Isaías 22 - Bible in Tzotzil de Chamula

Ta xcaj'albat sc'oplal ti Jerusalene

¹ Ta stenlejal ti oy c'usi ta xac' ta q'uelele, oy bu xi ta xcaj'albat ti sc'oplale: ¿C'usi c'ot ta pasel ya'yel ti scotolic ta xmuyic ta xcha'cojal sjol snaique?

² Jteclumetic ti xavoletic no'ox ta yalel muyele, ti xavochvunic no'oxe, ti batem avo'ntonic ta sc'upinel ti c'usi xbat o'ntonal yu'une, ti buch'u anima xa sc'oplale, mu'yuc xlajic ta espada, mi ja'uc chamic ta leto.

³ Scotol ti banquilaletic avu'une, xvilic no'ox loq'uel ta anil ta jatobal. Ti ye'bil xa ti syolobalique, tsacbil c'otic ta chuquel. Ti avinictac ti spajeb xa mu sna' xi'ique, ta nom jatavic batel. Ja'uc le' une, tsacbil c'otic ta chuquel.

⁴ Jech o xal xichi laj cale: Q'uejo aba loq'uel ta jtojol, yu'un ta jc'an ta jmil jba ca'i ta oq'uel. Mi ja'uc jc'an patbel co'nton yu'un ti c'usi chopol ta xc'ot ta jteclumale.

⁵ Yu'un ti Dios ti scotol xu' yu'une, chapbil xa yu'un jun c'ac'al ta xc'ot ta pasel ti mu albajuc sibtasele, ti ta stubbe sc'oplal scotole, ti soquem ti banomil ta xa'iic ta stenlejal ti oy c'usi ta xac' ta q'uelele. Laj xa sjipic yalel ta lum ti moque. Xvinaj to ta vitstic ti x'avlajetique.

⁶ Ti elamitaetique, yacal xa ta xchapanic ti syolobique. Cajalic xa ta scarretaic xchi'uc ta sca'ic. Ti ta Kire, stsacojanic xa ti smacobbailique.

⁷ Ti bu ech'em c'upil sba ti stenlejaltic avu'une, noj xa ta carretaetic. Ti jcajlejetic ta ca'e, laj xa stsaquic ta leto ti jchabiej ochebal sti' ti jteclume.

⁸ Spojobbail ti Judae, yal xa ta lum. Ti jech c'ac'al taje, ta xaq'uelic batel ti nail abtejebaletic ti sbiinoj Na ti oy ta Te'tique.

⁹ Ta xavilic ti buyuc no'ox jamal ti ochebaletic ti laj ajomic ta Steclumal ti Davide. Laj anojesic ta vo' ti yavil vo' ti oy ta olone.

¹⁰ Ta xachajic ta sq'uelel ti naetic yu'un ti Jerusalene. Ta xalomesic jlom yo' jech ta xicobin ti smocale.

¹¹ Ta o'lol xchibal ti smocale, ta xapasic joc' ta sventa yavil vo' ti yavil vo' to ox ta ba'yele. Le' une, mi ja'uc laj atuc'ulanic ta sq'uelel Buch'u laj spas talel scotol ti va'i s'elan taj une, ti vo'ne xa xchapanoj talele.

¹² Ti jech sc'ac'alil taje, ti Dios ti scotol xu' yu'une, laj staoxuc ta iq'uel ta yoq'uitael abaic, ta svulel avo'ntonic, ta sloq'uel stsotsil ajolic, ta slapel lajemal c'u'il yo' jech ta xvinaj mu x'ech' xjelav ti avocolic ava'iicuque.

¹³ Ja'uc ti vo'oxuc une, batem avo'ntonic ta muyubajel, ta sq'uelel ti c'usitic xbat o'ntonal yu'une, ta smilel ti vacaxe, ti chije, ti yacaloxuc ta sti'el ti beq'uete, ta yuch'el ti vinoe, ti xi ta xavalbe abaique: “Ve'cutic, cuch'tic vo', yu'un chamem lajemotic xa ox ti oc'ome.”

¹⁴ Va'i un, ti Dios ti scotol xu' yu'une, laj yac' sba iluc ta jtojol ti xi tsots laj yalbun ca'i ta jchiquine: “Mu xa jch'aybeic smul scolo'ic ma' ti jech le'e. Ta xc'ot ta pasel ma' ti ba'yel ta xac' sjol sbaquilic yu'une.” Ma' ti va'i s'elan taje, ja' me ta xal ti Dios ti scotol xu' yu'une.

Scontrainel ti j'abtel ti sbainoj ti muc' ta na yu'un ti ajvalile

¹⁵ Ti Dios ti scotol xu' yu'une, xi laj yalbune: “Batan, ba q'uelo ti Sebna ti sbainoj ti muc' ta na yu'un ti ajvalile, ti xi xavalbe ya'ie:

¹⁶ ¿C'usi avuni bolomal oy avu'un li'e? ¿Buch'u laj yac' ye sti' le'e ti yacalot ta xch'ojel ton ta smeltsanel amuquinal ti ta xavich' muquel ta toyol ta xcuxel avo'ntone?

¹⁷ Ta stenot batel ta nom ti Diose jech c'u cha'al ta spas jun vinic ti tsots xu' yu'une, ti sjunul yip ta xmich'ote.

¹⁸ Xabalal to batel yu'un jech c'u cha'al junuc ixtolal pelota ta sjip ech'el ta jun jamal banomile. Ta xacham ti bu taje, ti c'ot to me ta tsutsel ti acarreta ti tsots avo'nton xchi'uque, ti j'ac'vanejot ta quexlal ta xac'ot yu'un sna ti avajvale.

¹⁹ Ta jloq'uesot ta avabtel ti avich'oje. Ti bu avich'oj avabtele, ta jloq'uesot.

²⁰ “Ti jech c'ac'al taje, ta jta ta iq'uel ti cajtunel Eliaquim xnich'on ti Hilcíase.

²¹ Ta xcac'be slap ti aloin c'u'e. Ta xcac'be xchuquin ti achuc ti ja' avich'obil ta muq'ue. Ta xcac'be yich' ti avabtel avich'oje. Jech c'u cha'al junuc totil ta xc'ot yu'unic ti jteclum Jerusalene xchi'uc ti lum Judae.

²² Ta xcac'be sbain syavial sna ti Davide. Mu'yuc buch'u ta xmac yu'un c'alal mi laj sjame. Mi ja'uc xa oy buch'uc ta xjam yu'un c'alal mi laj smaque.

²³ Ti stuque ta xc'ot ta pasel ta stojol jech c'u cha'al ti bu chotol ti totil ti ich'bil ta muc' yu'un ti c'u yepal oy yu'une. J'ech'el stsacoj lec ta xcom cu'un ta yavil jech c'u cha'al junuc laux ti c'alal ta xich' pajele, ta xcom o.

²⁴ “Ta xich' joc'anel ta stojol scotol ti c'usitic toyol stojol ti oy ta sna ti stote, xchi'uc scotol ti c'usitic oy yu'un ti snitilultaque, scotol xtoc ti bic'tal pulajtic sets'e, ti bic'tal bisetique, xchi'uc ti jarruetique.

²⁵ Ti jech c'ac'al taje, ta naca sta ta xlic yochuc ti laux ta yavil ti lec to ox pajale. Ta xich' pitsel loq'uel. Ta xbaj yalel scotol ti c'usitic joc'ol ta stojole.” Ti va'i s'elan taje, ja' ta xal ti Dios ti scotol xu' yu'une.