Isaías 37 - Bible in Tzotzil de Chamula

Ti lum Judae, ta xpojat yu'un Dios yo' mu stsalatic yu'un ti jnet'-osiletique

¹ C'alal jech laj ya'i ti ajvalil Ezequías ti va'i s'elan taje, lic xch'i' ta jatel ti sc'u'e. Lic slap lajemal c'u'il, svinajeb ti mu x'ech' xjelav ta xa'i ti svocole. Bat ta xch'ulna ti Diose.

² Ti Ezequiase laj stac ech'el ti Eliaquim ti xchabiej na yu'une, ti Sebna ti sbainoj ta sts'ibael ti c'usitic ta xc'ot ta pasele, xchi'uc paleetic ti vulemic xa xch'ulelique, svinajeb ti mu x'ech' xnel ta xa'iic ti svocolique. Naca lajemal c'u'il slapojic c'alal batic ta stojol ti j'alc'op Isaías xnich'on ti Amose.

³ Bat yalbeic ya'i ti xi loc' ta ye ti ajvalile: “Avi tana li'e, yacalotic ta ilbajinel, ta yich'el tsitsel, ta yich'el q'uexlal, co'ol s'elan jun ants ti ch'abal yip ta xcom c'alal ta xcol ta alajele.

⁴ Oc la ta alel ti c'otemuc lec ta sni' ta xchiquin ti Ajvalil Dios avu'un ti va'i s'elan c'opoj ti banquilal jpas-mantal soldado ti tacbil talel yu'un ti yajvale, ajvalil yu'un ti Asiria ti laj sbis ta cotol chaval ti cuxul Diose. Oc la ta alel ti c'otuc laj xch'a ta stojol ti tsitsatuc yu'un Dios ti va'i s'elan ta spase, ti Dios avu'une ya'ioj lec. C'opojan ti'inan xch'a ta sventaic ti c'u to yepal xquiclajan ta xcome.”

⁵ Yajtuneltac ti ajvalil Ezequiase batic ta stojol ti Isaiase.

⁶ Va'i un, xi c'ubanbatic talel yu'un ti Isaías ti xi ac'o yalbeic ti yajvalique: “Ti Diose xi ta xale: ‘Mu xaxi' yu'un ti spajeb c'usi xloc' ta alel yu'un ta scontrainelun yajtunel ti ajvalil Asiriae.

⁷ Q'uelo avil, vu'un ta jbain ti xpuquet no'ox liquel lo'il a'yej ti stsic'luj liquel ti yo'ntone, xchi'uc ti mu xa ta yocuc ta xa'i ta sut batel ta steclumale, ti naca xa ta xc'ot yac' sjol sbaquil cu'un ti bu taje.’ ”

⁸ Ti banquilal jpas-mantal soldado asirioe c'ot ta xchiquin ti loc' xa batel ti ajvalil Asiria ta lum Laquise. Va'i ec un, loc' batel ti ta lum Jerusalene. C'alal c'ote, xc'anobaj no'ox leto yu'un ti ajvalil yu'un Asiria ta scontrainel ti jteclum Libnae.

⁹ Ti bu taje, c'ot ta sni' ta xchiquin ti ajvalil yu'un Asiria ti laj xa svol yajsoldado ti Tirhaca ajvalil yu'un ti lum Etiopiae yo' jech ta stsac sbaic ta leto xchi'uque. Yan to no'ox velta xtoc ti ajvalil yu'un ti Asiriae, laj stac batel yajtuneltac ti xi ta xc'ot yalic ta stojol ti Ezequías ajvalil yu'un ti lum Judae:

¹⁰ “Ti apatoj lec avo'nton avaloj ta stojol ti Dios avu'une, ti ta xac'bot ana' ti mu x'och ta coc ta jc'ob ti Jerusalene, xcalticuc no'ox ava'i ti xana'uc ti naca lo'lael ta spasbote.

¹¹ Ti vo'ote, ava'binoj ti c'usitic laj spas ti ajvalil yu'un ti Asiria ta stojol scotol ti muc'tiquil lumetic ti laj xa slilinic talele. ¿Mi yu'un ta xacol ti avaloj ec une?

¹² ¿Mi yu'un cuch yu'unic ta spojel steclumaltac ti diosetic c'alal xi s'elan xquechet laj slilinic ech'el ti jmolmuc'totcutique? Tsuts yu'unic ti Gozane, ti Harane, ti Résefe, xchi'uc ti buch'utic ti oyic ta Bet-eden ti nacalic ta Telasare.

