Isaías 19 - Bible in Tzotzil de Chamula

Ta xcaj'albat sc'oplal ti ta xlic yich' contrainel ti lum Egiptoe

¹ Xi ta xcaj'albat ti muc' ta lum Egipto ti ta xich' contrainele: Q'uelo avilic ti Dios une: Ta xtal ta Egipto ti xvolet no'ox talel ta anil ti cajal ta ba toque. Ti c'usitic meltsanbil ta c'abal ta lum Egiptoe, xniquic xa ta xi'el ta stojol, ti batem xa xch'ulel ta xi'el ti egipcioetique.

² Xi ta xale: “Ta jpas ta cha'ch'ac ya'iic ma' ti egipcioetique. Ta stsacan sbaic ta leto ti jujunique. Ti buch'u lec xil sbaique ta scontrain sbaic manchuc mi svinquilel. Ti jujun ajvaliletique ta scontrain sbaic.

³ Ta xc'ot ta pasel cu'un ta stojolic ta xyanij ti sjol sbaquilique. Ta jtubbe ta be ti c'usi snopojic ta spasique. Va'i un, sjac'anan xa sbaic ta stojol ti sdiosique, ta stojol ti j'ac'-chameletique, ta stojol xch'ulelic ti jlajel jtubeletique, xchi'uc ta stojol ti jt'unvanejetique.

⁴ Ja'uc le' une, ta jva'an ta Egipto jun yajvalic ti tsots yo'ntone, ti ta spasatic ta mantal yu'un jun ajvalil ti mu'yuc xch'ulel ta j'ech'ele.” Ti va'i s'elan taje, ja' me ta xal Dios ti scotol xu' yu'une.

⁵ Ti uc'um Niloe ta xtub sc'oplal, yu'un ta xtaquij ta j'ech'el.

⁶ Ta xtuib ta j'ech'el ti be vo' pasbile. Ti xpumet no'ox yoc ti uc'um ta Egiptoe, yu'un ta c'un c'un ta xbic'taj ech'el, ja' to ti c'uxi xtaquij ta j'ech'ele. Ti pujetique xchi'uc ti jchop o ta puje, ta xlic nucultajuc.

⁷ Ti jchop o ta puj ch'iemic ta sti'il uc'um Niloe, xchi'uc scotol ti c'usitic ts'unbil ta sti'ile, ta xtaquij. Mi ja'uc oy c'usi x'ayan ta xcom.

⁸ Ti jmas-choyetic ta uc'um Niloe, scotolic ta x'ochic ta vul o'nton ti xcha'na'ic xa ti jech c'ot ta pasele. Ti buch'utic ta sjip ochel smasobil xchoyic ta uc'ume, oyic xa ta at-o'ntonal.

⁹ Ti buch'utic ta xabtelanic ti saquil xela poq'ue, xchibetic xa liquel. Ti jax-tsotsetique xchi'uc ti jolobetique, sac pac'anic no'ox liquel.

¹⁰ Ti jal-poq'uetique mu'yuc xa c'usi stac' spasic ta xa'iic. Mu xa stac' a'yeluc ta xa'iic c'usi stac' ta spasic scotolic ti buch'utic sna'ic yabtelanel ti c'usitic ep ta tos sna'ic spasele.

¹¹ ¡Bolibemoxuc ta j'ech'el, banquilaletic yu'un Zoan! Ti banquilal jbijubtasvanejoxuc yu'un ti lum Egiptoe, bol jtojobtasvanejoxuc ta j'ech'el. ¿C'u xa ono'ox xi vul ta ajolic ti xi laj avalbeic ti faraone: “Ma' ti vu'uncutique, snitiluluncutic bijil viniquetic ti laj ech'icuc ta ajvaliletic ta vo'nee”?

¹² ¿Bu oy ti bijil viniquetic avu'un une, faraón, ta yac'belot ana' avil ti c'usi ta snop ti Dios ti scotol xu' yu'un ta scontrainel ti Egiptoe?

¹³ Ti banquilaletic yu'un ti Zoane, bolic ta j'ech'el. Sq'ueloj sbaic lajic ta lo'lael ti banquilaletic yu'un ti Menfise. Yan o be laj yiq'uic batel ti lum Egipto ti banquilaletic yu'un ti bic'tal jteclume.

