Isaías 4 - Bible in Tzotzil de Chamula

¹ Ti jech c'ac'al taje, ta xc'ot ta pasel jun chib xa no'ox ta xcom ti viniquetique, vucvo' to antsetic ta stsac sbaic ta c'op ti ta spojbe sbaic ti jun vinique, ti xi ta xalbeique: “Ta jbain jba jtuccutic ti c'u s'elan ta jmalq'uin jbacutique, ta jbaincutic ta sa'el ti jc'u'cutic ti c'u s'elan ta jmac jbacutique, nabanuncutic ta atojol un, ti ch'aybil c'otuc sc'oplal avu'un ti q'uexlaltasbil ti jba jsatcutique.”

Jun yutsil ta xc'ot ta pasel ta ts'acal to un

² Ti jech c'ac'al taje, ta xvul ta loq'uel q'uelomalil yu'un ti Diose, ti ta xc'ot ta yutsilalic slequilalic ti buch'utic cuxulic ta xcomic ta Israele. Ti c'usitic ta xloc' x'ayanuc ta banomile, mu'yuc xa buch'u jech xtaun o ta banomil ta xa'iic ti cajal c'ot sc'oplalique.

³ Ti buch'u cuxul to ta xcomic ta jteclum Sione, ti buch'u cuch to yu'un ti cuxul comic ta jteclum Jerusalene, ti albatic to sc'oplal ti xu' ta xnaquiique, “bevbil to comic yu'un Dios le'e”, xi ta x'albat ti sc'oplalique.

⁴ C'alal jbel sc'oplal ta xchapan c'op ti Diose, ti ta xc'ot ta pasel ta stsitsvane, ta spoc loq'uel ti ch'ich' ti mal ta jteclum Jerusalén ta scoj ti smilvanejalique, ta smes ta spoc loq'uel xchopolalic ti jnaclejetic yu'un ti jteclum Sione.

⁵ Ti c'u sjamlej yosilal ti lum Sione, ti c'u yepal tsobolic ta lum ti bu taje, ti Diose ta xac' taluc voletel ic'al lumal toc ti ta c'ac'altique. Ti ta ac'ubaltique, oy c'usi xojobin no'ox ta xac' taluc xchi'uc leb c'oc'. Xojobin no'ox yutsilal ti Dios ta stojol scotol taje

⁶ yo' jech ta xchabiatic ta xpojeic. Yu'un yutsilal ti Dios taje, ta xc'ot ta queoval yu'unic ti c'alal toj c'ux ti c'ac'ale. Ta xc'ot ta smaquic ti c'alal ta xtal ti tsots ic' xchi'uc ti ya'lele.