Isaías 20 - Bible in Tzotzil de Chamula

Ti lum Asiriae ta xu'nin ti lum Egiptoe xchi'uc ti lum Etiopiae

¹ Oy bu c'ot ta pasel ti Sargón ajvalil yu'un ti Asiriae, laj stac ech'el jun yaj'abtel ti cajal sc'oplal ti bat ta jteclum Asdode. Ti yaj'abtel ti cajal yabtel yich'oje, laj stsac ta leto ti jteclume, laj yu'nin.

² Ti jech yorail taje, xi c'opoj ma' ti Dios ta sventa ti Isaías xnich'on ti Amose: “Loc'o xa ti alajemal c'u' alapoje, xchi'uc ti axonobe.” Ti Isaíase jech laj spas. Mu'yuc xa laj slap ti xonobe ti sc'u'e, t'anal com.

³ Va'i un, xi laj yal ti Dios une: “Ti cajtunel Isaíase, oxib jabil sjalil ma' ti ch'abal ti sc'u'e, ti mu ja'uc slapoj ti xonobe, ja' ta xc'ot ta senyail ta stojolic ti lum Egiptoe xchi'uc ti lum Etiopiae.

⁴ Jech ti ajvalil yu'un ti Asiriae ta sbec' loq'uel ta slumalic ti egipcioetique xchi'uc ti etiopeetique, ti mu'yuc ta alel mi mol xae, mi jva'lej queremetique, mi ch'abal xonobique, mi t'anajtic ti mu'yuc macal jutebuc ti scubique, yo' jech ta x'aq'ueic ta q'uexlal.

⁵ Ti jnaclejetique batem xa xch'ulelic ta xi'el, ti mu jay loq'uel x'ech' ti q'uexlal ta xa'iic yu'un ti etiopeetique, ti spatoj yo'ntonic ta stojole, xchi'uc ti Egipto ti mu xa c'usi sna'ic ta xa'iic ta stojole.

⁶ Ti yorail taje, xi ta x'albatic yu'un scotolic ti buch'utic nacalic ta ti' nabe: ‘Vi to la s'elan c'ot ta stojolic ec un ti jpatoj co'ntontic ta stojolic ti ay to ox jnaban jbatic ta stojolic yo' ta jc'anbetic ti pojel colele, yo' jech ta xiscoltaotic loq'uel ta yoc ta sc'ob ti ajvalil Asiriae. Avi tana le' une, ¿c'usi xa no'ox ta xcut jbatic ta jpoj jbatic un?’ ”