Isaías 18 - Bible in Tzotzil de Chamula

Ta xcaj'albat sc'oplal ta xlic yich' contrainel ti lum Etiopiae

¹ Mu xa ono'ox cha'bel un, ti muc' ta lum Etiopia ti oy ta sti'iltac uc'ume, ti bu xjononet uni chonetique,

² ti ta staquic talel ti j'al-mantal j'ich'-c'opetic yu'unic ta x'ech'ic talel ta uc'um Niloe, ti xcajetic no'ox talel ta barco ti meltsanbil jchop o ta puje. Nuletanic batel ta anil un cha'e, j'alc'op j'ich'-mantaletic, ta jun lum ti bu nacalic ti natiquil viniquetique, ti xlebebet no'ox ta ch'uletel ti sbec'talique, ti ja' jun lum ti buyuc no'ox xi'bilique, jun lum ti tsots xu' yu'une, ti cajal xa'i sbae, ti nacalic ta jun banomil ti buyuc no'ox oy ti uc'ume.

³ Acotolic jnaclejetic ta banomil, ta xavilic ta vitstic ti senyail ta xich' toyele, ta ya'yiel ti ta xich' oq'uisanel ti oq'uese.

⁴ Ti Diose xi laj yalbune: “Ti vi to bu oyune, ts'ijil no'ox c'op ti chapalun ti oy c'usi ta jpase jech c'u cha'al xojobin no'ox ti c'ac'al ta yorail ti corixmae, jech c'u cha'al ti c'ab toc c'alal xtemet talel ti lumal toc ta yorail ta xich' tsobel ti ts'unubale.

⁵ C'alal ta x'ech' yorail ta nichinajel ti uvae, c'alal ta xjoybij ta toc'on uva ti xnich laj yaq'ue, ja'uc ti c'alal mu to ta xac' ti sate, ta xich' bojel ch'ulel ta cuchilu ti sc'obtaque, ta xich' jipel batel xtoc un.

⁶ Scotol jipbil tenbil ta xcomic ta vitstic ta sventa ti jti'oval mutetique, ta sventa ti te'tical chon bolome. Ti bu taje, ta x'ech' yu'unic corixma ti mutetique. Scotol ti te'tical chonetique ta x'ech yu'unic yorail sic ti bu taje.”

⁷ Ta sventa ti natiquil viniquetic ti xlebebet no'ox ta ch'uletel ti sbec'talique, ti buyuc no'ox xi'bilique, ti tsots xu' yu'unique, ti cajal xa'i sbaique, ti ja' nacalic ta jun banomil ti buyuc no'ox oy ti uc'ume, ta xich'ic talel smoton ti Dios ti scotol xu' yu'une. Ti jech c'ac'al taje, ta xaq'uic ti bu ta xtae ta c'oponel ti Dios ti scotol xu' yu'un ti oy ta Sione.