Isaías 32 - Bible in Tzotzil de Chamula

Stuq'uil yabtel ti ajvalile

¹ Ta xvul ta loq'uel jun ajvalil ti tuc' yabtel ta xventainvane. Ta xlic va'iuc its'inal ajvaliletic ti tuc' ta xchapanvane.

² Ti jujunique, ta xc'ot ta macobbail yu'unic ti c'alal tsots xjumet ti iq'ue, ta pojobbail c'alal xchajet ti vo' xchi'uc ti yic'ale, co'ol s'elan polbil talel yoc be vo' ta smaltael ti taquin banomile, co'ol s'elan ta squeoval jun muc' ta ton ti oy ta sbajtical banomile.

³ Viq'uil lec ti satique. Ts'etel lec xchiquinic ta ya'yiel ta xchapanel ti c'ope.

⁴ Yu'un mu ta aniluc ti c'usi ta spase. Yich'oj sba lec ta c'ac'al ti c'usi spase. Jamal lec ye ta yalel scotol ti c'u s'elan ta xile.

⁵ Ti jnaclejetique mu'yuc xa ta sbisic ta lequil vinic ma' ti buch'u chopol ono'ox ta spas sbae. Mu'yuc xa ta xac'beic ta toyol sc'oplal ma' ti buch'u mu'yuc xchiquin ta spasel ti c'usi xal yo'ntone.

⁶ Ti buch'u mu'yuc xchiquin xa'i sbae, s'esomaj no'ox ta sjol ti c'usi chopol ta snop ta spasele. Ta sa'ilan ti c'u s'elan ta xmilvane, ti sjuteluc no'ox c'op yu'un ta stojol ti Diose. Jeche' smeyoj batel yoc sc'ob yu'un ti buch'u ta xcham ta vi'nale. Sts'icoj uch' vo' yu'un ti buch'u oy ta taqui ti'ile.

⁷ Ti buch'u mu'yuc xchiquin xa'i sbae, xch'i o ta xa'i ti soquesvaneje. Xbet'bun no'ox ye ti c'usi xloc' ta alel yu'une. Naca sjutbel smul ta yilbel svocol ti me'un mu'nate, xchi'uc ti buch'u juteb ta yo'nton ta sc'an ti spojele.

⁸ Ja'uc ti buch'u oy slequil yutsil yo'ntone, naca lec ti c'usi ta xloc' ta nopel yu'une. Ti c'usi lec ta snope, ta xc'ot ta yip xchi'uc.

Scontrainel ti antsetic ti mu'yuc sni' xchiquinal yu'unique

⁹ Ti vo'oxuque, antsetic ti mu xana' xavich' abaic ta c'ac'ale, a'yio ava'iic lec ti oy c'usi ta xcalboxuque. Antsetic ti ta atuc no'ox cuxuloxuc ta xava'iique, ts'etano lec ani' achiquinic ta ya'yiel ti jc'ope.

¹⁰ Avi tanae, apatoj avo'ntonic ta j'ech'el. Ja'uc ti li' ta jun jabil x'ech' batele, jeche' xa xvayvun liquel ti lum ach'el avu'unique, yu'un laj to sc'oplal ma' ti c'usitic xloc' x'ayane, ti ta to xlic atsobbeic sat ti uvae.

¹¹ Ti vo'oxuc ti lec no'ox ta xava'iic ti mu xana' xavich' abaic ta c'ac'ale, a'yibeic xi'elal jutuc. Ti vo'oxuc ti atuc no'ox cuxuloxuc ta xava'i abaique, c'otuc ta avo'ntonic ti mu'yuc c'usi xu' yu'un ti lum ach'ele. Loq'uic ti ac'u'ic ti vi yelanile. Lapic lajemal c'u'il svinajeb ti mu x'ech' xnel ti avocolique.

¹² Aq'uic ta ilel ti mu x'ech' ta xava'iic avocolic yu'un ti c'upil sba osiletique, ti ve'ebal banomil ti bu ts'unbil ti uvae.

¹³ Ta xlic ch'iuc ch'ixetic xchi'uc chopol momoletic ta jteclumal, ta stojol ti buch'utic xmuyubajic ta jujubej na ti oy ta jteclum ti lec xa'iic ta spasel ti c'usitic xch'i o xchi'uquique.

¹⁴ Mu'yuc yajval ti nail chapanobbaile. Ti ch'ijil no'ox ta q'uelel ti lume, ta xc'ot ta sbajtical banomil. Jipbil tenbil ta xc'ot ta j'ech'el ti macobbailetique. Xmuyubaj no'ox xlametic liquel ti te'tical burroe. Ta xc'ot ta yavil sve'eb ti yan chon bolometique.

¹⁵ Ja' to mi c'ot yorail ta xcha'vul ta loq'uel ta jtojoltic ti smuc'ul stsatsal ti j'ac'-cuxlejal Diose, ta xlic joybijuc ta ve'ebal banomil ma' ti sbajtical banomil une. X'ech' to yutsil liquel ti ve'ebal banomile.

¹⁶ Ti tuq'uil lequil chapanele, oy ta sjunul ti bu c'alal smacoj ti lume.

¹⁷ Ti jech oy ti tuq'uil chapanele, ta xlic ayanuc ti lamajem ti c'ope. Mu'yuc ma' ti vul o'ntone. Sbatel osil mu'yuc c'usi jna'tic.

¹⁸ Ti jlumale mu'yuc c'usi sna'ic ta xcuxiic. Lec chabibil ti bu nacalique. Xcuxet no'ox banomil ta xa'iic ta jujun snaic,

¹⁹ ac'o mi laj yich' bojel ti te'tique, ac'o mi aq'ue ta lo'il maxil ti lume.

²⁰ Xamuyubajic no'ox liquel, buyuc no'ox oy ti vo' ta xloc' talel ta smaltael ti ts'unubale, xyax ju'an no'ox ti unin momoletic ti mu xlaj slo'ic ti burroe, ti vacaxe.