¹³ ¿Bu oyic ti ajvaliletic yu'un ti jteclum Hamate, ti Arfade, ti Sefarvaime, ti Henae, xchi'uc ti Ivae?”

¹⁴ Ti Ezequiase laj stsac ti vun ti ac'bat yu'un ti buch'utic tacbilic batele. Lic yavta ta sq'uelel. Laj taj une, bat ta ch'ulna xchi'uc. Laj xlich'an ta stojol Dios ti vune.

¹⁵ Va'i un, xi lic c'opojuc ti'inuque:

¹⁶ “Cajval, ti scotol xu' avu'une, Diosot yu'un ti Israele, ti chotolot ti bu va'alic ti c'usi oy xiq'uique, ti atuc no'ox Diosot yu'un scotol ti ajvaliletic ti ta spasic mantal ta banomile, ti vo'ote, laj ameltsan ti vinajel banomile.

¹⁷ Ts'etanbun ani' achiquin, a'yibun jc'op. Ac'o talel asat avelov, Cajval, tuc'ulano lec ava'i. C'otuc ta ani' achiquin ti va'i s'elan ta sbisot ta cotol chaval ta scontrainelot ti laj stac talel ta yalel ti Senaqueribe. Yu'un scotol ti c'usi laj yale, ja' c'opetic acontrainel ti cuxul Diosote.

¹⁸ Ta melel ono'ox unbi, Cajval, ti ajvaliletic yu'un ti Asiriae laj xa slilinic ti muc'tiquil jteclumetique xchi'uc ti yosil sbanomilique.

¹⁹ Yu'un c'alal ta diosetic yu'unic laj xchic'be. Lajic, ja' ti ma'uc ono'ox bats'i dios une, yu'un ta te' no'ox, ta ton no'ox meltsanbil yu'un stuquic. Jech o xal un, mu'yuc spac yuni c'oplal lajic.

²⁰ Avi tana une, Cajval, Dios cu'uncutic, tic'o aba ta jpojelcutic ta sventa ti oy amuc'ul atsatsale yo' jech ta sna'ic scotol ti muc'tiquil jteclumetic ti oy ta banomile, Cajval, ti c'ajomal no'ox atuc ti vo'ot Diosote.”

²¹ Va'i un, ti Isaiase xi laj stac ech'el ta yalbel ti Ezequiase: “Xi s'elan laj yal ti Ajvalil Dios yu'un ti Israele: ‘Laj xa ca'i ti ac'opojel ati'inel ti laj achapbun ti c'usi ta spasilan ti Senaquerib ajvalil yu'un ti jteclum Asiriae.’ ”

²² Ja' jech s'elan ti c'opetic ti xi laj yal ti Dios ta sventa sc'oplal ti ajvalil yu'un ti Asiriae: “Ti jteclum Sione, co'ol s'elan jech c'u cha'al junuc tseb ti stse'in ta atojole, Senaquerib. Ti jteclum Jerusalene sjimolan xa sjol ta sna'leelot c'alal ta xatam batel ti abee.

²³ ¿Buch'u la avaloj ti laj asa'be ti smule, ti laj asoquesbe ti yo'ntone? ¿Buch'u la avaloj ti laj atoy ave ati' ta stojole, ti xnelet no'ox asat laj atoy aba ta stojole? Yu'un ja' laj acontrain ti Ch'ul Dios yu'un ti Israele.

²⁴ Ta sventa ti avajtuneltaque, laj atic'be smul ti Diose, yu'un xachi laj avale: ‘Ta sventa ti mu no'ox albajuc yepal ti jcarreta ta sventa ti ac'ob letoe, limuy ech'el ta stselejtic ti bu xa toj yalobaltic ti ta vits Líbanoe. Laj jq'ui ta ts'etel ti ch'ut te'etic ti xjipte-jipte no'ox snatiquile, ti c'upil sba tojetic yu'une. Lic'ot ti bu toyol ti vitsetic yu'une, ti pimilal te'etic ti co'ol s'elan yosilal yavil ti ts'unbilal nichime.

²⁵ Ta yan banomil, laj joc' joq'uetic, laj cuch'be ti ya'lele. Taquij ta teq'uilanel cu'un scotol ti uc'umetic yu'un ti Egiptoe.’

