Isaías 30 - Bible in Tzotzil de Chamula

Ta xcontrainatic ti buch'utic ta sa' spojelic ta lum Egiptoe

¹ Xi ta xal ta jamal ti Diose: “Mu xa ono'ox cha'bel un, ti toyobba alab nich'nabile, ti mu xiyaq'uicun ta ventae, ti ma'uc cac'ojbeic sna'ic ti c'usitic ta xlic xchapanic ta spasele, ti c'ajomal no'ox ta sa'beic xchi'il smulic ti c'alal oy ono'ox ti smulique.

² Mi ja'uc xa ta sjac' sbaic ta jtojol. C'ajomal xa no'ox xbitetic batel ta anil ta Egipto ta sa' ti spojel scoltaelic ta stojol ti faraone, ti xlaet xcuxet xa ta xa'iic ti ventainbil ta xc'otic yu'un ti Egiptoe.

³ Ja'uc le' une, naca lo'lael no'ox ti pojel coltael yu'un ti faraone. C'ajomal no'ox q'uexlal ta staic ti snopojic ti lec oyic ti ventainbilic yu'un ti Egiptoe.

⁴ Ac'o mi laj xa ataquic ech'el ti j'al-mantal j'ich'-c'op ta jteclumetic yu'un ti Zoane xchi'uc ti Hanese,

⁵ acotolic c'ajomal no'ox ta xalajic ta lo'lael yu'un ti jteclum ti yan sjol yo'ntone. Mi ja'uc jutebuc ta xataic ti coltaele. Mi ja'uc oy c'usi ta xataic yu'un. C'ajomal no'ox ta xataic ti vul o'ntone, ti vocole.”

⁶ Xi ta xcaj'albat sc'oplal ti chon bolometic ti oy ta yosil Negueve: Ta sjunul ti c'u sjamlej smacoje, yan sba xi'elal ta j'ech'el ti naca xa leónetic ti yan sba xloquet snuq'uic ta c'uletele, xchi'uc ti jti'oval quiletel chonetique, xchi'uc ti muc'tiquil tsajal jti'oval chanul nab ti sna' xvilique. Ta spojic batel ti ac'ulejalique, ti c'usitic toyol stojole. Ta xac'beic ech'el xcuch ti burroe, ti camelloe, c'alal to ta Egipto jteclum ti chopol sjol yo'ntonique.

⁷ Yan stalel ti c'u s'elan xu' yu'une. Laj to sc'oplal ma' ti sna' xcoltavane. Jech o xal xi laj cac'be ti sbie: “Pucujil jti'oval chon ti xloquet snuc' ti c'ajomal no'ox sibtasvanej sna'e.”

⁸ La' li'e, ts'ibao ta jpech tenel-te'. Bejano comel lec ta ts'ibabil vun yo' ta sq'uelic ti buch'u ts'acal to ta xtale, ti sbateluc osil mu xlaj ta alilanel ti sc'oplal yu'unique.

⁹ Ti jnaclejetic li'e, toyobba jteclum ti mu'yuc stuq'uil yo'ntonique, ti mu ja'uc sc'an xa'i ti c'u s'elan ta xchanubtasvan ti Diose.

¹⁰ Ti buch'u jamal sba satique, xi ta x'albatique: “Mu me ave'icuc xa ta yalel ti c'usi jam aba asatic ta yilele.” Xi ta x'albatic ti j'alc'opetique: “Mu xavalic ti c'usi melel la'ac'bat anopique. Albuncutic no'ox ti c'usi xtal ta ajolique. Mu xamacbuncutic ta be ti c'usi batem co'ntoncutic ta sc'upinele.

¹¹ Ictaic ti bu lec atamojique. Valopatinic comel ti tuq'uil bee. Laj c'op ta xatsatsal iq'ueic batel ta stojol ti Ch'ul Dios yu'un ti Israele.”

¹² Jech o xal ti Ch'ul Dios yu'un ti Israele, xi ta xale: “Ti vo'oxuque laj avalopatinic comel ti c'u s'elan laj avich'ic bijubtasele. Batem ta ajol avo'ntonic ti ilbajinvaneje, xchi'uc ti c'usi chopol ta spasele, ti xach'i xac'opojic xa yu'un ta xava'iique.

