Isaías 31 - Bible in Tzotzil de Chamula

Scontrainelic ti buch'utic ta sa' scoltaelic ta muc' ta lum Egiptoe

¹ Mu xa ono'ox cha'bel un, ti buch'utic ta xbat sa' scoltaelic ta muc' ta lum Egipto ti yalojique, ti spatoj yo'ntonic yu'un ti oy ti ca'etique, ti spatoj yo'ntonic ta stojol ti buch'utic ep ti scarretaique, ti ep ta jmec ti jcajlejetic ta ca' yu'une, ti mu ja'uc jutebuc ta stoy batel satic ta stojol ti Ch'ul Dios yu'un ti Israele, ti mu ja'uc ta x'och ta yo'nton ta sa'el ti Diose.

² Yu'un ti stuque mu teyuc no'ox xch'ayet, sna' c'u s'elan ta sliques ti vocole. C'alal ta xal ti oy c'usi ta spase, mu xch'ay ta be yu'un. Ta sliques yabtel ta scontrainel ti buch'utic spajeb xa no'ox c'usitic ta xloc' ta ye sti'ique, xchi'uc ti buch'utic ta stic' sba ta scoltael ti jchopol joletique.

³ Ti jnaclejetic ta Egiptoe, viniquetic no'ox, mu yu'unuc diosuc une. Ti sca'ique, ch'ich' beq'uet no'ox yich'oj, ma'uc ma' ti mu xt'ab ta milel une. Ti Dios une ta syales yoc sc'ob ta stsitsel ti buch'u ta sbis sba ta jpojvaneje, xchi'uc ti buch'u ta sa' spojele. Ta xtub sc'oplal scotolic ta j'ech'el.

⁴ Ti Diose xi laj yalbune: “Ti león ti laj xa smil jcotuc ti chije, ma'uc ma' ti tsacbil xa ta xi'el yu'un ti jq'uel-chijetique, manchuc mi ta svol sbaic ti x'avlajetic xa ta sibtasele. Ja' jech ta xvul ta loq'uel ti Dios ti scotol xu' yu'une yo' jech ta spoj ti steclumal ti oy ta vits Sione.

⁵ Jech c'u cha'al ti mut xvilet no'ox ta spoj ti yole, jech ta spoj jteclum Jerusalén ti Dios ti scotol xu' yu'une. Ta sq'uel, ta xchabi. Ta spacbe sc'oplal, ta xc'ot ta colel yu'un.”

⁶ Sts'unubal snitilul Israel, sutanic talel ta stojol ti Buch'u ep laj xa asa'beic ti sti'ole.

⁷ Yu'un c'alal ta xc'ot yorail ti acotolic ta xlic avalopatinic comel ti loc'tabil diosetic ta oro xchi'uc ta plata ti laj ata o amulic xchi'uc ta scoj ti mu ch'anuc xi ac'obic ta sloc'taele,

⁸ ti Asiriae, espada xve' yu'un. Ma'uc jve'el j'uch'-vo' ma' ti buch'u ta x'abolaj yu'unique. Xc'uletic ta jatobal ti svinictac c'alal xyaquet ti letoe. Ta x'ochic ta mosovil ti querem viniquetic j'ac'-leto yu'unique.

⁹ Ta scoj ti mu albajuc ti xi'ele, xvilet no'ox batel ta jatobal ti ajvalil yu'unique. Ti banquilal soldadoetic yu'un xtoque ta stenic comel ti sbanderaique. Mu lo'iluc no'ox ta xal ma' ti Dios une, ti ta Jerusalene, tilem xa jun c'oc' yu'un ta stsits o ti yajcontrae.