Isaías 36 - Bible in Tzotzil de Chamula

Ti Senaqueribe ta stsac ta c'op yo' ta xu'ninbe steclumaltac ti Judae

¹ Ta xchanlajunebal (14) jabilal yochel ta ajvalilal ti Ezequiase, ti Senaquerib ajvalil yu'un Asiriae, tal ta ac'-leto ta scotol ti nac'obbail jteclumetic yu'un ti Judae. Jech och ta yoc ta sc'ob ta yu'ninel.

² Ta lum Laquis to, laj stac batel jun banquilal jpas-mantal yu'un, xchi'uc jvoc' epal soldadoetic ta sq'uelel ti ajvalil Ezequías ta jteclum Jerusalene, ti volol c'otic ta sts'el ti smac yoc vo' ti xc'ot ta sts'anleb ti oy ta ac'ole, ta stuq'uil be ti ta xbat ta sbelel osiltic ti sbiinoj Chuc'ob Poc'tique.

³ Ti bu taje, loq'uic talel ta nupvanej ta be yu'un ti Eliaquim xnich'on ti Hilcías ti sbainoj ta sventainel sna ti ajvalile, ti Sebná ti sbainoj ta sts'ibael ti c'usitic ta xc'ot ta pasele, xchi'uc ti Joa xnich'on ti Asafe, yajts'ibajom ti ajvalile.

⁴ Xi albatic yu'un ti banquilal jpas-mantal yu'un Asiriae: —Albeic ya'i ti Ezequías ti xi ta xal sc'op ti muc' ta ajvalile, ajvalil yu'un ti lum Asiriae: ‘¿Bu ataoj avip ti mu'yuc ta stsic' avo'ntone?

⁵ ¿Mi yu'un ta xanop ti co'ol yip c'upil sba c'opetic xchi'uc ti c'u s'elan ta xac' sjolilale, xchi'uc ti yipal ta sliquesel ti letoe? ¿Buch'u apatoj avo'nton ta stojol ti atoyoj aba ta jtojole?

⁶ Quiloj ma' ti bu oy ti yip avo'ntone, c'otem ta jpojvanej avu'un ta xava'i ti lum Egiptoe. Ti le' une, co'ol s'elan jech c'u cha'al silemal aj ma' ti lum Egiptoe. Ti buch'u stsacoj ta xic'anel lec sba xchi'uque, ja' to xa'i ti yayijem sc'ob xchi'uque. Taje, ja' sc'oplal ti faraone, ajvalil yu'un ti lum Egiptoe. Jech ta xc'ot ta stojol scotolic ti buch'utic spat yo'ntonic ta stojole.

⁷ Ti mi xachi ta xavalbun xtoque: Ti vu'uncutique jpatoj co'ntoncutic ta stojol ti Ajvalil ti Dios cu'uncutique. ¿Mi mu ja'uc ti Ezequías laj stubbe sc'oplal ti stoyel xi'elale, xchi'uc yaltartac ti Dios taje, ti laj yalbe ya'i steclumaltac ti Judae xchi'uc ti Jerusalene ti c'ajomaluc no'ox junuc altar ti c'otuc ta yich'obil ta muq'ue?

⁸ Ja' lec ti xi xapas trate xchi'uc ti cajvale, ajvalil yu'un ti Asiriae: Ta xcac'bot cha'mil (2,000) ta cot ca' mi xatabe yajval ti buch'u ta scajlebine.

⁹ Yu'un ti vo'ote, mi ja'uc juteb xu' avu'un ta sjatviltasel ma' ti yuni votsil opisial asirioetique. ¿Mi yu'un la malabilot avaloj ti apatoj avo'nton ti ja' to xba asa' talel ta Egipto ti jcajlejetic ta ca'e xchi'uc ti ca'etique?

¹⁰ Ma'uc no'ox taje, ¿mi yu'un mu xach'un xana' ti stic'oj sba ti Dios ta jtojol ti tal jtsac ta c'ope, ta slilinel ti lum li'e? ¡Yu'un ja' ta smantal tal jtsac ta c'op ti tal jlilin ti lum li'e!’

