Isaías 33 - Bible in Tzotzil de Chamula

Ta xc'ot ta pasel ti patob o'ntonal yu'un ti Diose

¹ Mu xa ono'ox cha'bel un, ti mu'yuc to avich'oj ilbajinel ti j'ilbajinvanejote, ti mu'yuc to paybil ac'oplal ti jpayc'opote. C'alal mi lajelav xa ta ilbajinvaneje, malao xa ono'ox ava'i ti ta stsuts ac'oplal ec une. Mi lajelav xa xchi'uc ti uni pay c'op une, pay xi no'ox avuni c'oplal ec.

² Cajval, c'uxubajuc avo'nton ta jtojolcutic ti ta jmalaotcutique. C'otan me ta jpojvanej cu'uncutic scotol ti xmal sacub ti osile. C'otan me ta jcoltavanej cu'uncutic c'alal yorail ti vocole.

³ C'alal ta xa'iic ti jteclumetic ta xasibtasvane, ta xjatavic batel. C'alal ta xatic' aba ta pac-c'ope, tan puc ta xbatic ti muc'tiquil lumetique.

⁴ Yu'un ti scontraique, co'ol s'elan junuc c'ulub ic'uneb ti osil xvoletic no'ox talele, ti lamal ta xc'ot ta stojolique, ta xpojbatic batel ti sc'ulejalique.

⁵ Ti Diose, tsots yabtel yich'oj, yu'un nacal ta vinajel. Vul xa ta loq'uel yu'un ta Sión ti naca oy smelol stuq'uile, xchi'uc ti lequil chapanele.

⁶ Yu'un staoj yav tojobtasbilic yu'un. Ti bijilile, xchi'uc ti snopbenale, jun to jpojvanej c'ulejal c'otem. Ti cajal xi'tabil ta xc'ot ti Diose, ja' mu'yuc c'usi jna'tic yu'un.

⁷ Ti buch'utic mu tijbajic ta c'ope, a'yio ava'iic, ti yan snuq'uic ta a'yiel ti x'avlajetic ta calleetique, ti stuc xa no'ox jech ti oq'uel avanel ta spasic ti buch'utic tacbilic talel ta slamajesel ti c'ope.

⁸ Yu'un sts'ijlajan ta j'ech'el ti beetique. Mi junuc xa oy buch'u ta xanav ti bu taje. Yu'un ju'bil ta teq'uel ta xc'ot ti trate pasbile. Ti c'usi nopbile, mi ja'uc xa ta xich'an sbaic ta muc'.

⁹ Yu'un ti banomile oy ta me'inal ta at o'nton. Ti vits Líbanoe q'uexlal apun xa ta xtaquij ta j'ech'el. Joybij xa ta sbajtical ti stenlejal ti Sarone. Ti Basane xchi'uc ti vits Carmeloe, t'ajal xa ta j'ech'el.

¹⁰ Ti Diose xi ta xale: “Avi tanae, ta xlic abtejcun. Ta xcac' ta ilel scotol ti jmuc'ul jtsatsale, xchi'uc ti quich'oj tsots cabtele.

¹¹ Ti c'usi nopbil avu'unique, ti avabtelique, c'a' jobel no'ox, jeche' no'ox, ti co'ol s'elan c'oc' xloclij liquel ta yic'al no'ox que ta stsutsesat yu'une.

¹² Ti jteclumetique, stuc tan ta xc'otic ta tsutsel, jech c'u cha'al junuc bojbil ch'ix ti ta xtil ta c'oq'ue.

¹³ Yu'un ti buch'utic nom to oyique, ac'o ya'iic lec ti va'i s'elan chapal cu'une. Ac'o yojtiquinic jmuc'ul jtsatsal ti buch'u nopol oyique.”

¹⁴ Ti ta Sione, ta sniquesatic yu'un xi'el ti jsa'muliletique. Ti buch'utic sa'sunic no'ox ta spasel ti chopole, ta xbat xch'ulelic ta xi'el, ti xi ta xalique: “¿Buch'u xa ono'ox la junucal ta xijcuxiotic ti xijbalet yu'un ti c'oc' ti j'ech'el ta stsutsesvane, ti mu no'ox albajuc ti sleb sbatel osile?”

¹⁵ Ti buch'u ta stam batel ta spasel ti c'usi leque, melel ti c'usi ta xale, ti ma'uc laj sta o c'ulejal xchi'uc ti oy c'usi laj yac'be yipal ta spojele, ti mu'yuc laj xchon sba xchi'uc ti mich'ob c'abale, ti mu'yuc sco'oltas sba xchi'uc jech c'u cha'al ta x'alilanbat yu'un ti jmilvanejetique, ti ma'uc q'uelel ta spasel ti chopole,

¹⁶ ti buch'u jech taj une, staoj ti mu'yuc c'usi sna'e. Muc'ul ton spojobbail ac'bil ti bu tiq'uile. Oy no'ox ta ye ta sti' ti sve'el yuch'ome.

¹⁷ Ta xlic to avil yutsilal slequilal ti ajvalile. Nom to ta j'ech'el ti bu ta xpaj talel sts'aquil yosil ti jteclume.

¹⁸ C'alal ta xavules ta ajol c'u s'elan ech' talel ta atojole, xi ta xlic avale: “¿Bu bat ti buch'u xye'et no'ox sc'ob ta sc'anel ti patane? ¿Bu bat ti buch'u sbainoj ta sq'uelel ti c'usi chechbil ta xich' bisele? ¿Bu bat ti buch'u sbainoj ta yatel ti natil luchlebaletique?”

¹⁹ Ta xlaj sc'oplal ti capalot ta naclej xchi'uc ti jteclum ti mu xich'beic ti smelole, ti chucul ta a'yibel ti sc'ope, ti yan ta jmec ti bats'i c'op yu'une, ti mu'yuc buch'u xchiquintaj yu'une.

²⁰ Ac'o ech'el asat ta jteclum Sión ti ja' jun pasob q'uin cu'untique. Toyo ech'el asat ta jteclum Jerusalén ti chabibil leque, ti co'ol s'elan jun axibal na ti lec va'anbile, ti tsots pajal ti spajob te'altaque, ti mu xtuch' ti yaq'uil snitlebtaque.

²¹ Ti bu taje, jun yutsil ta xac' iluc yutsilal slequil ti Dios ta jtojoltique. Ja' jun yavil uc'umetic ti jamal lec ti yacan ta x'oquine. Mu xu' ta x'ochic batel ti jcontrainvanejetic ta nuxetel xchi'uc sbarcoic ti ta te' no'ox ti majob vo' yu'une, xchi'uc ti yan muc'tiquil barcoetique.

²² Yu'un ja' xa jchapanvanej cu'untic ti Diose. Yu'un ja' xa j'ac'-mantal cu'untic ti Diose. Yu'un ja' xa Ajvalil cu'untic ti Diose. Yu'un ja' xa jpojvanej cu'untic ti stuque.

²³ Jech o xal un, xch'ojonaltac ti barcoetic taje, mu xa stsin lec yu'un ti te' ti oy ta toyole. Mi ja'uc xa xlich' sba lec ti poc' sventa ti xtuch'ob iq'ue. Yepal no'ox ta jpojbetic ti c'usitic toyol stojol staojic talel ti cajcontratique ti ta to sta ta maquiel ec ti ma'sate, ta x'ochic ta xchajel ec ti coxovetique.

²⁴ Yu'un mu'yuc junuc jnaclej ti xi ta xale: “Jchamel lajelun ta xca'i.” Yu'un ti Diose laj stubbe smul scolo' ti jnaclejetic ta Sione.