Isaías 23 - Bible in Tzotzil de Chamula

Ta xcaj'albat sc'oplal ta xlic yich' contrainel ti lum Tiroe xchi'uc ti lum Sidone

¹ Xi ta xcaj'albat sc'oplal ta scontrainel ti lum Tiroe: Xme'inal oq'uic xa ma' ti jxanviletic ta barco yu'un ti Tarsise, yu'un lilij xa ti bu xloc' x'och ti barcoe. Mu'yuc xa c'usi x'ayan laj staic ta loq'uebal ochebal yu'un barco ti sutic talel ta Chipre banomile.

² Ti jnaclejetic ta Tiroe xchi'uc ti jbolomajeletic ta xliquic ech'el ta Sidone, ts'ijilic xa. Ti jbolomajeletic yu'unique ta x'ech' xtuch'ic ti muc' ta nab

³ ti mu albajuc sjamlej ti vo'e. Lec ta spasic canal xchi'uquic ti c'usitic ta xloc' ta Sihore, xchi'uc ti c'usitic ta xloc' ta sti'il uc'um Niloe. Lec ta xchon ti sbolomalic xchi'uc ti muc'tiquil lumetique.

⁴ Ta xlic q'uexavan ta j'ech'el lum Sidón ti amacoj ti muc' ta nabe, ti xi no'ox ta xavalbe abae: “Mu jta jvocol jech c'u cha'al ti ants c'alal ta xlic xc'uxul xch'ut ta svoq'uesel ti yole, mi jutebuc ma' ti jech ta xc'ot ta jtojole. Mu'yuc calabtac ta sts'itesel, mi ja'uc ta stojobtasel jtsebtac.”

⁵ C'alal ta xc'ot ti lo'il a'yej ta Egiptoe, mu xnel mu x'ech' ta xa'iic ti vul o'nton ti c'usi c'ot ta stojol ti Tiroe.

⁶ Xi ta xalique: “Batanic ta lum Tarsis. Me'inal oc'anic, jnaclejetic ti nacaloxuc ta ti' nabe.”

⁷ ¿Mi ja' ti lum le'e, ti le' xa talel ta vo'ne cajal ti sc'oplale? ¿Mi ja' to lum le'e, ti xch'i xc'opoj o xchi'uquic ti c'usitic xbat o'ntonal ta sc'upinel ti c'usitic oye? ¿Mi ja' ti lum le'e, ti lec xa'i xbat snacan sba ta namal banomile?

⁸ ¿Buch'u laj spas mantal le'e, ti laj yich' contrainel ti lum Tiroe, ti c'alal banquilal jpas-mantal to oxe, ti naca ajvaliletic ti jbolomajeletic yu'une, ti caj tsacal xa'i sbaic ta banomil ti jmanolajeletic yu'une?

⁹ Ja' laj spas mantal ti Dios ti scotol xu' yu'une yo' jech ta spec'tsanbe ti stoyobbaile, ti batuc ta yoc scotolic ti buch'utic toj jelavem xa'i sbaic ta banomile.

¹⁰ Lum Tarsis, lic abtelano ti banomile, yu'un laj xa sc'oplal ti buch'u ta spojote.

¹¹ Ti Diose laj yac' talel sc'ob ta muc' ta nab ti nic ta xi'el ti muc'tiquil lumetique. Laj yal mantal ta slilinel ti nac'obbailetic ti oy ta Canaán banomile.

¹² Xi laj yalbe ti Sidone: “Ilbajinbil tseb, ic'tao xa aba ta sc'upinel ti c'usitic jeche' no'ox ta xbat o'ntonal yu'une. Ac'o mi xana' c'usi xavut aba ta xajelav ech'el ta Chipree, mi ja'uc ta xata jun avo'nton ta xacuxi ti bu taje.”

¹³ Q'uelo avil ti banomile ti c'otem ta sventa ti bu xloc' x'och ti barcoe. Ti caldeoetique lic sva'anic natiquil luchlebal, ti laj svoq'uic ti nail pasob mantal ta Sidone, ti stuc xa sbusulil com yu'unique. Ja' oy smulic, ma'uc ti Asiriae.

¹⁴ Me'inal oc'anic, tarsisetic ti xacajetic no'ox ta barcoe, yu'un lilij xa ti ja' apatoj avo'nton ta stojole.

¹⁵ Ti jech yorail taje, lajuneb xchanvinic (70) jabil ch'aybil ta xc'ot ta o'ntonal ti jteclum Tiroe, ti jech sjalil ta xch'i xc'opoj ti jun ajvalile. C'alal mi c'ot ta tsutsel ti lajuneb xchanvinic (70) jabil une, xi s'elan ta xlic yich' q'uejintael ti lum Tiro jech c'u cha'al sq'uejimolal jun ants ti sna' sbolomalin sbae:

¹⁶ “Ch'aybilot ta o'ntonale, ants ti xabolomalin abae, tsaco ti avarpa une, xanio sjunul ti jteclume. Tijo xchi'uc ti jun yutsil músicae, q'uejintao ep ta chop q'uejimoletic. Jq'ueltic quic mi xasvulesot to ta yo'ntonic.”

¹⁷ C'alal mi ech' ti lajuneb xchanvinic (70) jabil une, ti Diose ta xlic svules ta yo'nton ti Tiroe. Ti stuque ta xac' sba ta ch'amunel. Ta xlic sa' smulic xchi'uc muc'tiquil lumetic ta sjunlej ti banomile.

¹⁸ Ja'uc le' une, ti scanal yu'un ti sbolomale, ta xc'ot ta yu'un ti Diose. Mi ja'uc ta xich' naq'uel, ta xich' tsobel. Ta xich'ic ac'bel ti buch'utic yac'oj sba ta tunel yu'un ti Diose yo' jech ep ta sman ti sve'elique, xchi'uc c'u'iletic ti jun yutsiquile.