Isaías 35 - Bible in Tzotzil de Chamula

Ta sutic batel ta jteclum Sión ti lumetique

¹ Muyubajuc liquel ti taquin sbajtical banomil to oxe. Muyubajuc no'ox liquel ta nichinajel.

² Tiniluc liquel ta nich jech c'u cha'al ti lirio nichime. Spajebaluc xa yutsil ta ya'i ti muyubajele. Vits Líbano xa yilel ti c'upil sba ta x'aq'ue ta q'uelel yu'un ti Diose. Xcuxoj lec jech c'u cha'al yosilal ti Carmeloe xchi'uc ti stenlejal yu'un Sarone. Scotolic ta xilbeic yutsilal slequilal ti Ajvalile, ti spajebal smuc'ul ti Dios cu'untique.

³ Ac'o stam sba liquel avu'unic ti buch'u mu xa cha'bel stam sbae. Stsacuc liquel yip avu'un ti buch'u lubemic xae.

⁴ Xi xavalbeic ya'i ti buch'utic xch'ayet xa no'ox ti banomil xa'iique: “Tsotsanic, mu xaxi'ic, yu'un li' oy ti Dios ta stic' sba ta apojelique. Ta stsits ti avajcontraic ti c'u yepal ja' xtunic o ta xich'ique.”

⁵ Va'i un, ti buch'utic ma'satetique ta xlic yilic ti osile. Ti buch'u macal ti xchiquinique ta xlic jamuc ti xchiquinique.

⁶ Ti buch'utic coxovetique, co'ol s'elan te'tical chij xbitic no'ox liquel ta anil. Ti uma'etique xloc' xa lec liquel yu'un ti c'u s'elan x'avlajetique. Yu'un ti ta taquin sbajtical banomile, mu no'ox albajuc xbalaq'uin liquel yoc ti vo'e.

⁷ Ta xc'ot ta jun muc' ta nab liquel ti sbajtical banomil to oxe. Buyuc no'ox ta xtuc liquel sat vo' ta taquin banomile. Ta xlic ch'iuc ajetic xchi'uc jchop o ta pujetic ti bu c'otem ta snail ti oq'uiletique.

⁸ Ta xchapaj liquel ti xpolet no'ox jun be ti “ch'ul be” sbie. Ti buch'utic mu'yuc mesbil tusbilique, mu xu' x'ech'ic. Ti buch'utic mu'yuc xch'ulel xa'i sbaique, mu stac' xanavic ta stojol.

⁹ Ti bu taje, mu'yuc xa ma' ti león une, mi ja'uc xa xnopajic ma' ti jti'oval chonetique. Ti ta be taje, ja' me stamojic sutel talel ti buch'utic c'otic xa ta pojel colele,

¹⁰ ti ja' coltaatic yu'un ti Diose. Xmuyubajic ta xq'uejinic ochel ta jteclum Sión, ti j'ech'el xmuyubajic ta xnaquiique. Ta staic ti mu'yuc xa c'usi xal ti yo'ntonique, ti mu'yuc xa c'usi sna'ique, ti laj to me sc'oplal ma' ti oq'uel avanel yu'unic ta scoj yipal ti vocole.