uque. Ti buch'utic nijil chimilic ta xich'ic ta muq'ue, ma'satetic, mu xa'i sba xchi'uquic. Jech o xal un, ta xc'otic ta j'ac'-lo'il-maxil.

¹⁰ Ti buch'u ta xunijes ta sloc'tael ti loc'obbailetic yo' ta xlic yich' ta muc' ti co'ol xa s'elan jun dios c'otem yu'unique, ch'ayob c'ac'al no'ox.

¹¹ Scotolic ti buch'utic ta snijan xchiman sbaic ta yich'el ta muq'ue, ta xc'otic ta j'ac'-lo'il-maxil. Ti buch'utic ta smeltsanic ti loc'obbailetique, viniquetic no'ox ta banomil. C'alal ta xc'ot ta pasel ti scotolic ta xc'ot sva'an sbaic ta stojol ti chapanele, mi jbeluc xa xpac yu'un ti yuni c'oplalique. C'ajomal xa no'ox batem xch'ulelic yu'un ti xi'ele.

¹² Jq'ueltic avil, xi s'elan ta spas ti jten-taq'uine: Ta stunes ti sc'ocobil staq'uine. Ts'acal to un, c'alal mi tsajub xa lec ti taq'uin ti mucul ta ac'ale, naca sta xquechet ta stuq'uibtas batel ta tenel ta stenobil. Ja' xa ti bu xtal ti yip yoc sc'ob ta yabtelanele. Ja' no'ox un, mi mu xve' ti jten-taq'uine, ta xlaj yipal yu'un. Mi mu xuch' ti vo'e, ta xc'ot ta lubtsajel.

¹³ Jq'ueltic avilic xtoc, xi s'elan ta spas ti jloc'taej loc'obbaile: Ta xlic sbis ta sbisobil. Ta stunes lapis xchi'uc yac'obil senyail ti bu ta x'ech' ti c'u s'elan sta o ta xch'ojan loq'uele. Ts'acal to un, ta xlic xch'ojilan ta sjulubil. Ja' jech ta xc'ataj ta jun loc'obbail yu'un ti ts'acal lec yoc sc'ob ta q'uelel yilele, co'ol xa s'elan jun jve'el j'uch'-vo' yilel, ti chotol xa liquel ta ch'ulna yu'un une.

¹⁴ Mi mo'oj xtoque, co'ol s'elan jech c'u cha'al ti buch'u sna' sts'un ti ch'ut te'e. Va'i un, ta sts'ites ti vo'e. Mi muq'uib ta sjalile, oy xa lec ch'ut te'etic ta sts'et. Mi ja' lec ta xa'i sts'unel ti nucul-pate, mi ja' ti tulane, ta stuc'ulan lec ja' to ti c'uxi muc'tiquil te'tic ta xbate.

¹⁵ Ti jnaclejetic une ta xlic stunesic ta si'. Ti jlom sjepelule, ta sc'atinic. Oy jlom, ta stunesic ta sta'ajesobil pan. Ti jlome, ta smeltsanic o ta sloc'obbail junuc dios, ti xnijiletic xchimiletic liquel ta yich'el ta muq'ue.

¹⁶ Mi mo'oje, xi s'elan ta xc'ot ta pasele: Ti o'lol jc'os te'e, ta xich' tiq'uel ochel ta c'oc' yo' jech ta xtil. Ta xich' voel o beq'uet. Ta xich' ti'el ti vobil beq'uete, ti xlaet xa ta xc'ot ti o'ntonal yu'une. Xi ta xalic xtoc ti ta xc'atinic ta sts'ele: “¡Toj jun yutsil ta j'ech'el ti oyun ta ti' c'oq'ue, xq'uixet xa ta xca'i yu'un!”

¹⁷ Sc'osolil ti te' ti laj yich' meltsanel ta loc'obbail ti c'ot ta jun diose, ta xich' nijanel xchimanel bail ta stojol ti ich'bil ta muc' ta xc'ot ti xi ta xich' c'anbel ti vocole: “¡Va'lan tec'lan ta jpojel ti jech cajdiosote!”

