Biblia Todo Logo
Bìoball air-loidhne

- Sanasan -

Isaías 38 - Bible in Tzotzil de Chamula


Sta poxtael yu'un xchamel ti Ezequiase
( 2 R 20.1-11 ; 2 Cr 32.24-26 )

1 Ti jech yorail taje, yal ta chamel ti Ezequiase, ti chib sc'oplal xale. Ti j'alc'op Isaías xnich'on ti Amose, bat sq'uel, ti xi laj yalbee: “Ti Diose xi ta xale: ‘J'ech'el ta xacham. Mu xapoxtaj. Alo xa me comel ti mantal ta stojol ti c'u yepal oy ta anae.’ ”

2 Ti Ezequiase laj sts'e'an sba ech'el xi ta stuq'uil yibel na, ti xi lic c'opojuc ti'inuc ta stojol ti Diose:

3 “Avocoluc, Dios, vuleso ta ajol ti ta slequil jol co'nton ti c'u s'elan laj cac' jba ta tunel ta atojole, ti ja' laj jpasilan ti xamuyubaj yu'une.” Lic smil sba ta oq'uel un.

4 Va'i un, ti Isaiase, xi albat yu'un ti Diose:

5 “Batan, xi xavalbe ya'i ti Ezequiase: ‘Ti Ajvalil Dios yu'un ti amolmuc'tot David ta vo'nee, xi ta xalbot ava'ie: Laj xa ca'i ti lac'opoj lati'ine. Laj xa quil ti laj amal ti yalel asat ti la'oq'ue. Ja' yu'un un, ta jts'acbot to ech'el vo'lajuneb (15) jabil ti ach'iel ac'opojele.

6 Yu'un ti vo'ote, ti jteclum Jerusalene, ta jpojoxuc ta yoc sc'ob ti ajvalil Asiriae. Vu'un ta jtic' jba ta xchabiel ti muc' ta lum li'e.’ ”

21 Ti Isaiase laj yal mantal ti ac'o yich' juch'el icux momol yo' jech ta spac'beic ti bu ip yu'un ti ajvalile. Ti ajvalile poxtaj.

22 Va'i un, ti Ezequiase xi laj sjac'be ti Isaiase: “¿C'usi senyail ta xquich' ac'bel jna' ti xu' ta xibat ta xch'ulna ti Diose?”

7 Xi laj stac' ti Isaiase: “Ja' jech senyail ta xac'bot avil ti Diose yo' ta xana' ti ta xc'ot ta pasel yu'un ti sc'op laj yale:

8 Ti sbisobil c'ac'al yu'un ti Acaze, ta jpas ti ta xac' sutuc yalel lajuncojuc squeoval ti c'ac'al ti bu ac'bil senyailtaque.” Va'i un, squeoval ti c'ac'ale sut muyel c'alal to slajun-cojal ti senyaile.

9 C'alal poxtaj xa ox ti Ezequías ajvalil yu'un ti Judae, xi lic xchapan jun q'uejimole:

10 Xichi laj jnope: Yutsil to ti ch'iel c'opojele, ta la xipalch'uj ech'el un; q'uelel xa ti lajebal ta jtojol une, c'ot ta tsutsel ti cuni cuxlej une.

11 Xichi laj jnope: Ta j'ech'el ta xch'ay ta jsat ta sq'uelel yutsilal ti Dios li' ta banomile. J'ech'el mu'yuc xa ta xquilbe satic ti buch'utic cuxulic li' ta banomile.

12 Yu'un ta soquesbeicun ti jna jc'uleb jech c'u cha'al yaxibal naic ti jq'uel-chijetique. Ti jcuxleje, co'ol s'elan jbej sat no ta stunes ti jpas-jolobile, ti xtuch'bil no'ox ta xac'be ti snaule. Yu'un c'ac'al ac'ubal, oy ti jvocol yu'une.

13 Sjunul ac'ubal, xi'avet yu'un ti sti'vanejale, ti co'ol s'elan jcotuc león ta xisvoch'bun ta ti'el ti jbaquiltaque. Yu'un c'ac'al ac'ubal, oy ti jvocol yu'une.

14 Co'ol j'elan xjaval-eq'uen ti naca xa xijic'jun ta jc'an ti parte ta atojolale. Xime'inal oc' xa jech c'u cha'al ti palomaetique. Jeche' xa tonol muyel ta vinajel ti jsate. Cajval, mu x'ech' xjelav ti vocole, va'ano to aba cu'un.

15 Ja'uc le' une, ¿mi yu'un oy c'usi stac' ta xcalbe ti c'alal ja' loc' ta ye stuc ti c'usi laj spas ta jtojole? Mu cha'beluc x'och ti jvayele ta scoj ti mu no'ox albajuc xbiet ti co'ntone.

16 Ja'uc ti buch'utic pojbilic chabibilic yu'un ti Diose, ja' ta xcuxiic. Jechuc oyucun xchi'uc ti buch'utic oy sc'oplal ta xcuxiique. C'ot to ta pasel ti poxtajem licom avu'une, ti joybij talel avu'un ti jch'iel jc'opojele.

17 Q'uelo avil un, ti jech mu xnel mu x'ech' ti jvocole, avi tana une, mu'yuc xa c'usi jna'. Laj to amac ta be ti q'uelel xa ox ta jtojol ti tsutsesvanej muquinale, yu'un laj to ach'aybun ti jmul jcolo'e.

18 Ti buch'utic oyic xa ta muquinale, mu xa me stotsic talel ta slequil-c'optaelot. Ti jlajel jtubeletique, laj me sc'oplal ta yalel yu'unic ti avutsilal alequilale. Ti buch'utic ti capijic xa ta lum ach'ele, mu xa xcaltic ti ta to staic ti alequilale.

19 C'ajomal xu' ta smuyubtaot ti buch'utic cuxulic toe jech c'u cha'al ta jpas ta atojol avie. Yu'un ti totil me'iletique ta slo'iltabeic yalab xnich'nabic ti avutsilal alequilale.

20 Ti Diose li' oy ta spojelune. La' jtijtic ti carpatique. Q'uejincutic ti c'u to sjalil ti jch'iel jc'opojeltic ti li' oyotic ta xijtun ta xch'ulna ti Diose.

Biblia en Tzotzil de Chamula, Chiapas, México © Sociedad Bíblica de México, A.C. 2000

Bible Society of Mexico
Lean sinn:



Sanasan