¹⁴ Yanijesbatic snopbenal yu'un ti Diose, ti xjovet ta xa'iic ti banomil yu'une. Ta yan o be ta xiq'uic batel ti Egipto ta spasel scotol ti c'usi ta spase, ti co'ol s'elan junuc jyacubel ta xeta sba ti xquiclajan ta jujujote.

¹⁵ Va'i un, mi ja'uc ti jba'bee, mi ja'uc ti ts'acal batel ta patile, mi ja'uc ti buch'u nacalic ti bu oy ti xantique, mi ja'uc ti buch'u nacalic ta pujtique, mu'yuc c'usi stac' spasic ta sventa ti Egiptoe.

¹⁶ Ti jech yorail taje, co'ol s'elan jun ants ta xc'otic ti egipcio viniquetique. Yu'un batem xa xch'ulelic ta xi'el c'alal ta xilic ta syales yoc sc'ob Dios ti scotol xu' yu'un ta scontrainelique.

¹⁷ Ti egipcioetique xbat xa xch'ulelic ta xi'el ti c'alal naca no'ox ta xvulesbat ta sjolic sc'oplal ti Judá ti oy ta sventa ti oy c'usi snopoj ti Dios ti scotol xu' yu'un ta scontrainel ti Egiptoe.

¹⁸ Ti jech yorail taje, ti ta Egiptoe, oy vo'chop lum ti sna'ic xc'opojic ta hebreo c'ope ti ta sva'an sbaic ta yalel ti jun sjol yo'ntonic ta stojol ti Dios ti scotol xu' yu'une. Ti jun ta scotole, ta sbiin Steclumal C'ac'al.

¹⁹ Ta yorail taje, ta yutil ti lum Egiptoe, ta xich' va'anel jun altar ta sventa ti Diose. Ta nopol ti sts'aquilal yosile, ta xich' va'anel jbej ton sventa yich'el ta muc' ti Diose.

²⁰ Ta xc'ot ta senyail tey ta Egipto yo' jech ta svulesat ta o'ntonal ti Dios ti scotol xu' yu'une. C'alal x'avetic ta stojol Dios ta sc'anel pojel colel ti oy buch'u ta x'ilbajinvane, ta xtacbatic talel jun jpojvanej jcoltavanej yo' jech ta xpojatic, ta xcoltaatic.

²¹ Ti Diose ta xac' sba ta ojtiquinel ta stojol ti egipcioetique. Ti stuquic une ta xlic yojtiquinic Buch'u ti Diose. Ta xlic yich'ic ta muc'. Ta xac'beic ti c'usi ta xich' vocol ta milele, xchi'uc ti yan matanaletique. Ta spas strateic xchi'uc ti Diose ti ta xc'ot ta pasel yu'unique.

²² Ti Diose ba'yel ta xac'be yich' svocol ti Egiptoe. Ta xlic xpoxta ta ts'acal to un. Ti stuquic une, ta sutes sbaic. Jech ta xlic c'uxubinaticuc, ta xpoxtaatic yu'un ti Diose.

²³ Ti jech yorail taje, ta x'ayan jun jamal be ta xlic ta Egipto, ta xc'ot c'alal to Asiria. Ti asirioetique xu' ta xc'otic ta Egipto. Ti egipcioetique xu' ta xc'otic ta Asiria. Ti egipcioetique xchi'uc ti asirioetique, co'ol yo'ntonic ta xlic yich'ic ta muc' ti Diose.

²⁴ Ti jech yorail taje, ti Israele, jun ta xac' sbaic xchi'uc ti lum Egiptoe, xchi'uc ti lum Asiriae, ti ta xc'ot ta slequilalic ti lumetic ti oy ta banomile.

²⁵ Yu'un xi ta xal ti Dios ti scotol xu' yu'une: “Ta jva'an jba ta yac'bel ti yutsilal slequilale. Ta jva'an jba ta stojol ti Egipto ti c'ot ta jlumale, ta stojol ti Asiria ti laj cac'be xch'ulel yanimae, xchi'uc ta stojol ti Israel ti ja' cu'untaque.”