²⁶ “Ja'uc le' une ¿mi yu'un mu xana' ya'yel ti vu'un Diosun ti jchapanoj xa ti jech ta xc'ot ta pasele? Yu'un vo'ne xa ti jech jnopbil cu'une. avi tanae, xyaquet xa cu'un. Jech o xal xu' avu'un ti ta xalilin ti nac'obbail jteclumetique, ti busul no'ox ta xcom avu'un ti slilijemale.

²⁷ Ti jnaclejetic yu'une mu'yuc xa yipic, batem xa xch'ulelic ta xi'el, q'uexlal xa ti sba satique. Jech c'otic jech c'u cha'al ti momoletic ti oy ta osiltique. C'otic jech c'u cha'al ti unin yax ju'an momoletique. C'otic jech c'u cha'al ti tsib ta xch'i ta ba texa ta xtaquij yu'un ti c'ac'al c'alal ta xtal ti tsots ic' ta sloq'ueb c'ac'ale.

²⁸ “Yu'un jna' scotol ti c'u s'elan xajoybij ta snopele, xchi'uc scotol ti c'usi ta xaliques ta spasele. Jna' lec xtoc ti liquem sc'ac'al avo'nton ta scontrainelune.

²⁹ Ti jech xcojtiquin ti sti'emal ajole, ti atoyobbaile, ta jxojbot va'i xot-xot taq'uin snitobil ani'. Ta xcac'bot sprenoal ave ta joybinot sutel ta be ti bu latale.”

³⁰ Va'i un ti Isaiase xi laj yalbe ti Ezequiase: “Ti c'usi ta xc'ot ta pasele, xi s'elan ta xac' iluc ti senyaile: Ti jabil li'e xchi'uc ti ta xtale, ta xave'ic ti bajlebal trigoe. Ja'uc ti ta yoxibal jabil ta xtale, xu' ta xlic ts'unubajanic xchi'uc ta xatsobic, xchi'uc ta xats'unic ti uvae yo' jech ta xalo'beic ti sate.

³¹ Ti c'u yepal xquiclajanic ech' to yu'unic c'ac'al ti jnaclejetic yu'un ti Judae, xi s'elan jech c'u cha'al ti ts'unubaletique: Ta staniic batel ta ts'unel ti yibelique. Pich'il no'ox ta xac' liquel ti sate.

³² Yu'un ta xcom jvoc'uc ti ta jteclum Jerusalene. Jech xtoc ti ta vits Sione, oy to buch'u cuxajtic ta xcom. Ti va'i s'elan taje, ta xc'ot ta pasel ta sventa syail xc'uxul yo'nton ti Dios ti scotol xu' yu'une.

³³ “Xi s'elan ta x'albat sc'oplal yu'un Dios ti ajvalil Asiriae: ‘Ta j'ech'el, mi ja'uc xu' ta x'och talel ta Jerusalén. Mi ja'uc jutebuc xu' yu'un ta xach' ti syolobe. Mi ja'uc xu' ta stsacvan ta leto xchi'uc ti smacobbailtaque. Mi ja'uc xu' yu'un ta spas muyel stec'ob ta sjoylej ti jteclume.

³⁴ Ta xlic stam sutel sbe ti bu tale. Mi ja'uc xu' ta x'och talel ta jteclum li'e. Ti vu'un Diosune mu me lo'iluc no'ox ta xcal.

³⁵ Ta jtic' jba ta spojel ti jteclum li'e ta sventa ti mu tuch'baj ta co'nton ti cajtunel Davide, xchi'uc ti ich'bil ta muc' ta xc'ot ti jc'oplale.’ ”

³⁶ Ti yaj'ánjel Diose loc' batel, laj smil vo'ob yo'lajunvinic ta mil (185,000) asirio viniquetic ti bu lamalique. Ti ta yoc'omal une, scotolic chamem sacub.

³⁷ Va'i un, ti Senaquerib ajvalil yu'un ti Asiriae laj stots batel ti yaxibal nae, sut batel ta Ninive jteclum.

³⁸ Oy jun c'ac'al ti c'alal ja' o ta xc'opoj xti'in ta xch'ulna ti Nisroc ti ja' yajdiose, ti Adrameleque, xchi'uc ti Sarezere batic ec. Laj smilic comel ti stotique. Jatavic batel ta yosilal Ararat. Ts'acal to un, ja' lic xcuch abtel ta ajvalil ti Esarhadón ti ja' xnich'one.