¹⁸ Mu xa'i sbaic ti jnaclejetic taje. Mi ja'uc xa'ibeic xchiquinal. Macal ta j'ech'el ti satique. Mi ja'uc ta xilic. Yu'un ch'abal ti snopobil yu'unique.

¹⁹ Mi ja'uc ta snopic, ja' ti mu xa'ibeic ti xchiquinal ti oyuc bu xi ta xalique: “Ti jlom sjepelultac ti te'e, laj jsi'in. Ti ta yac'alile, laj jta'ajes o pan. Laj jvo o ti beq'uet ti laj jti'e. Ti jlom une, laj jmeltsan o ti vi s'elan ta q'uelele. ¡Ti c'usi nijil chimilun ta yich'el ta muq'ue, uni te' no'ox!”

²⁰ Melel cac'tic, co'ol s'elan yacalic ta slo'el tanil c'oc'. Ta slo'la sba stuc ta snopbenal yu'un ti yane. Mu xa ono'ox sta pojel coltael ma' ti buch'u jech taje. Mi ja'uc xa'ibeic xchiquinal ti naca lo'lael ti c'usi oy ta yoc ta sc'obe.

Ti Diose ta xch'ay mulil colo'il xchi'uc ta spoj scolta ti Israele

²¹ “Israel, steclumal Jacob, vuleso ta ajol ti cajtunelote, yu'un vu'un laj cac' avich' abec'tal. Israel, mu xach'ayun ta avo'nton.

²² Yu'un laj jtub ti bu la'ech' lajelave, xchi'uc ti amul acolo' jech c'u cha'al ta xch'ay batel ti toque. Sutan talel ta jtojol, yu'un laj jtic' jba ta apojel acoltael.”

²³ Jech ec, ch'ul vinajel, avanan ta muyubajel ta sventa ti oy c'usi laj spas ti Diose. Natiquil ch'enetic ti oyoxuc ta banomile, bal to xca'itic ma' le' une, chianic. Vitsetic, abnaletic xchi'uc scotol ti te'etic avu'une, avananic ta muyubajel ti bu xa c'alal xac' ti yipal avu'unique. Yu'un ti Diose laj xa yac' ta q'uelel ti yutsilal slequilale. C'ot xa ta pojel yu'un ti Israel steclumal ti Jacobe.

²⁴ Xi s'elan ta xal ti jpojvanej jcoltavanej Dios avu'un ti laj yac'bot avich' abec'tal ti c'alal mu'yuc to ox ta xavoq'ue: “Vu'unun ti Diose, ti laj jchapan ta smeltsanel scotol ti c'usitic oye. Laj jam ech'el ta q'uiel ti vinajele. Tsacal lec ti banomil c'ot cu'une, mu ja'uc oy buch'u laj scoltaun.

²⁵ Mu jq'uelojuc no'ox ta xc'ot ta pasel yu'un ti c'usi ta scaj'al ti jutc'op j'alc'opetique. Ta jsoquesbe snopbenal yu'unic ti buch'utic sna' xt'unvanique. Ta xc'ot ta pasel cu'un ti xtal xbat xa sc'opic ti buch'utic oy sbijilique, ti naca no'ox jovil c'opetic ti c'usitic sna'ique.

²⁶ Ja'uc ti c'usi ta xloc' ta yeic ti cajtuneltaque, ta xc'ot ta pasel cu'un, ti lecuc c'otuc ta loq'uel yu'unic ti cajtacbolaltaque. Ta jamal ta xcal ti ayanuc jnaclejetic ta Jerusalene, ti ta xlic yich' cha'va'anel ta ach' slumal ti Judae. Ta xc'ot ta pasel cu'un ti ta xlic yich' va'anel ta ach' ti lilijem xae.

²⁷ Stac' xcal mantal ti taquijuc ti muc' ta nabe, ti ch'abaluc yuc'umal c'otuque.

²⁸ Xi ta xcalbe ya'i ti Ciroe: ‘Vo'ot cajq'uel-chijot ta spasel scotol ti c'usi ta jc'ane.’ Xi ta xcalbe ya'i ti jteclum Jerusalene: ‘Ta liclejal ta jcha'va'anot.’ Xi ta xcalbe ya'i sc'oplal ti ch'ulnae: ‘Ta xcac'bot avicobtac.’ ”