¹³ Jech o xal un, amul atuquic. Co'ol a'elanic jech c'u cha'al jun toyol moc ti tsiq'uemic xae, ja' ta xava'iic ti lomemoxuc xa ta banomil yu'une.

¹⁴ Ta xavich'ic lilinel ta j'ech'el jech c'u cha'al junuc jarru bin ta xlilij, ti mu'yuc xa ta xcom ti sjepelule. Mi ja'uc xa jutebuc ta xtun xet'elul ti ta sloq'uesobil ac'al ta yavil ti c'oq'ue, mi ja'uc ti ta xtun ta pulobil vo' ta joq'ue.”

¹⁵ Ti Ajvalile, Ch'ul Dios yu'un ti Israele, xi ta xale: “Sutanic talel, ts'ijano abaic ta xcuxel avo'ntonic yo' jech ta xacolic. Ti jech ts'ijiloxuc ta xacux avo'ntonique, ti apatoj avo'ntonique, ja' yipal avu'unic.” Ja'uc le' une, mu xac'anic.

¹⁶ C'ajomal xachiic liquele: “Mo'oj, cajetcutic batel ta ca' jatavcutic loq'uel.” Jech ono'ox ta xajatavic loq'uel ava'uquic unbi. Xachi laj avalic xtoque: “Cajlucutic batel ta carreta ti xvilet no'ox ta anile.” Jech ono'ox xaval ava'uquic unbi, xvilet ta anil ma' ti buch'u nutsbil une.

¹⁷ Ta xc'ot ta pasel ti ta jun no'ox vinique, xc'ulet ta jatobal yu'un jmil (1,000) ta vo' ti batem xa xch'ulelic ta xi'ele. Ta xc'ot ta pasel ti acotolic ta xajatavique, ti vo'ob no'ox avajvalic ti batem ach'ulelic ta xi'el yu'une, ti jun chib xa ta xacomic jech c'u cha'al ti te'tic ta vitstic ti jun chib xa ta xcome. Mi mo'oje, co'ol s'elan jech c'u cha'al jun senyail te' ti pajal ta jol vitse.

Albil sc'oplal ta xich' c'uxubinel ti jteclume

¹⁸ Ja'uc le' une, ti Diose ta smala, yu'un oy xc'uxul yo'nton ta atojolic. Yo'ntonuc xa ya'i ta xac'boxuc avilic ti syail xc'uxul yo'nton ti Ajvalile, ja' jun Dios ti sna' stic' sba ta pojvaneje. ¡Mu xa no'ox c'usi sna'ic scotolic ta j'ech'el ti buch'utic smalaoj spojelic ta stojol ti Diose!

¹⁹ Xi ac'oplalic yalab xnich'nab Dios ti nacaloxuc ta Jerusalene: Mi ja'uc xa ta xa'oc' liquel. Ti Diose ta xlic c'uxubajuc yo'nton ta atojol ti ta xa'i ti xa'avet no'ox ta sc'anel ti coltaele. Ta jech yepal ta stac'bot talel ti c'alal naca to no'ox laj ya'ie.

²⁰ Ac'o mi vulel ta atojolic ti avocolic yu'un ti Dios jech c'u cha'al ti jayib velta ta xave'e, ti avajchanubtasvanejune mu xaquictaot comel mi jliqueluc. Ta xavil lec ta aba ta asat atuc.

²¹ Mi xi ta xaq'uej aba loq'uel ta stuq'uil bats'i c'obile, mi ta stuq'uil ts'et c'obile, ta xava'i ti oy buch'u ta xc'opoj ta apate, ti xi ta xale: “Li' ma' ti be une, li'e, li' ta xatam ech'ele.”

²² Ta xc'ot ta pasel ti mu'yuc xa stu avu'un ta xavil ti loc'obbail ti meltsanbil ta platae, ti loc'obbail ti bonanbil ta oroe. Ta xc'ot ta pasel ti mu'yuc xa stu avu'un ta j'ech'ele. Ta xabis ta c'a'ep liquel.