¹¹ Ti Eliaquime, ti Sebnae, xchi'uc ti Joae xi laj stac'beic ti banquilal jpas-mantal soldado yu'un ti Asiriae: —Avocoluc, c'oponuncutic ta arameo c'op, xca'icutic une. Mu xac'oponuncutic ta hebreo c'op. Scotol ti c'u yepalic muyemic ech'el ta ba moque, ts'etel xchiquinic ta ya'yiel.

¹² Ja'uc le' une, ti banquilal jpas-mantal soldado yu'un ti Asiriae, xi laj stac' sutel ti c'ope: —Ma'uc no'ox ac'oplal xchi'uc ti avajvale ti laj stacun talel ti ajvalil Asiria ta yalbelot ava'i taje. Ja' ta sventaic ti buch'utic muyemic ta ba moque. Ti stuquique xchi'uc ti vo'oxuque ta xlic alo'ic avic'obalic xchi'uc ta xlic avuch' ti ac'abique.

¹³ Va'i un, ti banquilal jpas-mantal soldado ti yich'oj tsots yabtele, xic'anoj sba lec ti xi tsots lic c'opojuc ta hebreo c'ope: —A'yio ava'iic lec ti xi ta xalboxuc ti banquilal ajvalile, ti muc' ta ajvalil yu'un Asiriae:

¹⁴ ‘Mu teyuc no'ox aq'ueloj abaic ta xalajic ta lo'lael yu'un ti Ezequiase, yu'un mu xu' ta xaspojoxuc.’

¹⁵ Ti Ezequiase melel ta stij ajolic ti c'otuc ta avo'ntonic ta jpojvanej ti Dios ti xi ta xale: ‘Melel, ta spojotic ti Diose. Mu xac' ye sti' ta x'och ta sc'ob ajvalil Asiria ti lum li'e.’

¹⁶ Mu xats'etan achiquinic ti c'usi ta xal ti Ezequiase. Yu'un ti ajvalil Asiriae xi me ta xale: “Ac'o lamajuc ti c'op cu'untique. Jelavanic talel ta jtojol. Jech xu' xatun xalajesic ti a'uvaique, ti a'icuxique, ta yuch'el ti ya'lel ajoc' atuquique.

¹⁷ Ts'acal to un, ta xayic'oxuc batel ta jun lum ti mu yanuc jech c'u cha'al ti ateclumalique, ta jun lum ti bu yavil ti trigoe, ti uvae, yo' jech ta xapasic ti pane xchi'uc ta xapits'ic ti ya'lel uvae.

¹⁸ Ti ta xayalbeic ti Ezequías ti ta spojoxuc ti Diose, mu xach'unic, yijil lo'lael ta xataic yu'un. ¿Mi yu'un oy bu c'ot ta pasel ti oy diosetic ti cuch yu'un ta spojel ti steclumal ti c'alal tsaque ta leto yu'un ti ajvalil Asiriae?

¹⁹ ¿Bu bat ti diosetic yu'un ti Hamate, xchi'uc ti Arfade? ¿Bu bat ti diosetic yu'un ti Sefarvaime? ¿Mi cuch yu'unic ta pojvanej ti c'alal tsaque ta leto yo' ta x'uninat yu'un Asiria ti jteclum Samariae?

²⁰ ¿Bu junucal ta scotol ti diosetic ti cuch yu'un ta spojel ti muc' ta lum yu'un ti c'alal u'ninat yu'un ti ajvalil Asiriae? ¿Mi yu'un avac'toicuc la xu' ta spoj Jerusalén ti Diose?”

²¹ Mi jbeluc oy xa c'usi laj stac' ti stuquique, ts'ijil comic, yu'un albatic yu'un ti ajvalile ti mu xtac'avic jbeluque.

²² Va'i un, ti Eliaquim ti sbainoj ta sq'uelbel sna ti ajvalile, ti Sebna ti sbainoj ta sts'ibael ti c'usitic ta xc'ot ta pasele, ti Joa yajts'ibajom ti ajvalile, lic ochicuc ta vul o'nton. Lic xch'i' ta jatel ti sc'u'ique. Bat sq'uelic ti ajvalil Ezequiase yo' jech ta slo'iltabeic ya'i ti c'u s'elan laj yal ti banquilal jpas-mantal soldado yu'un ti Asiriae.