²³ Ti Diose ta stac talel vo' yo' jech ta xats'un ta banomil ti ts'unubal avu'une. Ti banomile mu albajuc ta xac' ti trigoe, yu'un lec c'a'em ta j'ech'el. Ti jech c'ac'al taje, buyuc no'ox xlamet ech'el ta xve' ti chon bolometic avu'une.

²⁴ Ma'uc no'ox taje, ti jloc-osil vacax avu'une, ti burroe, ta staic ta lajesel ti jun yutsiquil c'ajben ta j'ech'ele.

²⁵ C'alal ta xc'ot sc'ac'alil ti muc'ul milbaile, xchi'uc ti c'alal ta xyal ta lum ti nac'obbail ti lec xu' yu'une, buyuc no'ox xpumlajet chlaj tucuc loq'uel ti uc'um ta pimilal te'tique, xchi'uc ti ta toyol vitstique.

²⁶ Ti Dios une ta xpoxtabe ta xpixbe syayijemalic ti steclumale. Va'i un, ta xc'ot ta pasel ti xchijlajan no'ox xojobal ti u jech c'u cha'al xojobal ti c'ac'ale. Vucub to velta ta xjelav yip xojobal ti c'ac'ale, ti co'ol to s'elan oy vucbej c'ac'al ti jmoj svoloj sbaique.

Stsitsel ti Asiriae

²⁷ Q'uelo avilic un, ti Diose le' xa xtal ta nome. Tilem xa ti sc'ac'al yo'nton ti xvolet no'ox talel ti xch'ailale. Mu albajuc ta x'ilin. Co'ol s'elan c'oc' ta stsutsesvan ta j'ech'el xchi'uc ti c'usi ta xloc' ta yee.

²⁸ Ti yic'al yee, co'ol s'elan junuc uc'um ti xbalaq'uin no'ox ta jujujote, ti jutuc xa mu jva'lejuc ta xc'ot ti spimile. Yu'un ta xtal xpech' ta teq'uel ti muc'tiquil lumetique ja' to ti c'uxi ta xc'ot ta tubel ti sc'oplalique. Ta xc'ot ta pasel yu'un ta yeic no'ox ta xch'ayic ti jnaclejetique.

²⁹ Ja'uc ti vo'oxuque, ta xc'ot ta atojolic ti oy liquel q'uejimole jech c'u cha'al ti q'uin ti chapanbil lec ta xich' pasel ta ac'ubale. Xpatet xa avo'nton ta j'ech'el jech c'u cha'al yutsil ta xa'i ti buch'u xvechet no'ox ta ya'yiel ti ama ti ta xich' oq'uisanel c'alal ta xbat ta vits yu'un Dios spojobbailic ti israeletique.

³⁰ Ti Diose ta xac' ta a'yiel sc'opojel ti tsots yabtel yich'oje. Ta xac' ta ilel smuc'ul stsatsal ti xi'bal sba c'u s'elan ta sliques ti yabtele. Mu no'ox albajuc sleb c'oc' ta stsutsesvan ta j'ech'ele. Xc'avlajet no'ox yu'un ti chauque. Xchajet no'ox ta j'ech'el vo' xchi'uc ti bote.

³¹ Ti jech ta xich' a'yiel sc'opojel ti Diose, xchi'uc ta xich' jambel yav ti tsitsel ta xaq'ue, ti asirioetique batem xa xch'ulelic ta xi'el yu'un.

³² Ti jujumoj ta xc'ot ta sbaic ta x'ac'batic yu'un ti Diose, xnic no'ox liquel ti tampole ti arpae. Ti Diose, toj xi'bal sba ti c'u s'elan ta stsacvan ta letoe.

³³ Le' xa talel ta vo'ne, xchapanoj sba ta sventa ti lum Asiriae, xchi'uc ti ajvalil yu'une. Mu no'ox albajuc yepal, Mu no'ox bisbiluc ta j'ech'el ti svocol ta sta yu'une. Busanbil no'ox ta j'ech'el ti si' ti yacal ta xtil ta c'oq'ue. Ti Diose ta xvuch'ta ta stilesel ti co'ol to s'elan junuc malemal azufre ti xloclij liquel yu'une.